Agalatiyi 1
1
1Bwulus, tnutnuloyi; aza nu to ɓə tnu mi tnutnu kwo ge zanyikwoci ho m, ama Yeisu Kirisiti nu ɓə tnu mi, ǹ Shekwoyi Dadai ń wo ɓə lá Yeisu kala n əfyí nyi. 2Ɓədo n əmi azajei vnyanya, azanugbai n anyikwozai n ɓa kwnusnu lo n əmii nyi.
Kwoi lo da aikilisiya n ɓa fyi ń Galatiya nyi.
3Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii. 4N wo ɓə ga əwohni tukwo ntu əyi aleifyi ɓo ntuge wa gnyi yi ya ń cala nukwoi ye kwoi vyi Shekwoyi əyi Dada ɓəye. 5Latu zhni əwo nya nu nyalonyalo. Aamyi.
Nabagyi manai ədo to shnasnu lo m
6Ce wo mi lo shi fye pye n avnu pmyiwu n əza aba n wo ɓə yi fye nge fya gyianyì fyi n Kirisiti shebmyashi, ama fyei pmyiawye wulo nabagyi manai ədo nu gbowo, 7ɓəhnihnii kwo to zhni nabagyi manai nu m, kpeekpe. Kwo wulo pəipəi nge azaho nu fyi fye ń ajegbmi jesnu ɓai zhni she ɓa ɓá myi nabai ɓaa Kirisiti nabagyi manai pmyibma. 8Ama kwo əyi kwo maləka n wa gbmiɓe ń əshemi waa zhni waazi nabagyi manai ədo nya, gbowo n ədoi ń yi ɓə zhni nyi, Shekwoyi knyitu ɓa vyi wo! 9Ngye shi yi kwu shnida nyi, ntulonu nsaiye mi je da: Ngye əzaho zhni fye waazi ədo lo gbowo n ədoi ń fye ɓə gwo nyi, Shekwoyi knyitu kwo la tu ń wo tukwo!
10Mi gnyi nsaiye mii ye azanyikwoci nu ɓa da mi əɓo manai kwo Shekwoyi a? Kwo mi ye əmi ɓo kwa da aza nu a? Ngye mi ye gnyi mii ye əmi əɓo nu kwa da aza, to mi ye zhni Kirisiti tnutnuyi nu m.
Shekwoyi nu ɓə yi Bwulus
11Mi ncei pmalo fya kpe, əmi azaje azanugbai n anyikwozai, nge nabagyi manai waazi n mi ɓə zhni nyi əkwo əɓo ta pá n zanyikwoci aba nu m. 12Mi to ɓə gwo kwo n zanyikwoci akwnu nu kwo nge a ɓə wu mi kwo wuwu m; ama mi ɓə gwo kwo dna n ɓəwyegye nu n Yeisu Kirisiti akwnu.
13Ntuge fye kwu əmi anyìgyi saapa nya ɓo wo dna n Ayahudiyi kwnunu, ngye shi mi ɓə wu ikilisiya Shekwoyi nya awyesnugbegye ɓo n əwyei bmyibmyi, jesnu ma zhni shi mi ɓa myi ma zhni kwo agbma. 14Mi ɓə dna mii mwa dna n Ayahudiyi kwnunu n du əmi ashala bəgyé jesnu n əwyei nyinyíi dəidəi ntu əmi azakwoyi kwnunu ɓo. 15Ama she kwo ɓə bmya Shekwoyi wa knyi mi dna ń əmi əya nubwo, wa yì mi dna n əwo shebmyashi, kwa bmya wo 16waa əwo nugwnu kpeyawu dna ń mi nabai n mi ɓa zhni wo waazi dna n Abyedo aba, əmi əɓo pitala kpmisnui əkwo nu ge mi to ɓəlo ma sa n zanyikwoci dəhodəhoi m. 17Mi to ɓə gwnulo Urishelima ntuge mi gye aza yi n ɓa ɓə zhni atnutnuloyi n əmi abye nyi m, ama ma lo Arabyiya. N əkwo avnu ma jezeɓe Damaskwos.
18Nlonu n aye ngwnu-ata avnu, ma gwnulo Urishelima ntuge mii gye Kefas ma kpe wo ye; maa kwnudna n woi anyipyei awoceatnu. 19Mi to ɓə gye atnutnuloyi aje əwye m, akpəge Jemyis, Dagayi mado. 20Mi myi fye abwugba zhi n Shekwoyi abye, nge ənya n mi ka ga fye nyi akatá nu to m.
21Nlonu ma lo Siriya n Kilikiyai. 22Aikilisiya Yahudiya nya n ɓa fyi n Kirisiti nyi ɓa to ɓə zhni ɓai kpe əmi əye m. 23Ɓa ɓə ɓwa nabagyi nu wo: “Əza n wo ɓə zhni woi wu yi awyesnugbegye ɓo nyi, wo laɓa lo woi zhni waazi gaiciyaga nya, ń wo ɓə ye wa zhni kwo agbma nyi.” 24Njesnu ɓa ci Shekwoyi ntu əmi ɓo.
Currently Selected:
Agalatiyi 1: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.