Luka 1
1
Ndʉ kẽ gi wene pangbanga le
1Teofile nga ili ili bolo, dʉngu abolo amängi ʉme kakẽka pangbanga ägu apai namängi dagba lani. 2I akẽkẽ he teketeke â wa ägu abolo nangɨa adezilee he enga ti tona tona ha atangalã hã fu lani. Agu adezilee le náda ni abatʉngusi sangba Mbäli. 3Sidu, fuä luga mi tile nzunzu na ägu apai dundukä namängi enga ti tona tona ha, mi äbi he â tigimi ya ngba ha angba mi kẽ he akẽ folo silisili, 4tɨpa mʉ ini ndikili lengo lii ägu apai i ayugu he folo.
Pa pe pa vʉnga Yoane Babatiza
5Ti gu legbo Elode adʉ ni bäkindä lii ngbiĩ Yudaya, bazomutumä sã adʉ yò limäko angɨa Zakalia nadʉ́ logo ga Abiya liigbuu abazomutumä. Limä dia Zakalia nangɨa Alizabeti ni ngbatʉnga gu bakele bazomutumä nangɨa Alona. 6I ti bala yo uwe dundukä adʉ ni lulu abolo bängili Mbäli, kiniilisi ga Baɨla andikä dundukä zukazuka gbiã kuti gako alugute. 7Ono i ǎvʉnga nga gudee te bämbikä Alizabeti adʉ́ ni dee zangada. I dundukä uwe aima gbinza gbẽ.
8Ulu sã, Zakalia ǎmanga gako sʉnge bazomutumä bala bängili Mbäli wa legbo adá fu gako liigbuu kamanga ha. 9I kiba azege â wa sinä abazomutumä anidʉ, kisia Zakalia tɨpa kʉ́ limi kazo bandele logo ziazia bá vulu ga Baɨla Bakele Bämbu Mbäli yò. 10Ti legbo zo bandele, limbasa abolo dundukä adʉ́ zägi yò nikpäli fu Mbäli. 11Nibasã, ga Baɨla malaika kikʉlu fu ko, kilu pati bázobandele ku kʉmbabe. 12Zakalia kiyǎbi malaika, kʉ kizigbä, gʉnde kizi ko. 13Ono malaika kinyã fu ko: «Zakalia, ka mʉ gʉnde nga ya bämbikä Mbäli ima giã gǎ kpala kpẽ. Dialo nga Alizabeti avʉnga kʉmbagudee folo, mʉ ayamba limäko nga Yoane. 14Mʉ adʉ na bakele ngbalago lii pako, dʉngu abolo adʉ na ngbalago lii pa vʉnga ko. 15Bämbikä kʉ adʉ ni nyänyäki pa bolo bängili Baɨla. Kʉ ambila nga ngbĩngbĩ vino singɨa ngbĩngbĩ buda wasã te. Tona kina vulu nako yò, kʉ ahĩ na Ziazia Toló. 16Kʉ agasa ngbädu dʉngu äwili Isalaele belewe fuä Baɨla nga gäyo Mbäli. 17Kʉ apela mbata fu yée Baɨla. Kʉ adʉ na ga Ziazia Toló tändu wa näbi Elia tɨpa gasa nyämuse belewe dagba abaägudee na äwiliyo, kasá abolo keletu sa lulu belã. Wele, kʉ ambakada ngbatʉnga ägu abolo nikaida pa Baɨla.» 18Ono Zakalia kinyã fu malaika: «Mi ainä hä tie waĩ ya lengo du? Bämbikä mi tigimi, mi ima gbinza, diale â li ima dopota.» 19Malaika kikalaga ha fu ko kinyã: «Mi du nga Gabiliele, ninâlu bala bängili Mbäli. Mbäli kedi le tɨpa kafʉla na mo na kape gi wene pangbanga le folo. 20Ono mʉ nǎida nga ägu apai pe mi folo te nga gu nikalengbesa tihe ti gaha legbo. Wele mʉ nikadá ni ongokĩ zanga fula da ku hõ ägi apai le nikamanga ni.»
21Ti gu legbo le, limbasa abolo ǎsungudä Zakalia. Si kinikpakala akpakala bängiliyo käbi he ya kʉ ǎimá ku logo ga Baɨla ziazia bá. 22Hõ kʉlu ko ni, ka kʉ alengba nga kafʉla na yo ya. Wele, i kiini he ya kʉ aima bi bibipai logo ziazia bá yò. Kʉ kinilẽkẽ kina lẽka apai fu yo na abeko zanga lengba kafʉla.
23Fuä nyasa ko gako legbo sʉnge, kʉ kiga ku kpʉko yò. 24Fuä bete legbo, dia Zakalia nangɨá Alizabeti kidi vuse. Li kiõkõ tili vulu adiwi bisuẽ. Li ǎnyã ni tili: 25«Gule nga ga Baɨla manga pai fele ti gu legbo kʉ nayugu gako undähẽ fele kanyasa gu nǎfʉ zẽ fele bängili abolo.»
Pa pe pa vʉnga Yesu
26Vulu bisuẽ bäti sã diwi yò fuä Alizabeti dɨ vuse, Mbäli kikedi malaika nga Gabiliele ku logo gbata sã limä hä angia Nazaleta lingala Galilaya yò. 27Mbäli akedi gu malaika le fuä ngasʉdee sã i adiká li fu kʉmba limäko angɨá Yozefu ni ngbatʉnga Davidi. Limä gu ngasʉdee le nangɨá Malia. 28Malaika kilimi fuä li kinyã fu li: «Sene Malia, mo Mbäli ayugu gako wenenyämuse folo, Baɨla wasã na mo.» 29Li kiyǎgĩ gi fula le, li kida ni fudi fudi li gbẽ nisana tili nga gi likä paa ti bolo le nápe gini pai. 30Malaika kinyã fu li: «Ka mʉ gunde nga ya Malia, bämbikä mʉ gbiã wenenyämuse be Mbäli. 31Mʉ ngele, mʉ nikadia vuse, mʉ avʉnga kumbagudee sã kiyämbu limäko nga Yesu. 32Kʉ adʉ́ ni nyänyäki pa bolo, i aniyämbu ko Wili gu Mbäli Dʉ Lii Apai Dundukä. Mbäli Baɨla afʉ́ mbatã abäkindä fu ko â wa titako nangia Davidi. 33Kʉ azoga ngbatʉnga Yakobo tɨpa kindi. Gako pabäkindä anye anye kindi.» 34Ono Malia kinyã fu malaika: «Mi alʉ waĩ kadia vuse wa dʉ mi ni ngasʉdee?» 35Malaika kikalaga ha fu li kinyã:
«Ziazia Toló adʉ́ na mo,
tändu nga ga gu Mbäli Dʉ Lii Apai Dundukä adada lo.
Sidu, gu gudee mʉ kavʉnga lu adʉ ni zɨazɨa lu, i ayamba lu â Wili Mbäli.
36Mʉ ngele, Alizabeti â ti gäli nga gumelo ima dia vuse ngba gbinzali. Li avʉnga kumbagudee. Li awele vulu bisuẽ bäti sã diwi yò, ono i anayamba li dee zangada. 37Bämbikä pai sã te susi ʉme Mbäli.» 38Wele tie Malia kinyã: «Mi gi dʉ le nga ga Baɨla kanga. Sí mängi fele â wa gʉmba mo ho!» Fuä hä, malaika kiguali pati li.
Pa ndʉ käbi Alizabeti
39Ti kina ägu äulu le, Malia kindʉ ni ipä ku logo gbata abagangala sã lingala Yuda yò. 40Li kilimi ku Zakalia yò kipäyi ti Alizabeti. 41Hõ Alizabeti agĩ ga Malia sene ni, gudee kiwo lukuluku ku vulu Alizabeti yò. Alizabeti kihĩ na Ziazia Toló. 42Li kita ngbäli nyänyäkĩ kinyã: «Bolo makʉ nga mo susi adee dundukä. Wilo du vulo yò ni bolo makʉ â. 43Da nga mi ka navʉngu Baɨlale yée käbi le? 44Bämbikä hõ gǎ sene niti ni ku tule yò, gudee niwo lukuluku be ngbalago ku vule yò. 45Ngbalago folo mbikä mʉ mäĩ gǎ idapase ya gu pai Baɨla ape he folo alengbesa tihe alengbesa!»
Ga Malia bia tambwahẽ
46Wele Malia kinyã:
«Mbisimäle nailisä Baɨla,
47Ngbädule yo hi na bakele ngbalago kango Mbäli nga gǐ Bätäsi,
48Bämbikä kʉ ngele ku lii pa gako tâta deesʉnge.
Ni lengo, enga aleme kandʉ ku mbata yò abolo dundukä ǎninyã dee ngbalago nga mi.
49Bämbikä Mbäli nga Ɨla Tändu Dundukä mängi bäkindigi apai fele.
Limäko ni Ziazia ha.
50Gako wenelingise nayugä tihe ti alegbo dundukä
Ku lii ägu yo ninâgʉnde tiko.
51Kʉ yugu gako tändu dundukä
Kʉ gbataka aɨla lukä.
52Kʉ sikä aɨla tändu lii gäyo mbatã abäkindä ku sayò,
Ono kʉ kitʉmba pa tâta abolo ku ali,
53Agu abolo nǎkpi gomolõ, kʉ kilengbesi yo na ahẽ,
Ono abolo kumukä, kʉ kidändi yo ni ku beyo.
54Kʉ undä Isalaele nga gako bolosʉnge
Kʉ atada nga gako wenelingise te
55Wa kʉ apé he fu atɨtalani
Fu Abalahama gbiã kuti ngbatʉngako tɨpa kindi.»
56Malia kiläki ku Alizabeti yò ku vulu adiwi wa biata, fuä hä li kikalaga tili ku kpuli yò.
Pa vʉnga Yoane Babatiza
57Legbo tɨpa Alizabeti vʉngu kida, li kivʉngu kumbagudee. 58Gäli amulakpolo na agʉmeli kigĩ he nga Baɨla ayugu gako wenelingise fu li, i kidʉ logo ngbalago na li. 59Hõ fogo gudee alengbesi aulu bisuẽ bäti biata ni (8), i kindʉ kayela ko. I aidi kayamba kina limä bako nga Zakalia ku lii ko. 60Ono nako kituka ngbäli kinyã: «Aii, limäko nikangɨa Yoane.» 61I kinyã fu li: «Bolo ngbatʉngalo yò sã te dʉ́ na gu limä le.» 62Wele, i kilẽkẽ apai fu ba gudee na bee kainä gini limä kʉ aidi kafʉ he ku lii wiliko. 63Zakalia kihõ tǒni kpakakpaka palangi kikẽ he lii he ya: «Limäko nga Yoane.» Iliwä apai kiti tiyo dundukä. 64Nibasã, kʉ kilengbe belewe kafʉla. Kʉ kiza kafʉla, kiniilisi Mbäli. 65Kíki kiti ti abolo gu lingálá le dundukä. Logo lingálá abagangala nga Yudaya dundukä abolo kinitangalã ägi apai le dundukä dagba yo. 66Ägu abolo dundukä nágĩ ägi apangbanga le kinisäkinä hä nisana tiyo ninyã: «Gi gudee le adʉ ti gako ni gini likä pa bolo?» Bämbikä ga Baɨla tändu adʉ́ wasã na ko.
Ga Zakalia bia
67Zakalia nangɨá ba gudee kihĩ na ga Ziazia Toló tändu kifʉla wa näbi ninyã:
68«Ilisä dʉ fu Baɨla nga gu Mbäli Isalaele nailisä ko,
bämbikä kʉ yée kaundä gako abolo, kʉ kusi yo â tii zogo.
69Kʉ kusi tändu batasa fu lani
logo ngbatʉnga gako bolosʉnge nga Davidi.
70Si nga gu pai kʉ amäĩ he ngba gako zɨazɨa anäbi nadʉ mbatá i kipe he
71ya kʉ abatasa lani abatasa be avʉlalani,
du â ni asogo lani.#Abia Tambwahẽ 106:10.
72Kʉ ayugu gako wenelingise fu atɨtalani
kitingidi pa gako zɨazɨa muzʉnga,
73nga gu kidähẽ kʉ amängi he fu Abalahama nga titalani
ya kʉ afʉ pai fu lani nga:
74Fuä gbe ko lani be avʉlalani,
ani alengba kailisä ko zanga gunde.
75Ani kidʉ ni zɨazɨa lani ni lulu lani â
bala bängiliko logo gǎni bata na ba ha.
76Mo ti gamʉ, wili gudee, i ayamba lo näbi nga ga gu Mbäli Dʉ Lii Apai Dundukä
Bämbikä mʉ apela mbatayò fu Baɨla tɨpa mbakada gako gene.
77Mʉ ayugä hä fu gako abolo ya kʉ abatasa yo abatasa
wa kʉ kavu yo ti gäyo ingapai.
78Bämbikä gǎni Mbäli ni ɨla wenelingise â
Sidu, hãlago ayee tini ali yò#1:78 hãlago ayee tini ali yòGi yee ulu le nápe pa yee Masiya nga Bätäsi (Malakia 3:2). fu lani,
79tɨpa fʉ hã lago fu ägu yo dundukä dʉ logo bitimä, du logo kilimä kpio,
tɨpa nungusa lani ngba gene zeleda.»
80Gudee ti gako, kʉ ǎsona ninyäki logo tolo yò â. Kʉ ǎlaka ngbäkungbä yò da ku hõ kʉ akʉlʉ ni gbayaga ku bala bängili awili Isalaele.
Currently Selected:
Luka 1: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
