Matie 5

Ãtee ã Yeso ke ywel a nkio

(Luk 6.20-26)

1Ŋ'emwɛn Yeso embuul e baal, ndɛ onɔɔn nkal a nkio, bu abvi nsɛn. Ayio a ndɛ asyel tsotsoo a ndɛ. 2Ndɛ awal oyɛɛn, obvi bɔ oyiool ndiri:

3«Esɛ ngamfɛn, ola baal b'ali aywal m'ãndɔɔ m'ɔ̃fel,

ke ngwel wɛ Okwɛn o ywel oli bo bɔ!

4Esɛ ngamfɛn, ola baal b'abelel,

ke ngwel wɛ, Nziã akieel abweel bɔ!

5Esɛ ngamfɛn, ola baal b'ali y'ɔ̃kwal-efyɛ,

ke ngwel wɛ bɔ akieel abɔɔ nsie yi élieel Nziã ndiri awa bɔ!

6Esɛ ngamfɛn, ola baal b'ali ye nzal ye nzuaal yi asa ãndɔɔ mã dzu,

ke ngwel wɛ bɔ akieel ayool!

7Esɛ ngamfɛn, ola baal b'asio baal nyiĩ,

ke ngwel wɛ Nziã akieel asio bɔ nyiĩ!

8Esɛ ngamfɛn, ola baal b'ali ɛ̃kwal tsɛtsɛ,

ke ngwel wɛ bɔ akieel amwɛn Nziã!

9Esɛ ngamfɛn, ola baal b'asa kwɛn opi okal onse baal,

ke ngwel wɛ akieel ata bɔ me baan a Nziã!

10Esɛ ngamfɛn, ola baal bɛn abetuaal bɔ mpal me ndɔɔ yɛn bɔ asa ãndɔɔ mã dzu,

ke ngwel wɛ, Okwɛn o ywel okieel okal bo bɔ!

11Esɛ ngamfɛn ola byɛ, ŋɛn baal abetoo byɛ ɛ̃tswɛ, abetuaal byɛ mpal bvool abeburu byɛ ãndɔɔ m'emfa bvieel, me ndɔɔ a mɛ̃. 12Esia mpal, bvool edzɔɔl m'esɛ, me ndɔɔ yɛn, Nziã okwee byɛ ebvakab ki enɛn ke ywel. Ke ngwel wɛ, ási aliaal-ɛ̃kiɛɛn a Nziã b'átsɔɔn nkwel a byɛ abubu.»

Ɔ̃ngwa ye mwiĩ a ɔkiri

(Mak 9.50; Luk 14.34-35)

13Yeso bvool olieel ndiri: «Byɛ, byɛ eli ɔ̃ngwa wu ɔ̃kiri. Kɛn ɔ̃ngwa okɛɛn oyii wel, emfa emã ki abveel obvie o ndɛ? Ndɛ ŋ'ayii ɔ̃sal pyɛ, esiil kɛn a k'ata ndɛ pfɛɛ ke nkwel-a-nzi, kwɛn baal adziaal ndɛ. 14Byɛ, byɛ eli mwiĩ a ɔ̃kiri. Ola b'atuu nkal a nkio k'okoo k'okal m'odziɔɔn wɛ. 15Andɛɛl mbunda, k'akoo k'apfeel ndɛ kantin wɛ, kɛn andɔɔl ndɛ nkal eluɔ ki abesuul ndɛ, kwɛn ndɛ angal me ndɔɔ a baal bueel b'ali onse nzɔ. 16Emfa kiki, yɔɔl kwɛn mwiĩ a byɛ angal ke nkwel a baal, kwɛn oŋɔ̃ bɔ amwɛn ɛ̃sal ɛ̃ byɛ mi ngesɛ, bvool alweel Tal a byɛ wu oli ke ywel.»

Yeso ke nkwel a Ngel

17Yeso bvool olieel ndiri: «Ebee otsam wɛn mɛ̃ ngyi me ndɔɔ yi mbaal Ngel#5.17 Ngel ŋã esuo ãngel m'ãli onse ɛ̃nkaan ɛ̃taan mi ékel Moyize. y'ãyɛɛn m'aliaal-ɛ̃kiɛɛn a Nziã. Mɛ̃ ke ngyi me ndɔɔ yi mbaal mɔ̃ wɛ, mɛ̃ ngyi me ndɔɔ yɛn otsɛn o mɔ̃ mbueel okoo. 18Taa-taa bam, mɛ̃ eyɛɛn byɛ wɛn, tiil ye k'èbwel ywel ye nsie, ekal si mpiɛɛl, ekal si elu-luɔ kyam k'emã ki embal me ngel pyɛ, ye k'ekoo ãndɔɔ mbueel. 19Obɔ otsɛn bɛn, okɛɛn mbuul ombaal onkyam ngel yi ebvool mbee, bvool oyiool bakyɛ k'asa obobɔ, ndɛ akieel akal mbuul wu obvool mbee onse Okwɛn o ywel. Kɛn a okɛɛn mbuul olweel ãngel bvool oyiool bakyɛ k'asa obobɔ, ndɛ akieel akal mbuul wu ɔ̃nɛn onse Okwɛn o ywel. 20Ke ngwel wɛ, mɛ̃ eyɛɛn byɛ wɛn, okɛɛn emfa ki esa byɛ ãndɔɔ mã dzu k'enduru emfa ki ayiool b'ãngel y'Afalisaye wɛ, byɛ k'ekoo k'esam Okwɛn o ywel wɛ.»

Obveel b'ondoo y'ɔ̃taal

(Mak 11.25; Luk 12.57-59)

21Yeso bvool olieel ndiri: «Byɛ eyoo k'álieel ankɔɔ ndiri: “Oyɛɛ ke bam mbuul wɛ#Opa 20.13.” Mbuul wu abam ngaburu-mbuul, ndɛ àyetsuun ke nkwel antwel. 22Kɛn a mɛ̃, mɛ̃ eyɛɛn byɛ wɛn, mbuul ndyam wueel wu aya mpuru ye ndoo a dzii, ndɛ àyetsuun ke nkwel antwel. Mbuul wu ata ngaburu-mbuul ndiri: “mbuul wa ngwel-a-ngwel”, àbiri ndɛ ke mbal yi nɛn yi Ayuda. Mbuul wu atoo wumɔ̃ ndiri: “Ewool e mbuul”, àtyal ndɛ onse ywɛn e mbaa. 23Obobɔ, okɛɛn yɛ biri kab e yɛ ke nkiin yi awa ãkab, ŋ'etɔ yɛ okɔ, okɛɛn yɛ yeel kwɛn ndoo a yɛ wa dzii oli ye ndɔɔ ye yɛ, 24siil kab e yɛ oŋɔ̃, ke nkwel a nkiin yi awa ãkab, kɔɔl kɛn y'abveel ondoo ye ndɛ. Ke mbee oŋɔ̃, yɛ abvool kwɛn yɛ wa kab e yɛ ola Nziã. 25Okɛɛn mbuul obvi yɛ mbal, ŋ'eyii eyi byɛ otsuun, ŋ'eli byɛ kɛn me nkuul, faal ndɔɔ oyɔ ye ndɛ tswa-a-tswa. Okɛɛn k'obobɔ wɛ, mbuul ondɛ ol'owi yɛ me mviɔɔl ɛ̃ ntwel, ntwel owi yɛ me mbwel-mbwel, mbwel-mbwel owel yɛ oywɛɛn me bwal. 26Taa-taa bam, mɛ̃ eyɛɛn yɛ wɛn, yɛ k'àpal onse okɔ wɛ tiil ye k'efuru yɛ ebiin e yɛ kyam kieel.»

Esio y'obal o mbuul onse obi

(Mat 18.8-9; Mak 9.43,47-48)

27Yeso bvool olieel ndiri: «Byɛ eyoo k'álieel ndiri: “Oyɛɛ ke dzuu y'ɔ̃kal wuo y'ɔ̃lam a mbuul wɛ#Opa 20.14.” 28Kɛn a mɛ̃, mɛ̃ eyɛɛn byɛ wɛn: Mbuul ndyam wueel wu otal anga-ɔ̃kal y'efua, ŋ’amaadzuu ye ndɛ onse ɔ̃kwal a ndɛ. 29Obobɔ, okɛɛn dziil e yɛ li elam ebiri yɛ onse obi, mbaal lɔ, ta lɔ pfɛɛ lala ye yɛ. Ke ngwel wɛ, eli ngesɛ me ndɔɔ a yɛ k'aywɛn a elyam e nzuru ngemɔ̃, ye k'atyal nzuru a yɛ yam yueel onse ywɛn e mbaa. 30Okɛɛn kuɔɔl e yɛ ki elam ebal yɛ onse obi, tsiil kyɛ, ta kyɛ pfɛɛ lala ye yɛ. Ke ngwel wɛ, eli ngesɛ me ndɔɔ a yɛ k'aywɛn a elyam e nzuru ngemɔ̃, ye k'atyal nzuru a yɛ yam yueel onse ywɛn e mbaa.»

Obam o bal

(Mat 19.7-9; Mak 10.4-5,10-12; Luk 16.18)

31Yeso bvool olieel ndiri: «Álieel hɛ̃ ndiri: “Mbuul wu abee ɔ̃kal, awa ndɛ ɔ̃nkaan wu ekwi bɔ bal#Det 24.1.” 32Kɛn a mɛ̃, mɛ̃ eyɛɛn byɛ wɛn, mbuul ndyam wueel wu abee ɔ̃kal, okɛɛn ke me ndɔɔ abɔɔl wɛ, ŋ'atam ɔ̃kaal ondɛ k'ayedzuu ye bɔɔl ɔ̃kyam. Mbuul wu abaal ɔ̃kaal wu ebee ɔ̃lam, ŋ'adzuu y'anga-ɔ̃kal.»

Olab b'ɔ̃kyel

33Yeso bvool olieel ndiri: «Byɛ bvool eyoo k'álieel ankɔɔ ndiri: “Oyɛɛ ke lab ɔ̃kyel wa mfya wɛ. Kɛn a yɛ ebvaan asa ndɔɔ yi elab yɛ ɔ̃kyel ke nkwel a Mfam#Lev 19.12; Ɛ̃bv 30.3 ; Det 23.22-24; Dza 8.17; Ãnz 15.4; 1Ti 1.10.” 34Kɛn a mɛ̃, mɛ̃ eyɛɛn byɛ wɛn, eyɛɛ k’elab ɔ̃kyel ndyam wɛ, ekal me nkuũ a ywel, ke ngwel wɛ lɔ eli Kiri e Nzia li okwɛn, 35ekal me nkuũ a nsie, ke ngwel wɛ yɔ eli mboo yi ebesuul Nzia ntaã e ndɛ, wuo ekal me nkuũ a Yelusalem, ke ngwel wɛ olɔ eli bviil li Ɔ̃kwɛn wu ɔ̃nɛn. 36Oyɛɛ hɛ̃ ke lab ɔ̃kyel m'ɔ̃tswɛ a yam wɛ, ke ngwel wɛ, yɛ ke koo k'asa kwɛn efu e yɛ ngemɔ̃ ekal fuu wuo pi wɛ. 37Eyɛɛn kɛn a wɛn “hɛɛ̃” okɛɛn hɛɛ̃, wuo wɛn “hɛɛ̃-hɛ̃”, okɛɛn hɛɛ̃-hɛ̃. Ke ngwel wɛ, ndɔɔ yi abelweel ebefa ola Nga-ãyal ãbi.»

Obee b'obi obveel m'obi

(Luk 6.29-30)

38Yeso bvool olieel ndiri: «Byɛ eyoo k'álieel ndiri: “Okɛɛn mbuul obwel yɛ dziil, yɛ hɛ̃ bwel li ndɛ”, bvool ndiri “okɛɛn mbuul ombaal yɛ dziin, yɛ hɛ̃ mbaal li ndɛ#Opa 21.24 ; Lev 24.20 ; Det 19.21.” 39Kɛn a mɛ̃, mɛ̃ eyɛɛn byɛ wɛn: Okɛɛn mbuul osi byɛ obi, ebee ndɛ bɔ obveel. Ŋɛn mbuul obɛɛl yɛ empal me bal li elam, kaal ndɛ hɛ̃ bal li ekal. 40Okɛɛn mbuul odzii k’abva yɛ mbal me ndɔɔ yi awal yɛ kadzaka, yɔɔl ndɛ hɛ̃ awal simisi. 41Okɛɛn mbuul oywɛɛn yɛ k’abiri ndɛ pfuũ kilometele ngɔmɔ̃, biri ndɛ lɔ akilometele buaal ye ndɛ. 42Ŋɛn mbuul osɔɔ eluɔ ola yɛ, wa ndɛ kyɛ. Ŋɛn mbuul odzii k’asuɔɔn eluɔ ola yɛ, bee ndɛ kyɛ oluo.»

Odzii b'ataal

(Luk 6.27-28,32-36)

43Yeso bvool olieel ndiri: «Byɛ eyoo k'álieel ndiri: “Yɛ adzii nga-ndoo a yɛ, kɛn a yɛ abyal ɔ̃taal a yɛ#Lev 19.18.” 44Kɛn a mɛ̃, mɛ̃ eyɛɛn byɛ wɛn, edzii ataal a byɛ. Ebuɛɛn me ndɔɔ a b'atuaal byɛ mpal. 45Obobɔ, byɛ èkal baan a Tal a byɛ wa ke ywel. Ke ngwel wɛ, ndɛ abepaal tal ol'abi y'abvɛ. Ndɛ bvool abesa kwɛn mvel andwɔɔ nkal a baal ba dzu ye baal b'ãbi. 46Ke ngwel wɛ, okɛɛn byɛ edzii kɛn a baal b'adzii byɛ, ebvakab ki awa byɛ ki efa kwɛn? Nzal-a-ŋɛn, Atwal-mpal hɛ̃ adzii b'adzii bɔ. 47Okɛɛn baal b'ebio byɛ kɛn a baan-ngoo a byɛ, ndɔɔ yi esa byɛ yi nkwa oŋɔ̃ a yɔ? Baal bɛn k'ayɛɛ Nziã wɛ abesa obobɔ hɛ̃. 48Oŋɔ̃ ekal ɔ̃koo, onge Tal a byɛ wa ke ywel wu oli ɔ̃koo.»

Currently Selected:

Matie 5: ngz

Highlight

Copy

Compare