1 Atasaloniyi 5
5
Dagayi nyipyei
1Nsaiye, əyi azaje azanugbai n anyikwozai, ntu asa n anyipyeii ń aɓo ye ɓə zhni ncei, kwo to n apmai lo ya kanya ga fye ntu n əɓa ɓo m, 2ntuge fye kpəlo dəidəi nge, Dagayi nyipyei ɓə ɓe ngye əvyì nu dna n sukwo. 3Əsa n aza zhi lo ɓai gna, “Bwugbafu n lafyiyai,” agbmazhni ɓə ɓe kpe ɓa n əsagbmanyii, shi əɓyima nyasna ɓe kpe nyikwo nubwoda, jesnu ɓa to ɓə pwo m.
4Ama əfye, əyi azaje azanugbai n anyikwozai, fye to fyilo n wyegbma nu, n nyipyei yi ɓə je fye jeje ngye əvyì m. 5Fye zhni aɓyi bwuznagna nya nu vnyanya jesnu aɓyi nyipyei nya. Yi to zhni aɓyi sukwo nya nu kwo wyegbma nya m. 6Ntulonu, yi to kwu wu ngye azaje nu n ɓa kwu wnagye nyi m, ama yi kwu zhi n zhni agyewyikwnui jesnu n nazhi. 7Ntuge aza yi n ɓa wnagye, ɓa wnagye n sukwoi nu, jesnu aza yi n ɓa fyije, ɓa fyije n sukwoi nu. 8Ama shikwonyi yi zhni nyipyei nya nu nyi, fa yaa nazhi, ya kwu gaiciyaganunui kpe ɓədo n yeyei ngye agwù-kpata, jesnu n awyetu gnyignyi nyai kwnu ngye snuknakàta. 9Ntuge Shekwoyi to ɓə knyí yi ya gyeazhnì minagyi napyei nya nu m, ama ya gwo gnyignyi dna n əyi Dagayi Yeisu Kirisiti. 10Wo ɓə fyí ntu n yi ɓo nu, nabai nge, kwo yii zhi n wyewyeyi, kwo yii kwu wnagye nu, n yi ɓa kwnu anyìgyi n woi. 11Ntucenu fye kwu aje agwùmyizhi jesnu fya mi aje zhi, n ɓwasnu shi fye zhni lo nyi.
Agbega kpmasnui
12Nsaiye, əyi azaje azanugbai n anyikwozai, yi gna fye nge fye sa aza yi ami n ɓa zhni tnutnu n wyei bmyibmyii fyi n fye atasni, aza n ɓa wna fye akna fyi n Dagayi, jesnu ɓai dna fye n zokwo nyi. 13Fye shi ɓa n mwamwaga yaakwoi dna n yeye ntu n əɓa tnutnu ɓo. Fye sase n bwugbafui najei. 14Njesnu yi gyiwye, əyi azaje azanugbai n anyikwozai, fye gnaknyi aɓwatoi ɓədo n atawoɓoi, fye myi adukalágbayi agwuzhi, fye bma akalágbayi zhni, fye ɓwa bwugba n zahozahoyii. 15Fye gye nge zahozahoyi to gbá ɓənukwoi əta n ɓənukwoi m, ama n əsahosahoii fye la əwye nyi fya zhni abmyazhni ga aje jesnu ga zahozahoyi ce.
16Fye dagbma ciici; 17fye zhniaduwa n sahosahoii, 18dna n ɓəhoɓəhoi vnyanya fye ga amisa; ntuge Shekwoyi ɓəye nu nyi ga fye dna n Kirisiti Yeisu.
19Fye to wnu Zafnu əná m; 20fye to gwo sheaɓəgwogna n agyèkpei m. 21Ama fye mwi ɓa vnyanya; fye la ənya shiɓwa n kwo bmya, 22fye na nukwoi dəhodəhoi pya aɓo.
23Fa Shekwoyi n əwohni tukwoi, Shekwoyi bwugbafu nya, wa pmya fye woi je pmya. Fa əfye zafnu nunui, wyewyeyi ɓədo n nayii, ɓa kwu zhi ntnaɓətu, əsa n əyi Dagayi Yeisu Kirisiti ɓə ɓe nyi. 24Əwo n wo yi fye nyi, wo zhni gbenui nu, jesnu wo ɓa zhni əɓo n wa tugbe.
25Əyi azaje azanugbai n anyikwozai, fye zhniaduwa ntu əyi ɓo.
26Fye ɓyi Shekwoyi aza vnyanya gna n ɓwadodna gyigyiyii.
27Mi tu fye ɓəgbe gnyi n Dagayi awyeba nge fye ba paka ye ga əyi azaje azanugbai n anyikwozai vnyanya.
28Shebmyashi Dagayi Yeisu Kirisiti nya ɓa kwnusnu n fyei.
Currently Selected:
1 Atasaloniyi 5: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.