Matie 2

Anga-ãyal ayetal Yeso

1Áburu Yeso ke Betelehem, ke nsie yi Yude, me lio li éli Elode ɔ̃kwɛn. Ke mbee a ŋ'aburu ndɛ, anga-ãyal afi etswi ki epal tal, ayi Yelusalem. 2Bɔ afuul ndiri: «Ɔ̃kwɛn a Ayuda wu aburu, kwɛn ali? Bee emwɛn ngam-a-ngam a ndɛ opal k'etswi ki epal tal, bee bu eyelweel ndɛ.» 3Ŋ'eyoo ɔ̃kwɛn Elode nsia oyɔ, ndɛ ebɔɔ e nsie edziɔɔn, ye baal bueel ba Yelusalem. 4Ndɛ otam k'abvool amfam b'angaa-a-Nziã y'ayiool b'ãngel bam bueel ba yam, me ndɔɔ yi afuul bɔ bubu: «Mboo mã yi aburu Mãsia?» 5Bɔ abveel ndɛ ndiri: «Ke Betelehem, ke nsie yi Yude. Ke ngwel wɛ, ɔ̃liaal-ɛ̃kiɛɛn a Nzian ákel bubu:

6“Yɛ wu Betelehem, ke nsie a Yude,

yɛ ke bvool mbee onse ãbviil m'ãnɛn mã nsie a Yude wɛ.

Ke ngwel wɛ, mfam wu akieel abiri Isalayel yam e mɛ̃ akieel afa ola yɛ#Mis 5.1”.»

7Obobɔ, Elode otam anga-ãyal mbel ota m'edziɔɔn. Ndɛ ofuul bɔ bubu: «Lio emã li epal ngam-a-ngam ondɛ?» 8Ke mbee oŋɔ̃, ndɛ oyuɔɔl bɔ Betelehem, y'ãyɛɛn m'ɔ̃nywã ndiri: «Eyi eyebii nsia a muaan wu ɔbwee ngesɛ-ngesɛ. Obobɔ, ŋ' emwɛn byɛ ndɛ, eya eyeyɛɛn mɛ̃, kwɛn mɛ̃ hɛ̃ ngyi ndɛ olweel.»

9Ke mbee a ŋ'eyoo anga-ãyal m'eyɛɛn ɔ̃kwɛn, bɔ ayɛn. Obobɔ, bɔ amwɛn ngam-a-ngam wu émwɛn bɔ k'etswi ki epal tal, ndɛ ákeyi ke nkwel a bɔ. Ndɛ atɔ ke ywel a nzɔ yi eli muaan, ndɛ otɛɛn. 10Ŋ'emwɛn bɔ kwɛn ngam-a-ngam otɛɛn oŋɔ̃, bɔ aluul m'esɛ ki enduru. 11Bɔ asam onse nzɔ, amwɛn muaan ye ngoo a ndɛ Mali. Bɔ abvi ãbuo ke nkwel a muaan, bu alweel ndɛ. Bɔ adzweel ãkab ã bɔ, bu awi ndɛ ãkab m'eluɔ bvi: Ɔɔl, y'ãnasi ye mbaal mã nswel yi mvɛ mã miil. 12Ke mbee oŋɔ̃, Nziã owi bɔ ãnkunkwa me nduaal kwɛn bɔ abee ol'Elode okɔɔl. Bɔ bu abvool ɔ̃kiri a bɔ me nkuul nkyam.

Dzodzef ye Mali bwɛn a muaan abal k'Edzipito

13Ŋ'eyɛn anga-ãyal, ãnzwel ã Mfam ãpal ola Dzodzef me nduaal, bu ãlieel ndɛ bubu: «Tɛɛn, wal muaan ye ngoo a ndɛ, bal k'Edzipito! Kal okɔ tiil lio li èliaal mɛ̃ yɛ wɛn kɔɔl, ke ngwel wɛ Elode àbii muaan wu abam.» 14Dzodzef otɛɛn, owel muaan ye ngoo a ndɛ, bu abal k'Edzipito me tsia. 15Ndɛ bu akal okɔ tiil k'ekwi Elode. M'emfa okyɛ, ãndɔɔ ãbwel m'emfa ki élieel Mfam m'ɔ̃nywã wu ɔ̃liaal-ɛ̃kiɛɛn a ndɛ ndiri: «Mɛ̃ nti muaan a mɛ̃ mbel k'apal onse Edzipito#Odz 2.11.»

Ɔ̃kwɛn Elode obam baan b'abɔɔl

16Ŋ'emwɛn Elode kwɛn anga-ãyal apfuru ndɛ, ndɛ oluul me mpuru fa. Ndɛ bu atam kwɛn ke Betelehem y'ãla m'ãnku-a-nkuu, abam baan b'abɔɔl bɛɛn b'aburu tu tiil b'ayii me mvel yuaal. Ndɛ osi obobɔ, ke ngwel wɛ ndɛ osiɔɔl ãtsoo fa lio li élieel anga-ãyal ndɛ tiil lio olɔ. 17M'emfa okyɛ, oyɛɛn obwel onge b'élieel ɔ̃liaal-ɛ̃kiɛɛn a Nziã Yelemi ndiri:

18«Ayoo nkii onse Lama,

elel y'ɛ̃nduɔɔl bibi ndiri:

Laswɛl mbuul wu alel baan a ndɛ,

ndɛ k'adzii kwɛn abweel ndɛ wɛ, ke ngwel wɛ bɔ bvool k'abekal wɛ.»#Dze 31.15

Dzodzef ye Mali bwɛn a muaan ambal k'Edzipito

19Ke mbee epfu li Elode, ãnzwel ã Mfam ãpal ola Dzodzef me nduaal k'Edzipito. 20Mɔ̃ bu ãlieel ndɛ bubu: «Tɛɛn, wal muaan ye ngoo a ndɛ, bvool k'ɔ̃kiri wu Isalayel, ke ngwel wɛ b'akebii muaan obam amaakwa.» 21Dzodzef otɛɛn, owel muaan ye ngoo a ndɛ, bu abvool k'ɔ̃kiri wu Isalayel. 22Kɛn a ŋ'eyoo ndɛ ndiri Akelahos oyii ɔ̃kwɛn a Yude ke mboo a tal a ndɛ Elode, ndɛ oyoo buɔ k'ayi okɔ. Nziã oyɛɛn ye ndɛ me nduaal, ndɛ bu ayɛn ke nsie yi Ngalile. 23Okɔ, ndɛ oyekal ke bviil ngemɔ̃ li ata me Nadzalet, kwɛn oŋɔ̃ asa ndɔɔ yi élieel aliaal-ɛ̃kiɛɛn a Nziã ndiri: «Akieel ata ndɛ m'ɔ̃fi-Nadzalet.»

Currently Selected:

Matie 2: ngz

Highlight

Copy

Compare