Afyisuyi 1
1
1Bwulus, Kirisiti Yeisu tnutnuloyi, n Shekwoyi ɓəyei.
Kwoi lo da Shekwoyi aza agyigyiyi fyi ń Afyisus, agaiciyaganunui fyi n Kirisiti Yeisu.
2Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.
Zafnu anabəlika n cicii dna n Kirisiti
3Yi ci Shekwoyi, Dada əyi Dagayi Yeisu Kirisiti nya, ń wo la anabəlika tu əyi n əshebmana n anabəlika zafnu nya dəhodəhoii dna n Kirisiti. 4Ntuge wo ɓə la yi knyí fyi n wo, to ai zhni anyìi m, ya kwu zhni agyigyiyi jesnu a tnaɓətuyi zhi n əwo awyeba. Dna ń yeye, 5waa yi pmaknyi zhi ntuge wa gwo yi, n zhni anugwnu dna n Yeisu Kirisiti kwoi vyi əwo agbmada ɓədo n əwo ɓəyei; 6kwa ɓé ǹ cicii əwo shebmyashi latu nya, n wo la ga yi dna n əza n wo ye ncei nyi. 7Dna ń əwo nu n yi kwu shnashna ɓwa n əwo amii, əyi aleifyi zozo, kwoi vyi nyaɓwa Shekwoyi shebmyashi nya, 8ń wo ɓə zeya kpe ń yi nyi. N wyemwai vnyanya ɓədo n awyegai, 9Shekwoyi wo kwu əwo asigyi wu yi, əɓo n kwo ɓə soshi, kwoi vyi əwo agbmada manai n wo ɓə ncei mwushi dna n Kirisiti, 10shi əkwo nunusa ɓə si, kwoi ya tnutnu, kwoi yé anya zhi vnyanya n abagbmanyi, dna n əshemi n anyii dna n Kirisiti snuta. 11Dna n əwo nu ń a ɓə knyí yi, ntuge a ɓə la yi pmaknyi zhi kwoi vyi əwo ɓəmwushi, n wo zhni ɓəhoɓəhoi kwoi vyi əwo ɓətukwo ɓəye nyi, 12nabai ge əyi, n yi nu ɓə zhni akpmisnuyi n ɓa ɓə tu awye n Kirisiti nyi, n kwo ɓa myi kwa ɓe n cicii əwo latu nya. 13Njesnu əfyehni ce, a ɓə n fyei ba fyi n Kirisiti she fye ɓə wo waazi gaiciyanunui nya, nabagyi manai əfye gnyignyi nya. She fye ɓə kwu gaiciya ga, a ɓə kwu fye kpeaznù fyi n wo n atuzèi, ɓəgbeshi Zafnu Gyigyiyi nya. 14Əwo nu zhni nyasaya əyi əgwú wnashi nya, kwoi nya aza yi shnashna əsa n ɓa zhni Shekwoyi nyaɓwa nyi; kwoi ɓe wo n latui cicii.
Amisa n aduwazhnii
15Ntu dəye ɓo, tunyi əsa n mi ɓə wo əfye gaiciyaga ɓo dna n Dagayi Yeisu, jesnu əfye yeyei ntu n Shekwoyi aza vnyanya ɓo, 16mi too fa Shekwoyi amisa ntu n əfye ɓo m, mii pá fye ɓo dna n əmi aduwazhni. 17Ciici mi nya Shekwoyi əyi Dagayi Yeisu Kirisiti nya əɓo lo, Dada latuyi, wa ga fye Zafnu wyemwa nya n ɓəwyegye nyai, nabai n fye ɓa kpe wo ye n dudu. 18Mi zhniaduwa nge awye əfye adu nya ɓa ɓwa bwuznagna, nabai n fye ɓa kpe awyetu ye n a yi fye ntu əkwo ɓo nyi, nyaɓwa əwo əgwú latu nya, fyi n əwo aza agyigyiyi. 19Njesnu əwo ikwo yaakwo tnadomwii ga yi n yi kwu gaiciya ga nyi. Kalá yii zhni nyagbmanyi nu n kalá ikwo duduyi nyai 20n wo ɓə zhniapma ncei əsa n wo ɓə la Kirisiti kala n əfyí jesnu waa wo sasetu n əwo ɓwaizheɓwa fyi n ashebmana, 21n du abegyi vnyanya n ikwo, n ikwo duduyii njesnu n əye dəhodəhoi n a yi, to ɓwasnu n cala nsaiye nya m, ama ɓədo n ədoi n kwo ye ɓeɓelo nyi. 22Njesnu Shekwoyi wa kwu anya vnyanya fyi n əwo apitabwada snuta, waa wo knyi waa zè tukwoda tu n nyahonyahoi əshe, ga ikilisiya, 23ń əkwo nu zhni əwo nayi nyi, n əwo nu nú nyahonyahoi n zokwo dəhodəhoi.
Currently Selected:
Afyisuyi 1: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.