Luka 23
23
Yesu bala bängili Pilatu
(Matayo 27:1-2,11-14; Malako 15:1-5; Yoane 18:28-38)
1Fuä hä, limbasa abolo dundukä kiguali kindʉ na Yesu ku bala bängili Pilatu. 2Hõ i ada ni yò, i kitona kita ngbángá ko ninyã: «Ani nigbiã gi kʉmba le kʉ niguzä li gǎni abolo yò: kʉ nazã abolo ti tumä pákʉ fu bäkindä Aloma, kininyã tɨpa ko nitiko ya kʉ ni Masiya, ni bäkindä.» 3Pilatu kisana ko kinyã: «Mo, mʉ ni bäkindä Ayuda?» Yesu kikalaga ha fu ko ninyã: «Mʉ ima gʉmba ha ni tilo.» 4Pilatu kinyã tie fu agbiã abazomutumä na fu limbasa abolo ya: «Mi äbi ngä ndʉ ba ngbanga sã te ku lii gu kʉmba le.» 5Ono i kininyäkäsi fula ninyã: «Kʉ natutulã abolo sa zɨnga na gako yugä pai logo ngbiĩ Yudaya na ba ha. Kʉ atona ha lingala Galilaya yò, awele kʉ da na ni nò.»
Yesu bala bängili Elode
6Hõ Pilatu agĩ yo ni i nipe pa Galilaya, kʉ kisana yo si ngia gi kʉmba le angia mbe Galilaya. 7Fuä giã ko ho ngbäyo ya Yesu nayee logo gu lago Elode ǎzoga ha, Pilatu kikedi ko ku Elode yò. Bämbikä Elode adʉ kina Yelusalema yò ti ägu aulu le. 8Elode kiyǎbi Yesu, kʉ kidʉ na bakele ngbalago bämbikä kʉ ima tona nigĩ pa Yesu bakuluyò. Kʉ kinikpi nyämu käbi Yesu tɨpa Yesu mängi kpiapai fu ko kʉ bi he. 9Wele, Elode kisasana Yesu na badʉngu asana hẽ, ono ka Yesu akalaga nga pai sã ya. 10Agbiã abazomutumä wasã na abäyugu andikä adʉ kina hõ. I kinikiti ngbángá Yesu nyänyäki. 11Sidu Elode wasã na gako asuda kinipayäsi pa ko. Fuä sawia yo ko, Elode kivo ko na lokoo abäkindä, kikalaga ko koyò dʉ Pilatu ni. 12Ni kina gu ulu le, Elode na Pilatu nǎsoga tiyo asoga mbata, i kida ni abakʉle dagba yo.
Pa sala ngbanga Yesu sa kpio
(Matayo 27:15-26; Malako 15:6-15; Yoane 18:39–19:16)
13Pilatu kiyämbu agbiã abazomutumä, na agbiã wasã na gu kula abolo, 14kinyã fu yo: «Oni niyee na gi kʉmba fuä le kiniba pai ku lii ko ya kʉ naguzä li abolo yò. Mi sasana ko ku bängiloni, ono mi agbiã nga ndʉ ba ngbanga ku lii ko wasã te, pai sã te nga gu oni akɨta ngbángá ko tɨpa ha. 15Gbiã lingala Galilaya nga Elode â, kʉ agbiã nga ko na pai te bämbikä kʉ kalaga ko konò dʉ mi ni. Wele gi kʉmba le amanga nga pai sã te lẽ na kpio. 16Sidu, mi nikatako, fuä hä mi kizogo bete ko.» 17[Ti aulu Pasika ni basã sã, si anilengbe Pilatu zogo bete zizi bolo sã fu yo kamba yò.]#23:17 Gi velesi le zanga azanga logo gu kula bakulʉ Ziazia Kẽkẽ Apai i akẽ he ni bee. 18Ono limbasa abolo kitona ta ngbayo dundukä wasã ninyã: «Mʉ imi gi kʉmba le, kizogo bete Balabasi fu lani!» 19I abá Balabasi tie ku kámba yò bämbikä kʉ adʉ dagba ägu abolo nasamungu kuti Aloma vulu gbata hõ na bämbikä kʉ aimi bolo. 20Ono wa Pilatu ǎida kindi kazoga bete Yesu, kʉ kifʉla belewe fu limbasa abolo. 21Ono i kinita ngbäyo ninyã: «Mʉ́ bangá ko ku li wägiwägingwa! Mʉ́ bangá ko ku li wägiwägingwa!» 22Pilatu kisana yo ni biata ha kinyã: «Gini gbegbelẽ pai mängi ko? Mi äbi ngä gu gbegbelẽ pai nga gu mängi ko ho kʉ alẽ tini na kina kpio te. Mi nikata kina tata ko fuä hä mi kizogo bete ko.» 23Ono abolo kinita ngbäyo kindi ku ali gbẽ kinihõ hõ i imi ko ku lii wägiwägingwa. Gäyo tatangba kidi be Pilatu. 24Wele tie, Pilatu kiidi he si mängi wa gu abolo anakpi nyämu he. 25Kʉ kikusi gu kʉmba kusa kámba yò naso vʉla kuti Aloma kiimi bolo, kifʉ Yesu ku be asuda tɨpa í mängi gu pai na ko abolo ǎkpi nyämu he.
Pa banga Yesu ku li wägiwägingwa
(Matayo 27:32-44; Malako 15:21-32; Yoane 19:17-22)
26Hõ asuda ǎndʉ ni na Yesu, i kizi kʉmba sã nǎyägä gbalia yò limäko angia Simo ni mbe gu gbata nga Silene#23:26 Silene Si ni gbata sã logo gu ngbiĩ nga Libia Afilike nò.. I kimäĩ wägiwägingwa ngwa pagõko tɨpa kʉ tindi he ti fuä Yesu. 27Bakele limbasa abolo ǎpeka ko, wasã na gu kula adee nǎkpala kinisalawa tiyo asalawa tɨpa ko. 28Yesu kingele koyò dʉ yo ni kinyã fu yo: «Adee Yelusalema, ka oni kpäli ngä tɨpa le ya! Ono oni kpäli tɨpa loni na tɨpa äwililoni. 29Bämbikä, alegbo nikayee hõ i kanyã ni ya: ‹Ngbalago fu adee zangada, fu ägu adee avʉnga nga gudee ya, nâhãga nga gudee ya!› 30Ti gu legbo nga ha le, abolo atona ninyã fu abagangala: ‹Oni tiwi ku lii lani!› I aninyã fu agangala: ‹Oni kpisidi lani!#Osea 10:8.› 31Bämbikä, ka i mängi iwä ngwa wa gele, si adʉ tie waĩ tɨpa ugu ngwa?»
32Asuda andʉ â na kula akʉmba uwe ni kele abolo tɨpa ndʉ kaimä yo wasã na Yesu. 33Hõ i ada ni logo gu lago i ayamba ha «Kpängä li», i kibanga Yesu na näli ku lii wägiwägingwa ngwa wasã na kele akumba uwe, gu ko sã ku kʉmba be Yesu gu kula ko kʉ gale beko. 34Yesu kinyã: «Bʉba, mʉ vu yo ti gäyo ingapai bämbikä i ainä ngä gu pai i amanga ha te.» Asuda kiba zege#Abia Tambwahẽ 22:19. tɨpa kakpalaka gako lokoo. 35Abolo alundu hõ kinibi ägu apai nǎmanga. Ono tɨpa agbiã Ayuda, i kinisawia ko ninyã: «Kʉ abätäsi kula abolo. Ka si ngia Masiya nga ko, gu ko Mbäli asia ko, kʉ bätäsi tiko ni tiko!» 36Asuda kinisawia ko â. I kigbisi tɨpa kafʉ käkäĩ vino fu ko, 37ninyã fu ko: «Ka mʉ ngia bäkindä Ayuda ni lengo, mʉ bätäsi tilo ni tilo!» 38Kẽkẽpai adʉ â bäliko ya: «Gi ko le ni bäkindä Ayuda.»
39Gu ko sã dagba ägu kele akumba uwe i abángá ko lii wägiwägingwa ngwa wasã na Yesu kitona senga ko ninyã: «Anga Masiya nga mo te? Mʉ bätäsi tilo ke, kibätäsi lani â!» 40Ono gu kula kele kʉmba kizã ko kinyã: «Mʉ nagbiã mbusa wa kina ga gi kʉmba le, mʉ nǎgunde nga ti Mbäli tigamʉ te? 41Tɨpa lani, si ni lulu he i mbusi lani bämbikä ani nailä bape gu gbegbelẽ apai ani amängi he. Ono tɨpa gi kʉmba le, kʉ amanga nga gbegbelẽ pai sã te.» 42Fuä hä, kʉ kinyã: «Yesu, mʉ tingidi pale ti gu legbo mʉ kayee logo gamu Kindä.» 43Yesu kikalaga ha fu ko kinyã: «Mi nápe he folo ni lengo, aleme le, ani adʉ na mo wasã paladizo#23:43 paladizo: ni gu wene ba dʉ ku Mbäli yò ali yò. yò.»
Pa kpio Yesu ku lii wägiwägingwa ngwa
(Matayo 27:45-56; Malako 15:33-41; Yoane 19:25-30)
44Hõ si ada ni wa bebele ulu, bitimä kiti ku lii ngbiĩ na ba ha da kuti saa biata (3) ti fuä bebele ulu. 45Bitimä kiti ku kpäkpu ulu yò. Gu kpe lokoo nǎkpalaka zɨazɨa bá vulu bakele bämbu Mbäli ti bakele zɨazɨa bá kisili bebele he tona ali yò da ku sende. 46Yesu kita ngbako ku ali kinyã: «Bʉba, mi gäsi tolóle ku sabelo.»#Abia Tambwahẽ 31:6. Fuä pe ko gi fula le, Yesu kiʉka yangala ʉmeko. 47Hõ gbiã asuda Aloma äbi ägi apai dundukä namängi le, kʉ kitääsi limä Mbäli ninyã: «Ni lengo, gi kʉmba le angia lulu bolo.» 48Bakele limbasa abolo adʉngulã tiyo käbi gi pai nǎmanga le. Hõ bi yo ho ni, i kitagá kinizädi ngbäduyo be nʉnga. 49Agu abolo dundukä naini Yesu wasã na ägu adee nǎpeka fuä ko tona Galilaya yò, kilʉndu tutulũ nibi ägu apai nǎsʉsa.
Pa kpisidä Yesu
(Matayo 27:57-61; Malako 15:42-47; Yoane 19:38-42)
50Kʉmba sã adʉ yò limäko angia Yozefu. Kʉ adʉ ni bolo wenengbäduse ni lulu bolo â. 51Kʉ angia mbe gu gbata Ayuda nga Alimateo, kʉ ǎsungudä ga Mbäli Kindä. Kʉ anadʉ dagba abolo bakele londo Ayuda ono kʉ aida nga ägu apai i ambäkädi he na kimängi he te. 52Kʉ kindʉ koyò dʉ Pilatu ni, kihõ kángbá Yesu. 53Kʉ kizogo ho lii wägiwägingwa ngwa ku sende, kikäĩ he na bawene lokoo, kimäĩ he ku logo gu mulä i ambäkädi he ni siimbia. I amaã nga kpoto bolo ku logo ho mbata te. 54Si adʉ ni gu ulu abolo ǎmbakada tiyo, sabatu kinimbedi. 55Agu adee nǎpeka fuä Yesu tona Galilaya yò da ku Yelusalema yò kindʉ wasã na Yozefu ku mulä yò, i kibi waĩ i amäĩ kpoto Yesu ku logo ho. 56Fuä hä, i kiga ku kpuyo yò kambakada kpaĩ na bawene fuä amalasi tɨpa kangbako. Ti ulu sabatu i kiongodi â wa ga Ayuda andikä anyäkäsi he.
Currently Selected:
Luka 23: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
