Agalatiyi 5
5
Loloya dna n Kirisiti
1Ntu n gnyignyi ɓo nu n Kirisiti wo la yi loya. Nlonu, fye kwu myizhi, fye to ye ge a je fye dufyi n shnawo n korogbma fyenu nya m.
2Fye kwu əmi aɓədagbma wnakna! Əmi Bwulus nu gna fye nge, ndei n fya ye ge a la fye znunya, Kirisiti taa shnasnu n apmai n əfye aba m, kpeekpe. 3Njesnu mi gna zahozahoyi n wa fa əwohni tukwo aa wo znunya, kwo zhni ɓəshishi nu ge, wa shi owa əɓwa vnyanya. 4Əfye n fye zhi fyei ye ge fya ɓwa ɓəgyikpmaya n owai nyi, a la fye ceya n Kirisiti; jesnu fye la kwnuya n Shekwoyi shebmyashi. 5Ntuge dna n Zafnu nu n yi fafazhi yii pmi n gaiciyagai, ɓəfyecezhni n yi n əwyei tu n kwo nyi. 6Ntuge dna n Kirisiti Yeisu, nyaznu kwo tnanyaznu, kwo to n apmai lo m. Əɓo kpokəloi ɓwashii əkwo nu zhni gaiciyaga ń kwo wu əkwohni dna n yeye nyi.
7Fye ɓə zhni fyei znazna manai. Nyikanu n kwu aɓo gbmi fye aje woi zhni to fyei shna gaiciyanunui ɓwashi m ma a? 8Aɓwatna ye pya kwo ta gbmi n əza aba nu n wa yì fye nyi m. 9“Yisti ɓyiyi zhni kwa gnamyi fyi n biledi mimii kwa zhni kwo kwaa snu vnyanya.” 10Mi n agwui myimyiilo dna n Dagayi nge fye taa zhni ɓənubwo n zokwo ədo m. Əza n wo gnyi woi dna fye n abaɓwi nyi, kwo woi zhni nyika nu a, wo ɓə gwo əkwo tata. 11Əmi azaje n amapwuyii, ndei mi ɓə ye gnyi mii zhni waazi nyaznu nya nu, knyiyi nu zhni ai ye wu mi awyesnugbegye ɓo a? N kwa wu nlonu, akpəge a la znudu abwi gbmiya nu. 12Ama aza yi n ɓa lá gbuzui kala gnyi nyi, a wo mi lo ngye ɓa lo ɓəə kwu əɓahni nu wu əɓwa!
Anyìgyi dna n Zafnu
13Əfye, əmi azaje n amapwii, a ɓə yi fye fya ɓwa loloya nu. Ama fye to zhniapma n əfye loloyai fya lofyi n anyìgyi nayi nya m; n əkwoɓwi, fye zhni tnutnu ga aje dna n tukwogba n yeyei. 14Ntuge owa vnyanya ɓwa nunu dna n ɓəgbetu gbmanyi ye ɓwashi nu, n kwo gna, “Ye n əho kwnuzhiyii ngye əhohni tukwo.” 15N fya gyiaje n anyiknai jesnu, fyei sa aje ya, fye zhni pəceye, ntolonu m, fye ɓa wu aje aɓwa jesnu fya zhni əfyehni agbma.
16Ntulonu, mi gna fye, nge fye znazna fyi n Zafnu, nlonu fye taa nu nayi aɓəmwi m. 17Ntuge nayi aɓəmwi ɓa gnyiapaapa n Zafnu nyai, jesnu Zafnu nya gnyiapaapa n nayi nyai. Ɓa zhi n gwnukpeaje nu, nabai n fye taa myi fya zhni ɓəhoɓəhoi n fye ncei pma m. 18Ama ngye Zafnu nu dna ho n zokwo, ho to dnalo n owa snuta m.
19Nayi atnutnu ɓa wu ɓahni pəipəi: asisiɓozhni, aɓoajegbmi, nayi shakpe, 20ashnagba, agwuzhenyigye, nuwnu, ajegna, shewo, minagyinapyei, gnahohni bwugbaɓəye, anyàwu, ajegnayanakwui, 21n bmyibmyi; nyasnisni, adokwowyefna n adoi n ɓa ce nyi. Mi kwnù fye nu, ngye she mi ɓə shni fye kwnù nyi, nge aza yi n ɓa gyianyì n wu nlai, ɓa to ɓə lofyi n Shekwoyi əbemi m.
22Ama nyagyigyi Zafnu nya nu nyi; yeye, agbmada, bwugbafu, bwugbaɓwa, ɓwaloya, ɓəmanaizhni, ɓəgbenuzhni, 23ɓəzhni pəceye n tukwownai. Owa to lo ntu n aɓo ye pya aɓo m! 24Aza yi n ɓa zhni Kirisiti Yeisu anya, ɓa kwu əɓa nayi znudu ɓədo n əkwo aɓəpwawoi n əkwo aɓəmwii. 25Shikwonyi yi gyianyì n Zafnu akalái nu, fa ya vyi Zafnu ɓəwu. 26Yi to kwu zè atukwomwayi, kwo ya fyi aje minagyi, kwo ya woshe n ajei m.
Currently Selected:
Agalatiyi 5: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.