Luka 2
2
Pa vʉnga Yesu
(Matayo 1:18-25)
1Ti gu legbo le, bäkindä Kaisala Agusito kikusi andikä ya i gedi abolo dundukä vulu ngbiĩ nga Loma. 2Bambata geda abolo nangia ha. Si amängi ti gu legbo gbiã nangia Kuilino adʉ lii lingala Silia. 3Abolo dundukä ǎndʉ tɨpa i kẽ limäyo, bolo na bolo ku logo gǎni ndikili gbata ni aenge ni. 4Yozefu â tigako kiguali logo gu gbata nga Nazaleta, nadʉ Galilaya yò. Kʉ kindʉ ku Yudaya yò, ku logo gu gbata nga Beteleme Davidi aenge ni bämbikä Yozefu nitiko angia ngbatʉnga Davidi. 5Kʉ kindʉ koyò tɨpa i kẽ limäko wasã na Malia, kʉ adɨka li. Li adʉ na vuse. 6I kitadʉ Beteleme yò, ulu vʉngu kida fu li. 7Li kivʉngu bambata wilili ni kʉmbagudee, kiwädi ko na lokoo, kipigi ko logo ga anya baliahẽ, bämbikä ba ǎdʉ nga tɨpa yo bämbu agino yò te.
Pa kʉla malaika sa abábanda anya
(Matayo 2:1-15)
8Abábanda akandolo adʉ â logo gu lingala le. I analaka nvuä yò tɨpa banda gäyo limbasa akandolo yʉlʉ. 9Ga Baɨla malaika sã kikulu ku bala bängiliyo. Ga Baɨla taälimä kinikĩ pati yo kilikili wa timalago. Bakele gunde kizi yo. 10Ono malaika kinyã fu yo: «Ka oni gunde nga ya, bämbikä mi nagʉmba wene pangbanga fu loni nikafʉ bakele ngbalago fu abolo dundukä. 11I vʉngu bätäsi fu loni aleme logo ga Davidi gbata, ko nga Kilisito ni Baɨla! 12Gele nga gu kpiapai oni kainä ko tini: Oni agbiã fogo gudee wädi yo ko na lokoo kipigi ko logo ga anya baliahẽ.»
13Nibasã, bakele limbasa amalaika ngbängbätulũ kigbiã tiyo kuti gu malaika le. I kinitambwa Mbäli ninyã:
14«Täälimä fu Mbäli du ngbängbätulũ ali yò,
Zeleda lii kpotosende fu ägu abolo kʉ akpi nyämu yo!»
Pa ndʉ abábanda anya ku Beteleme yò
15Hõ amalaika ǎguali ni pati yo kaga ku ngbängbätulũ yò, abábanda anya kifʉla dagba yo ninyã: «Ani ndʉ nga ku Beteleme yò käbi gu pai mängi, Baɨla nayugu he fu lani.» 16I kindʉ koyò ni ipä, kigbiã Malia, Yozefu na fogo gudee i apigi ko logo ga anya baliahẽ. 17Fuä bi yo gu fogo gudee le, i kigʉmba ägu apai i agĩ he lii pa gu gudee le. 18Ägu abolo dundukä nǎgiã ägu apai abábanda anya ǎgʉmba ha fu yo, si kiniiliwä ailiwä bängiliyo. 19Malia tigäli, li kinibanda ägi apai le dundukä ku ngbäduli yò, kiniwisigi he kindi. 20Fuä hä, abábanda anya kizi gene kaga. I kitataasa limä Mbäli kiniilisi ko tɨpa gu dundukä i agĩ he kibi he namängi â wa malaika agʉmba ha fu yo.
Pa yugä Yesu fu Mbäli Bakele Bämbu Mbäli yò
21Fuä gudee lengbesi aulu bisuẽ bäti biata (8), i kiyele ko kiyämbu limäko nga Yesu, gu limä malaika ayämbu he mbata fu nako dʉ na vuko.
22Fuä hä, aulu kilengbe fu Yozefu na Malia tɨpa gilisätise#2:22 Gilisätise: Ga Mose ändikä anaida ya dee gilisi tini ti fuä aulu biama bawe ti fuä vʉngu. Mʉ gedi â Alevi 12:2-6 wa ga Mose ändikä ǎida na ni. Wele, i kindʉ na Yesu ku Yelusalema yò tɨpa fʉ ko fu Baɨla. 23Bämbikä si ni kẽkẽ he wo logo ga Baɨla ändikä: «Bambata kumbagudee dundukä vʉngu yo ni adʉ ni kpalakpala ni fu Baɨla#Gate 13:2,12..» 24Malia na Yozefu andʉ ku Yelusalema yò â tɨpa fʉ mutumä wa ga Baɨla ändikä aida na ni: ambipo uwe watadu palanga agbungu uwe#Alevi 12:8..
25Kʉmba sã adʉ Yelusalema yò limäko angia Simeona. Lulu bolo nangia ko nanailisä Mbäli. Kʉ anasungudä Bätäsi Isalaele. Ziazia Toló adʉ wasã na ko. 26Ziazia Toló ayugu pai fu ko ya mbata fu kʉ kpi, kʉ äbi Masiya Baɨla akedi ko. 27Ziazia Toló kindʉ na Simeona ku Bakele Bämbu Mbäli yò. Wa avʉngu Yesu ǎndʉ na ko kalengbesa ägu apai tɨpa ko ändikä aida na ni, 28Simeona kidi ko ku beko kiilisi limä Mbäli ninyã:
29«Baɨla, awele, mʉ lengbe kambu gamʉ bolosʉnge
kʉ ndʉ na zeleda wa mʉ ape he.
30Bämbikä mi bi gu Bätäsi kedi mo ko ni bängile.
31Gu Bätäsi mʉ akedi ko fu ngbatʉnga abolo dundukä:
32Kʉ nga timalago nikayugä palo fu ägu abolo angia nga Ayuda ya
Kʉ afʉ täälimä fu gamʉ abolo nga Isalaele#Isaya 42:6; 49:6; 52:10..»
Pa gʉmba Simeona pai wa näbi
33Ngba avʉngu Yesu ǎzela azela be ägu apai Simeona ǎgʉmba ha lii pa ko. 34Simeona kifʉ makʉ fu yo kinyã fu Malia nga na Yesu: «Mʉ ngele, gi gudee le amá mbulu pa tigo dʉngu abolo na pa tumba dʉngu yo dagba Aisalaele. Kʉ adʉ ni kpiapai nikakusa kango gbe. 35Wele kʉ akʉsa ägu abelã dʉ ku ngbädu dʉngu abolo yò gbayaga. Mo tigamʉ, egetele akola ngbädulo wa basape.»
Pa näbi ni dee nangia Ana
36Näbi sã ni dee adʉ yò â limäli angia Ana ni wili Fanuele. Fanuele adʉ logo ngbatʉnga Asele. Li adʉ ni gbinzali gbẽ. Li amängi agãlã bisuẽ bäti uwe (7) na kumbäli li adi ko li dʉ ni ngasʉdee. 37Fuä hä, li adá ni däkulugbä, li adá na agãlã bisuẽ bäti biata bawe na biama (84). Li anakata nga Bakele Bämbu Mbäli yò te. Li anailisä Mbäli ulu na yʉlʉ logo ginä hẽ na kpala fu Mbäli. 38Ti kina gu legbo le, li kida â tigäli. Li kiza nitambwa Mbäli, nipe pa Yesu fu ägu abolo dundukä nǎsungudä Mbäli kusi Yelusalema tii zogo.
Pa sona Yesu Nazaleta yò
39Fuä manga yo ägu apai dundukä ga Baɨla ändikä ǎida na ni, avʉngu Yesu kikalaga tiyo ku Galilaya yò ku logo gäyo gbata nga Nazaleta. 40Gudee nga Yesu tigako, kʉ ǎsona ninyäki. Kʉ ǎhĩ na tatamana, ga Mbäli wenenyämuse adʉ wasã na ko.
Yesu na agãlã bawe na uwe (12) Bakele Bämbu Mbäli yò
41Avʉngu Yesu anandʉ vulu agalã dundukä ku Yelusalema yò tɨpa pumbä nga ga Pasika#2:41 Pasika: Gu pumbä Ayuda anatingida gu ulu i akʉlʉ Ezipeto yò tii sunge kanga. Gate 12:21-27.. 42Hõ Yesu ada ni na agãlã bawe na uwe (12), i kindʉ koyo tɨpa pumbä Pasika â wa sinäyo adʉ. 43Fuä nyasa pumbä, i kisa tiyo kaga. Ono gudee nga Yesu kinye Yelusalema yò zanga avʉngʉko ini he. 44I ǎbelã ha ya Yesu adʉ dagba ägu abolo i ǎndʉ ndʉge na yo wasã. Wele, i kimängi ulu sã na ndʉge. Fuä hä, i kitona gbata ko dagba agʉmeyo na dagba ägu abolo i aini yo. 45Ono ka i agbiã nga ko ya. I kikalaga tiyo ku Yelusalema yò nigbata ko. 46Ti fuä aulu biata, i kigbiã ko Bakele Bämbu Mbäli yò. Kʉ asungu dagba abäyugu andikä, kitagiã yo nisasana yo. 47Gako bĩlĩ na gako akalaga pai kiniiliwä bängili ägu abolo dundukä nǎgiã ko. 48Bako na nako kiyǎbi ko, ngbäyo kizele. Nako kinyã fu ko: «Soo wile! Gini pai nga gi mängi mo lani na ni le? Mʉ bi, mi na bamʉ, ani gbata lo na bakele bakabängilise.» 49Kʉ kikalaga ha fu yo kinyã: «Oni nǎgbata le tɨpa gine? Oni ainä ngä hä ya si naida mi dʉ dimä ku Bʉba yò te?» 50Ono, yo tigäyo, ka i aluga nga tiyo na gu pai kʉ ǎgʉmba ha fu yo ya.
51Fuä hä, Yesu kiguali kiga wasã na yo ku Nazaleta yò. Kʉ kiniilisi yo. Nako kinibanda ägi apai le dundukä ku ngbäduli yò. 52Wele, Yesu kinisono kiningãlã logo tatamana, pako kiningba ti Mbäli na ti abolo ni ba sã sã.
Currently Selected:
Luka 2: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
