Matie 3

Ãtee ã Dzaã Batis

1Me lio olɔ, Dzaã Batis opal onse ɔ̃baan wa kɛɛ-kɛ wa nsie yi Yude, bu abvi otee bubu: 2«Ekaal ɛ̃kwal ɛ̃ byɛ, ke ngwel wɛ Okwɛn o ywel osyel tsotsoo a byɛ!» 3Dzaã ondɛ, wu élieel Edzayi wu ɔ̃liaal-ɛ̃kiɛɛn a Nziã me ndɔɔ a ndɛ ndiri: «Nkii ngamɔ̃ ebebiool nkal ɔ̃baan wa kɛɛ-kɛɛ bubu:

“Efaal ɔ̃siɔɔn me ndɔɔ a Mfam Nziã!

Eseel ãnkuul ã ndɛ ãkal dzu#Edz 40.3!”»

4Dzaã ákelaal ekɔ ki me mfu e nyam wu ɔ̃mbiri-ãpfuũ wu ata me swamo. Ndɛ hɛ̃ áli y'ɔ̃sii wa kwiil me luu. Bvi-odza bvi ndɛ éli ɛ̃nyɛɛ̃ ye mbaal ã nzoo. 5Baal a Yelusalem, ye ba nsie a Yude yueel ye ba nku-a-nku a nzal yi Dzolodɛ̃ bueel ákeya ola ndɛ. 6Bɔ ákekiool ãbi ã bɔ ke nkwel a baal bueel, ndɛ ákewa bɔ opongo onse Dzolodɛ̃.

7Onge bɛn Dzaã ámwɛn ɔ̃bɔbɔ wu Afalisaye y'Asaduseyɛ̃ áyi opongo owal, ndɛ olieel bɔ ndiri: «Byɛ abi-abi eli onge ampel! Wu osuo byɛ emfa ki abal mpuru a Nziã yi èyeya nã? 8Obobɔ, esa ãndɔɔ mã ngesɛ m'ãsuo kwɛn byɛ ekaal ɛ̃kwal! 9Ebee byam-a-byam obeyɛɛn wɛn: “Abalayam oli nkiɔɔn a bee.” Ke ngwel wɛ, mɛ̃ bam eyɛɛn byɛ wɛn, ãnkɔɔn m'emwɛn byɛ mã, Nziã okoo k'asa kwɛn mɔ̃ ãkɔɔl atiɔɔl b'Abalayam. 10Bam ŋ'eyɛɛn ŋã, ekuu amaayɛɛl me ndɔɔ yi akii ɛ̃ti bɛɛn k'ɛ̃dza ɛ̃ myɛ̃. Ɔ̃ti ndyam wueel wɛn k'aburu nsia yi mvɛ wɛ, àkii ndɛ bvool àtyal ndɛ onse mbaa. 11Mɛ̃ wu ewa byɛ opongo b'ãdza kwɛn byɛ ekaal ɛ̃kwal. Kɛn a mbuul wu aya, wu onduru mɛ̃ me waan. Mɛ̃ ke mvaan m'odzuul b'asimpal a ndɛ wɛ. Ndɛ kieel wu awa byɛ opongo b'Ɔ̃fel wu Ɔ̃nsensal ye bo mbaa. 12Mbuul ondɛ oli y'esiɔ onse mviɔɔl ɛ̃ ndɛ, me ndɔɔ yi akab nsia e bele ye bviĩ bvi ebi-ebi. Ndɛ àbvool nsia e ndɛ onse nzɔ yi abekwɛɛ yɔ, kɛn a ndɛ àtyal bviĩ bvi ebi-ebi onse mbaa yɛn k'edzam wɛ.»

Yesu owel opongo

13Obobɔ, Yeso ofi nsie yi Ngalile oyi nzal yi Dzolodɛ̃, me ndɔɔ yi ayewal opongo ola Dzaã. 14Kɛn a Dzaã obvi obee, bu alieel ndɛ ndiri: «Mɛ̃ mbuul wu ekeya ola yɛ, me ndɔɔ yi ewal opongo, yɛ bvool yi ola mɛ̃!» 15Yeso obveel ndɛ bubu: «kiool kwɛn esa obobɔ meba ŋã. Ke ngwel wɛ, okyɛ emfa kyɛn ebvaan bia-yɛ esa ãndɔɔ mbueel m'ãli dzu ke nkwel a Nziã.» Dzaã k'abebee wɛ. 16Ŋ'ewel Yeso opongo, tswa-a-tswa oŋɔ̃, ndɛ opal onse ãdza. Ywel edzweel nzuru, ndɛ omwɛn Ɔ̃fel a Nziã ayesool m'emfa ki kuun, bvool ayebva nkal a ndɛ. 17Nkii bu eyɛɛn ke ywel ndiri: «Wu bu Muaan a mɛ̃ wu ɔ̃tio, mɛ̃ ndi y'esɛ ki bibi me ndɛ.»

Currently Selected:

Matie 3: ngz

Highlight

Copy

Compare