Matie 4

Ɔ̃pfu ombio Yeso

1Ke mbee oŋɔ̃, Ɔ̃fel obiri Yeso k'ɔ̃baan wa kɛɛ-kɛɛ, kwɛn Ɔ̃pfu akie ndɛ. 2Yeso osi ãbuɛɛn mã me nzal apipi ãku-ãnã (40) y'atsia ãku-ãnã (40). Ke mbee ãbuɛɛn omɔ̃, ndɛ nzal ewel. 3Ɔ̃pfu-nga-ɔ̃mbio osyel tsotsoo a ndɛ, bu alieel ndɛ bubu: «Okɛɛn yɛ li Muaan a Nziã, oŋɔ̃ tam kwɛn ãnkɔɔn mã ãkɔɔl nsuɔ#4.3 Esuɔ li Ayuda eli mampa.!» 4Yeso obveel ndɛ bubu: «Ákel bubu: “Elaã e mbuul k'eli kɛn a m'esuɔ wɛ, kɛn a lɔ eli m'Endɔɔ lueel li epal m'onywã a Nziã!#Det 8.3”»

5Obobɔ, Ɔ̃pfu obiri Yeso ke bviil li ngel, osuul ndɛ ke ywel a Nzɔ a Nziã, 6bu alieel ndɛ bubu: «Okɛɛn yɛ Muaan a Nziã li, tsio tiil nsie ku! Ke ngwel wɛ, ákel ndiri:

“Ndɛ àtam ãnzwel ã ndɛ me ndɔɔ a yɛ.

Mɔ̃ ã̀biri yɛ nkal a mviɔɔl ɛ̃ mɔ̃,

kwɛn yɛ bee tsa obɛɛl me nkɔɔn#Ãnz 91.11-12.”» 7Yeso obveel ndɛ bubu: «Ákel hɛ̃ bubu: “Oyɛɛ ke poo Mfam Nziã a yɛ wɛ!#Det 6.16”»

8Ɔ̃pfu bvool obiri ndɛ ke nkio yi nda yi nda, bu asuo ndɛ ãkwɛn m'ɔ̃kiri mam mbueel ye lweel e mɔ̃. 9Ndɛ bu alieel Yeso bubu: «Mɛ̃ èwa yɛ bvam bvieel bvi, ŋɛn yɛ bvi ãbuo ke nkwel a mɛ̃, me ndɔɔ yi alweel mɛ̃.» 10Yesu bu abveel ndɛ ndiri: «Mbal ŋã Ɔ̃pfu! Ke ngwel wɛ, ákel bubu: “Yɛ àbva ãbuo kɛn a ke nkwel a Mfam Nziã wu Nziã a yɛ, yɛ àlweel kɛn a ndyam#Det 6.13-14.”» 11Ɔ̃pfu bu ayɔɔl Yeso. Ãnzwel bu ãyii ãsal me ndɔɔ a ndɛ.

Yeso obɛɛn ɔ̃sal ke Ngalile

12Ŋ'eyoo Yeso ndiri alɔ Dzaã bwal, ndɛ odzuru nzuru oyɛn nsie yi Ngalile. 13Ndɛ ombal Nadzalet, bu ayekal ke Kapelanahum, bviil li nku-a-nku a baã, me nsie yi Dzabulɔ̃ ye Nefitali. 14M'emfa okyɛ, ŋ'asi ãndɔɔ m'élieel ɔ̃liaal-ɛ̃kiɛɛn a Nziã Edzayi ndiri:

15«Yɛ wu nsie yi Dzabulɔ̃ ye yɛ wu nsie yi Nefitali,

nkuul ãdza m'ɔ̃ngwa, ongwel a nzal yi Dzolodɛ̃.

Yɛ wu Ngalile, ɔ̃kiri a baal bɛn k'Ayuda wɛ!

16Baal b'abvi nsɛn onse empeel

amwɛn mwiĩ wu ɔ̃nɛn,

nkal a baal b'abvi nsɛn onse ɔ̃kiri wu empeel li epfu,

mwiĩ obal#Edz 8.23–9.1.»

17Bɛɛn lio olɔ, Yeso obɛɛn otee ndiri: «Ekaal ɛ̃kwal ɛ̃ byɛ, ke ngwel wɛ Okwɛn o ywel osyel tsotsoo a byɛ!»

Yeso oti ayio anã b'ɛ̃kwel mbel

18Tsoo ngelemɔ̃, Yeso ákedzuu nku-a-nku a baã li Ngalile, ndɛ omwɛn baan-ngoo buaal: Éli Simɔ̃ wu ata me Piɛɛl ye muaan-ngoo a ndɛ Ãndele. Bɔ áketyal okii onse nzal, ke ngwel wɛ bɔ áli aswal b'answi. 19Ndɛ olieel bɔ ndiri: «Enɔɔn a mɛ̃, mɛ̃ èsuul byɛ aswal a baal.» 20Alili oŋɔ̃, bɔ ayiri ãkii ã bɔ, bu aluɛɛn a ndɛ. 21Ŋ'esyel ndɛ nkwel lala, ndɛ omwɛn baan-ngoo akyam buaal: Éli Dzak ye Dzaã, baan a Dzebede. Bɔ áli onse bvuaal ye tal a bɔ, ákefaal ãkii ã bɔ. Ndɛ oti bɔ mbel hɛ̃. 22Alili oŋɔ̃, bɔ ayiri bvuaal ye tal a bɔ, bu aluɛɛn a ndɛ.

Yeso oyiool bvool obvuul embuul e baal

23Yeso ákedziɔɔn Ngalile wueel, ayiool onse ãnzɔ m'ãbuɛɛn, atsal Nsia yi Ngesɛ yi Okwɛn o Nziã, bvool aboo ãluu mam mbueel y'elyam bvam bvieel onse baal. 24Obobɔ, nsia a ndɛ etsɔɔn m'etswi e nsie kieel ki Sili. Abiri ndɛ baal b'ákemwɛn fool li ãluu m'emfa bwɛn emfa: B'áli y'ɛ̃fel mi ɛ̃bi-ɛ̃bi, ye b'áli y'ãluu m'esiɔ̃, y'ekal. Ndɛ obvuul bɔ. 25Embuul e baal ékeluɛɛn a ndɛ. Bɔ ákefa Ngalile, ye nsie y'Ãbviil-Kuun, ye Yelusalem, ye Yude, y'etswi e nsie ki ongwel a Dzolodɛ̃.

Currently Selected:

Matie 4: ngz

Highlight

Copy

Compare