1 Atasaloniyi 4
4
Anyìgyi n kwo dá Shekwoyi
1Ntu aɓo aje ɓo, əyi azaje azanugbai n anyikwozai, yi ɓə la əgbega ga fye shi fye ɓa gyianyì n wu kwa dá Shekwoyi, n ɓwasnu ngye shi fye gyianyì lo nyi. Nsaiye yi gna fye jesnu yii gyi fye ce dna n Dagayi Yeisu, nge fye zhni nlonu n dudu. 2Ntuge fye kpe agbega ye lo n yi ɓə ga fye n ikwo Dagayi Yeisu nyai.
3Shekwoyi ɓəye nu, nge fye kwu zhi n pmyapmyai: nge fyaa pəya n asisiɓozhni; 4nge zahozahoyi n fye wo tumwi wa wna wohni nayi shi n zokwo gyigyiyi jesnu n mwamwai, 5toge dna n fnafnakwnu shakpe nayi nya, ngye Abyedo m, n ɓa ta kpe Shekwoyi əye lo nyi m; 6jesnu nge ntu ɓəye ɓo, zahozahoyi to bwu əwodo m, zanugbai n nyikwozai, kwo wa gyi wo fyi m. Dagayi ɓə taa aza yi vnyanya, n ɓa zhni aleifyi ye pya, ngye shi yi ɓə kwu shni fye gna jesnu yii kwnù fye nyi. 7Ntuge Shekwoyi to yi əyi ya kwu zè adodnai nu m, ama ya gyianyì n gyigyiyi. 8Ntucenu, zahozahoyi n wa na gbega ye aɓo, wo ta na zanyikwoci nu aɓo m, ama Shekwoyi, n wo ga fye əwo Zafnu Gyigyiyi nyi.
9Nsaiye ntu n əfye yeye ɓo ga aje, kwo to gwo ya shna nyaho ka ga fye m, ntuge əfye n əfyehni, Shekwoyi wo kwu wu fye nge fye ye n ajei. 10Njesnu ɓəhnihni, fye ye Shekwoyi pwuwa lo n Makyidoninya əknyi vnyanya. Dudulonu yi gyiwye lo, əyi aje azanugbai n anyikwozai, nge fye zhni kwo n dudu ɓo. 11Njesnu fyaa kwo zè əfye ɓəmwi fya gyianyì pəceye, fya əwye ce n əfye aɓwaze jesnu fya zhni tnutnu n əfye aɓwai, n ɓwasnu shi yi ɓə gna fye nyi, 12nabai n əfye anyìgyi fyegyifyegyi nya ɓa zhni abmyida ɓa ga fye mwamwa jesnu nabai to fya kpəma n zahozahoyi m.
Agaiciyagayi n ɓa kwu fyí
13Əyi azaje azanugbai n anyikwozai, yì to ncei pmalo fya kwu zhi n ɓəyebwi, ntu aza yi ɓo n ɓa kwu wnagye fyi n əfyí nyi m, nabai to fya wnubwugba ngye azanyikwoci aje, n ɓa to n awyetui lo nyi m. 14Ntuge yi n gaiciyagai lo, nge Yeisu ɓə la fyí jesnu waa laka, nlonu yi n gaiciyagai lo nge Shekwoyi ɓə ɓe n aza yii n kwnusnu n Yeisui n ɓa kwu wnagye fyi n wo nyi. 15N vyi Dagayi ɓədagbma, yi gna fye nge əyi n yi yee zhilo n wyewyeyi nyi, ń yi cezhi, nya Dagayi ɓeɓe sa nyi, ɓəhnihni yi to ɓə kwu gyi n aza yii abye n ɓa kwu wnagye nyi m. 16Ntuge Dagayi n wohnii tukwoi nu ɓə shnizhi ɓe n əshemi, n ɓəgbetu yaakwoi, n bəgye amaləka tukwoda nyai, n mwayi yiyi Shekwoyi nyai, jesnu azafyífyiyi fyi n Kirisiti nu ɓə kpmi kalakwu. 17N dəye avnu, əyi n yi ɓə zhi n wyewyeyi nyi, jesnu n cezhi nyi, yi ɓə shegwnu aje n ɓai n ənyi, yii snu n Dagayii n əshebmana. Nlonu n yi ɓə kwnusnu n Dagayii nyalonyalo. 18Ntucenu fye kwu aje agwùmyizhi n aɓədagbma yei.
Currently Selected:
1 Atasaloniyi 4: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.