Matie 24

Yeso oyɛɛn ndiri akieel atsal nzɔ a Nziã

(Mak 13.1-2; Luk 21.5-6)

1Yeso opal onse Nzɔ a Nziã, bu abvi oyi. Ayio a ndɛ ayesuo ndɛ emfa ki átuu yɔ. 2Ndɛ abvuru oyɛɛn, olieel bɔ ndiri: «Byɛ emwɛn eluɔ bvi bvieel? Taa-taa bam, mɛ̃ eyɛɛn byɛ wɛn k'èkal ye nkɔɔn si ngamɔ̃ y'ekieel esiil nkal a yinkyɛ wɛ: Bvam bvieel ekieel etsɔɔn.»

Fool y'otuaal o mpal

(Mak 13.3-13; Luk 21.7-19)

3Yeso áli me nsɛn ke nkio a ɛ̃ti mi olibve, ayio ayefuul ndɛ me pyɛ ndiri: «Meyɛɛn bee, lio emã li ekieel eya ãndɔɔ omɔ̃? Eliĩ emã ki ekieel esuo oya o yɛ ye ntɔ a ɔ̃kiri?» 4Ndɛ bu abveel bɔ bubu: «Ekal y'onkyab, kwɛn mbuul abee byɛ opfuru. 5Ke ngwel wɛ, baal bibi akieel aya me nkuũ a mɛ̃ ndiri: “Mɛ̃ ndi Mãsia” bvool bɔ akieel apfuru ɔ̃bɔbɔ a baal. 6Byɛ èyoo ɔ̃sam wu ãmvel ye wu ɔ̃nyiin wu ãmvel, oŋɔ̃ ɛ̃kwal ɛ̃ byɛ ɛ̃bee ke ywel okal. Ke ngwel wɛ, ebvaan kwɛn ãndɔɔ omɔ̃ ãbwel. Kɛn oyɔ kieel k'ekal ntɔ a ɔ̃kiri kɛn wɛ. 7Nzal-a-ŋɛn, ɔ̃kiri ngɔmɔ̃ akieel adzwaan ye wumɔ̃, okwɛn ngɔmɔ̃ hɛ̃ okieel odzwaan ye bokyɛ. M'ãmboo bibi, ekieel ekal y'ɛ̃lɔɔ, nsie hɛ̃ ekieel enziool nzuru. 8Ãndɔɔ omɔ̃ mbueel ãkieel ãkal onge obɛɛn b'obaan o mwiĩ b'eyoo ɔ̃kaal wu oyii ayi oburu. 9Obobɔ, akieel atiɔ byɛ kwɛn atuaal byɛ mpal, bvool akieel abam byɛ. Ãyam ã baal mbueel ãkieel ãbyal byɛ me ndɔɔ a nkuũ a mɛ̃. 10M'emfa okyɛ, baal bibi akieel ayɔɔl okiool. Bɔ akieel atiɔ bakyɛ bam-a-bam, akieel abyal bakyɛ bam-a-bam. 11Aliaal-ɛ̃kiɛɛn a mfya bibi akieel apal bvool apfuru ɔ̃bɔbɔ a baal. 12Onge bɛn obi kieel olɔɔ kɛn onge olɔɔ, dzii e baal bibi ekieel ekwal. 13Kɛn a wu akieel akuru ɔ̃kwal tiil ntɔ, wu akieel abvuul. 14Obobɔ, Nsia yi Ngesɛ y'Okwɛn yi, akieel atsal yɔ m'ɔ̃kiri a nsie wueel. Oŋɔ̃ me lio olɔ, ntɔ a ɔ̃kiri ètɔ.»

Eluɔ ki ongɛɛ

(Mak 13.14-23; Luk 21.20-24)

15«Obɔ otsɛn bɛn, ŋ'ekieel emwɛn byɛ “eluɔ ki ongɛɛ”, ki élieel Daniɛɛn wu ɔ̃liaal-ɛ̃kiɛɛn a Nziã,#Dan 9.27; 11.31; 12.11etɛɛn onse mboo yi ngel, oŋɔ̃ yɔɔl kwɛn mbuul wu atsiɔ ãndɔɔ mã, akwaal otsɛn o mɔ̃ ngesɛ. 16Obobɔ, yɔɔl kwɛn b'akieel akiɔɔl ke nsie a Yude abal onse ãnkio. 17Yɔɔl kwɛn mbuul wu akieel akal ke ywel a sɛɛ e nzɔ#24.17 Me b'otal sɛɛ, etal Dzo 2.6., abee obesool me ndɔɔ yi ayewal eluɔ onse nzɔ. 18Yɔɔl kwɛn mbuul wu akieel akal k'ãnguun, abee nzɔ obekɔɔl me ndɔɔ yi ayewal kadzaka. 19Ãwua bibi m'ãtsoo omɔ̃ m'akaal b'akieel akal y'ãyam, ye b'akieel awa baan ãbiaal! 20Ebuɛɛn, kwɛn oŋɔ̃, obal o byɛ obee okal me lio e mfyɛ wuo me tsoo e saba! 21Ke ngwel wɛ, ekieel ekal ye fool lam bibi, m'emfa kyɛn fool li obobɔ lɔ-okal kɛn amwɛn lɔ wɛ fa k'ébɛɛn ɔ̃kiri tiil lio li, bvool lɔ kieel k'ebekal bam wɛ. 22Okɛɛn Mfam k'ákueel ɔ̃bvɛn wu ãtsoo omɔ̃ wɛ, k'ekekal ye mbuul wu abvuul wɛ. Kɛn a me ndɔɔ a baal b'ésueel ndɛ, ndɛ akieel akuaal ɔ̃bvɛn a mɔ̃. 23Obobɔ, okɛɛn mbuul olieel byɛ ndiri: “Mãsia oli ŋã!” Wuo, “ndɛ oli ku!” Ebee ndɛ okiool. 24Ke ngwel wɛ, amãsia ba mfya y'aliaal-ɛ̃kiɛɛn a mfya akieel apal. Bɔ akieel asa ãndɔɔ m'ãnɛn y'emvieel, me ndɔɔ yi apfuru baal. Okɛɛn bɔ akoo, bɔ àpfuru onkyam baal b'ésueel Nziã. 25Mɛ̃ bu ngwi byɛ ãnkunkwa obɔ! 26Okɛɛn alieel byɛ ndiri: “Etal, Mãsia oli onse ɔ̃baan wa kɛɛ-kɛɛ!” Ebee okɔ oyi. Wuo okɛɛn alieel byɛ ndiri: “Etal, ndɛ oli onse mboo yi m'edziɔɔn!” Ebee okiool. 27Ke ngwel wɛ, oya o Muaan a mbuul okieel okal onge ɔ̃bɛɛn a nzyel wu ayɛɛl ɔ̃kiri fa etswi ki epal tal tiil etswi ki edziin lɔ. 28Mboo yi èkal ebiĩ, yi èbvɔɔn angɔ-nywɛn#Luk 17.37.»

Eliĩ e Muaan a Mbuul

(Mak 13.24-27; Luk 21.25-28)

29«Tswa-a-tswa, ke mbee ãtsoo ã fool omɔ̃,

tal ekieel epiin,

nswii k'abepaal mvieel wɛ,

angam-a-ngam afa ywel atswal.

Ɛ̃fel ɛ̃ waan mi ke ywel ɛ̃kieel ɛ̃tiɔɔl.»

30«#24.30Abɔɔl buaal b'akieel asal mboo mɔ̃ onse ãnguun, akieel abiri ngɔmɔ̃, akieel asiil wumɔ̃. Ãyɛɛn omɔ̃ k'ãli onse ɛ̃nkaan ɛ̃ Nziã mikyɛ mi tsɔɔn-tsɔɔn wɛ.Obobɔ, eliĩ e Muaan a Mbuul ekieel epal ke ywel. Ãyam ã baal a nsie mbueel ãkieel ãluɔɔl. Mɔ̃ ãkieel ãmwɛn k'eya Muaan a mbuul onse epɛn e ywel y'omfam ye waan li bibi. 31Ŋ'ekieel ebel mvel-a-mvel wu ɔ̃nɛn, Muaan a mbuul akieel ayuɔɔl ãnzwel ã ndɛ. M'etswi enge-enã bvi ɔ̃kiri a nsie, fa ntɔ a ywel tiil yinkyɛ, mɔ̃ ãkieel ãbvool baal b'ésueel ndɛ.»

Mboo a ɔ̃ti a fig

(Mak 13.28-31; Luk 21.29-33)

32«Eyɔɔl mboo a ɔ̃ti wa fig ewa byɛ ãyal: Ŋ'emwɛn byɛ kwɛn ãpɔɔ̃ ã ndɛ ãyii dzoo-dzoo, bvool ãbvi ãnyuɔ̃ opaal, oŋɔ̃ byɛ eyɛɛ wɛn ɔ̃bvu wu alili oyii tsotsoo. 33Emfa kiki, ŋ'ekieel emwɛn byɛ ãndɔɔ omɔ̃ mbueel, eyɛɛ wɛn Muaan a mbuul oyii tsotsoo k'edzoo. 34Taa-taa bam, mɛ̃ eyɛɛn byɛ wɛn, baal ba lio li kieel k'akwa wɛ, ye k'èya ãndɔɔ omɔ̃. 35Ywel ye nsie ekieel ebwel, kɛn ãyɛɛn ã mɛ̃ kieel k'ãbwel mam wɛ.»

Wu oyɛɛ lio e ntɔ a ɔ̃kiri nã?

(Mak 13.32-37; Luk 17.26-30,34-36)

36«Me b'otal tsoo ye lio, mbuul wu oyɛɛ mɔ̃ pyɛ, onkyam ãnzwel ke ywel, onkyam Muaan, kɛn a Taal ndyam. 37Ŋ'ekieel eya Muaan a mbuul, ãndɔɔ ãkieel ãbwel onge m'ébwel mɔ̃ me lio e Nowa. 38Ke ngwel wɛ, ŋ'ɛ̃kwel ye k'ebva mpel yi nɛn, baal ákedza bvool ákenywã, ákebaal bvool ákewa baan a bɔ k'ãbal, tiil tsoo li ésam Nowa onse ebɛɛ. 39Kɛn a bɔ, yi ékeyɛɛ bɔ yam pyɛ, tiil ye k'ebvi mpel yi enɛn, ebam baal bam bueel. Ekieel ekal emfa kiki me lio li ekieel eya Muaan a mbuul. 40Obobɔ, abɔɔl buaal b'akieel akal k'ãnguun, akieel abiri ngɔmɔ̃, akieel asiil wumɔ̃. 41Akaal buaal b'akieel akyɛɛl nsia, akieel abiri ngɔmɔ̃, akieel asiil wumɔ̃. 42Obobɔ, ekal angɔ-mwiĩ, ke ngwel wɛ byɛ k'eyɛɛ tsoo li ekieel eya Mfam a byɛ wɛ. 43Eyɛɛ ngesɛ bubu: Okɛɛn nga-nzɔ abeyɛɛ lio li eya mbuul a pfuul me tsia, ndɛ awal ɔ̃tsiil, bvool k'awa ndɛ nkuul yi abwel ndɛ nzɔ wɛ. 44Obɔ otsɛn bɛn, byɛ hɛ̃, ewal ɔ̃yɛɛl! Ke ngwel wɛ, byɛ k'eyɛɛ lio li èya Muaan a mbuul wɛ.»

Ɔ̃sal wu ɔ̃bi wuo ɔ̃bvɛ

(Luk 12.41-48)

45«Ɔ̃sal wa ye lweel bvool wa y'ãkaã wɛn mfam a ndɛ osuul ndɛ mbuul wu atal asal bakyɛ, kwɛn ndɛ awa bɔ bvi-odza me lio li ngesɛ, wɛn? 46Esɛ ol'ɔ̃sal ondɛ, wɛn ŋ'èyebvool mfam a ndɛ, àyebɔɔ ndɛ abesa ɔ̃sal m'emfa okyɛ! 47Taa-taa bam, mɛ̃ eyɛɛn byɛ wɛn, mfam àsuul ɔ̃sal ondɛ mbuul wu atal ãndɔɔ ã ndɛ mbueel. 48Kɛn a ŋɛn ndɛ oli ɔ̃sal wu ɔ̃bi wu ayɛɛn ndyam-a-ndyam ndiri: “Mfam a mɛ̃ kɛn ol'oyiil m'oya”, 49bvool obvi asal bakyɛ obɛɛl, obvi odza y'onywã ye baal b'ebebɔɔ mbal, 50obobɔ mfam a ndɛ àyebvool me tsoo lɛn ndɛ k'aketsam wɛ, bvool me lio lɛn ndɛ hɛ̃ k'ayɛɛ wɛ. 51Obobɔ, mfam àwa ndɛ etumbu kyam ki enɛn, bvool àsuul ndɛ onse nkel a baal a pfuru. Oyɔ mboo yi elel y'odza o miin.»

Currently Selected:

Matie 24: ngz

Highlight

Copy

Compare