Afyilibyiyi 2
2
Kirisiti tukwogba shnashna
1Ntucenu ngye fye kwu bwugbakaládna ɓwa ntu n əfye yeyeɓədo ɓo n Kirisitii, ngye bwugbafu ho lo n kwo gbmi n əwo yeye, ngye ɓwadodna ho lo dna n Zafnu, ngye ədu-tnakalákpei nya ho lo ǹ snusnuwnai, 2akpəge, fye zhni əmi agbmada ɓa kwu nu, fye kwu zhi n abwugbai fyi ngye aje, fyei wu yeye gbmanyigbmanyi, fya kwu zhni gbmanyi fyi n zafnu jesnu n bwugbai. 3Fye to zhni ɓəho dna n gnahohni bwugbaɓəye nya kwo fyi n tukwomwa gbəloi m. Dna n əkwoɓwi, dna n tukwogba, fye gye azaje n apmai n du əfyehni, 4to fyei shi əfyehni aɓəwyeda nu awye m, ama zahozahoyi n fye mi, wo shi əwo azaje aɓəwyeda nu awye.
5Fyi n əfye tagyiaje, fye la bwugbadna gbmanyigbmanyi ɓwa ngye Kirisiti Yeisu nya:
6Əwo, dna n əwo nyinyì, wo ɓə zhni Shekwoyi nu,
ama to wa zhninubwo ge gye wo snulo dəidəi n Shekwoyii m, kwo nge əɓo nu n wo ɓa zhniapma n kwoi ntu əwohni gyiba ɓo m;
7n əkwoɓwi, waa əwohni zè wo to zhni nyaho nu m,
wa la fyenu nyinyì nu waa shi,
ntuge a ɓə n woi zhni dna n zanyikwoci dogbe nu.
8Shi wo ɓə gye əwohni tukwo dna n nayi ngye zanyikwoci,
waa əwohni tukwo gbà
wa əwohni ga əfyí,
əfyí tu n znudu!
9Ntucenu Shekwoyi ɓə la wo latu tu n aba asnada duduyi
jesnu waa əye ga wo n kwo du əye dəhodəhoi,
10nge dna n Yeisu əye, nyikwutukwo dəhodəhoi ɓə ceakwokwo
dna n əshemi, n əknyii ɓədo n əknyi snutai,
11jesnu nyitala dəhodəhoi ɓə da nge Yeisu Kirisiti zhni Dagayi nu,
kwa ɓe Shekwoyi Dada n latui.
Zhni ɓəhoɓəhoi ntna gwnunugwnunu
12Ntucenu, əmi anugwnudo ayeyei, ngye shi fye shni ɓəgbetu vyilo ciici nyi, toge n ɓwasnu n əmi awyeba m, ama nsaiye fye zhni tnutnu n dudu ɓo, n əmi avnuzè. Fye gwodu fya zhni əfye gnyignyi tnutnu n ədnai ɓədo n vnyivnyii, 13ntuge Shekwoyi nu zhni tnutnu fyi n əfye, nabai fya ye jesnu fya zhni kwo kwa nu əwo ɓəmwi manai.
14Fye zhni ɓəhoɓəhoi ntna gwnunugwnunu kwo aɓənakpeaje, 15nabai n fye ɓa kwu zè atnaɓətuyi jesnu atnadodnai, “Shekwoyi aɓyi ntna abwi fyi n cala knaknayi n əkpí nyai.” Nlonu fye ɓə bmyana fyi n əɓa atasni ngye akpasi kpe n anyìbmana, 16shi fye kwu ɓədagbma wyewyeyi nya shiɓwa kamkam. Nlonu n mi ɓə myi ma gyigbe dna n Kirisiti nyipyei nge mi to ɓə znazna kwo mi ɓə zhni tnutnu gbəloi nu m. 17Ama kwo ngye agnyi ai zè mi ya zhi n əknyi nu, ngye nyaga snísníyi kpe n əfye nyagbmi n tnutnui n kwo kwnu n əfye gaiciyaga, agbmada mi lo jesnu mi ɓə nya agbmada n fyei vnyanya. 18Ntulonu əfyehni ce, a da fye jesnu fya nya agbmada n kwnusnu n mii.
Timwoti n Epafroditusii
19Mi n awyetui lo dna n Dagayi Yeisu, ma tnu fye n Timwotii wolowolo, nabai əmihni ce mi ɓə wo agbmada she mi ɓə wo əfye nabagyi. 20Mi to n zahoi shnasnu lo ngye əwo, n wo ɓa zewye gaiciya nya shi fye ntu n əfye aknawna ɓo m. 21Ntuge zahozahoyi shi əwohni tukwo gyiba nu awye, toge adəyi n ɓa zhni Yeisu Kirisiti anya m. 22Ama fye kpəlo nge Timwoti wo la əwohni tukwo gbmiwu, ntuge ngye nugwnu n kwnusnu n əwo dadai, wo kwu nabagyi manai tnutnu kwnuzhni n mii. 23Ntucenu, mi n awyetui lo ma tnu n woi wolowolo, shi ma gye aɓo ɓai lo mi n wu. 24Mi n agwumyii lo dna n Dagayi nge əmihni ɓe lo wolowolo.
25Ama mi zhninubwo lo nge, kwo zhni ɓəshishi nu ma tnu fye n Epafroditusii, əmizado, tnutnu kwnuzhniyi jesnu əmi okwnusnuyi ədo, n wo je əfye tnutnuyi nu zhni, n fye ɓə tnu n woi wa bma mi zhni nyi. 26Ntuge əfye awye kwo wo lo əfye vnyanya jesnu wo dnalo n bwugbazhii, ntuge fye ɓə kwu wo nge nyasna ɓə kwu sna wo. 27Ɓəhnihni nyasna ɓə kwu sna wo, kwo ɓə ɓwace cewyi nu wa fyí. Ama Shekwoyi ɓə kwu wo gye snusnu, toge əwo gbmanyi m, ama n əmii ɓədo, nabai wa gnyi mi ya n bwugbawnu kpeaje. 28Ntucenu, mi dnalo n wyenyii n mwa ma tnu n woi, nabai nge she fye je wo wyegye, a ɓə da fye agbma jesnu kwo ɓə ce mi aɓəsa bmà. 29Ntulonu, fye gwo wo dna n Dagayi n agbmada yaakwoi, fye ga aza ye pya mwamwa, 30ntuge kwo ɓə ɓwace cewyi nu wa fyí ntu Kirisiti tnutnu ɓo. Wo ɓə ye wa ɓwi əwohni wyewyeyi nuwna ntu bmazhni ɓo n fye to ɓə myi fya ga mi nyi m.
Currently Selected:
Afyilibyiyi 2: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.