GHLƆMÖÖ NƖKPAA 'BƆGƲ 9
9
-Zakpa -a -Lagɔ -sa-a -bhaa wɛlɩ
1Wɛlɩ -ɩ n -wʋ-ɔ la'a gba 'le, 'dɛdɛ'ɛ ɩ glɩnɩ -bha, -ma Zezwi 'Kli 'mö n'n yuo -dɩ 'le -wʋ, Zuzu 'Wlawla-a -ma na dlɩ zɔmö gbanɩ 'le naa 'dɛdɛɛ -bha. 2Kalɛ-ɛ wʋ'ʋ-a dlɩ zɔmö tenyi 'n na dlɩ -wʋ-a jili 'le 'kɔmʋʋ. 3-Wʋʋ yɛ-a, n 'jɩbha la -Lagɔ ka'a bhlɩ, n ji-a 'mö Zezwi 'Klie -lɔ glɩnɩ, na -dagwie, na 'bhɩa 'yɛ 'pʋɔ yɛ. 4Izlayɛlɩɛ ngëyi -ɛ -Lagɔ -sa-a -bha ɛ 'möö nɩkpa 'yɛ ʋ 'gwie zʋ, 'mʋa wa glɩnɩ -bha. 'Mʋa -Lagɔ tuluanɩ-a ʋ 'ghlinɔ 'ji, 'mʋa ʋ 'nyɛ-a ʋ gbö, -bha ʋ -nyʋa 'sɔɔ nyɩdɩ ʋ -la-a -ghöbhanɔ, mʋa -yɛ-a -Lagɔbʋbɔngwa, wa de -Lagɔ nʋ-a ʋ ji -lie -li nʋɔ. 5-Benyido'oo -Lagɔnɩkpa 'kadɩɛ 'gwiee gwie -bha, -ma wa 'mö -Lagɔ 'plɩnɩ-a, 'n ʋ ji-a Zezwi 'Kli 'pɩ 'wʋ -la, Zezwi 'Kli -ɔ zi-a -li 'bhuo 'wʋ, -ɔ glɩnɩ-a -Lagɔ -ʋ -yɛ-a -kitikie bhalɩlu! Ɩ -wʋ -sɩbha.
6N'n -lɛ nʋ naa -ɩ la'a -Lagɔ nʋ la-a ʋ 'yɛ nʋ, ʋ 'nɩɩ-ɩ 'wʋ 'wlenɩ nʋ. -Wʋʋ yɛ-a, -wa la'a -wa glɩnɩ-a Izlayɛlɩɛ ngëyi, wa 'bhuo 'mʋa -Lagɔ 'nɩ-ɛ -sɩbha -bha -sa. 7-Sɩbha -wa la'a bhuo-o glɩnɩ-a Ablaamöö ngëyi 'nɩ-a ɔ 'gwie glɩnɩ, -wʋʋ yɛ-a, -Lagɔ nɛ -bha Ablaamöö de naa:
“Ngëyi -ɛɛ 'möö nɩkpa
wa ji-a -na 'gwie laa,
-na 'gu Izaköö ngëyi -bha.”
8Ɩ zɔmö-ö -yɛ-a naa: -Wa Ablaamö gwalɩ-a, mʋa-a 'nɩ -Lagɔɔ 'gwie glɩnɩ, -wa -Lagɔɔ 'bhë nʋ-a ʋ jio 'nyɛɛ, mʋa-a glɩnɩ-a ɔ ngëyie -ngëyi. 9-Ma ɩ 'mö, wɛlɩ -ɩ -Lagɔ palɩ-a Ablaamö 'yukwli 'mö mɩ-ɛ la'a naa:
“La 'ylʋba -kanɩ-ɛ la'a,
'ylʋba -ma ji-a jie a -yɛ -bha -kanɩ,
n 'yɛ jie ji -na 'nglɔ Sala ka 'gu cɛ'ɛ.”
10Ɛ'ɛ -lɛ ɩ 'nyize, -sɩbha ɩ 'plɩ 'yɛ-a -aa -tɩbhatɩbha Izaköö 'nglɔ Ghlebekaa de. Ɔ 'gwie 'sɔ -kpɔ Izaköö -lʋa -bha. 11Sa -Lagɔ sa-a -bha nɩkpa 'kɩ ɩ 'yɛ -sɩbha -wʋɔ yɛ, 'gwie 'nɩ -bhla 'gwalɩɔ, wa'a -lɛ -bhla -lie -li -yɛ 'jinyloli 'sɔ nʋ, 'n ʋ ji-e -bha -bhlʋ -sa. 12-Lagɔ -yɛ -bha nɩkpɛ -sa-a, ɛ'ɛ -lɛ ɔ nʋnʋlie yɛ, ʋ 'bhë mʋ-ʋ 'jɩbhɩ -bha. Ɩ yɛ ʋ gba-a -bha Ghlebekaa de naa:
“'Yizi-i ji-a -göpögu 'ji -wʋɔ.”
13Sa ɩ 'cɛlɩɔ-a naa:
“Zakopö n 'jɩbha -bha,
'n n ji-a Ezawi 'jɛbhɛlɩ.”
Sa -Lagɔ -sasanɩ-ɛ -bha -wa 'nɩ-a 'zwiföa glɩnɩ 'mö
14Sa -a 'yɛ bhe gba 'nɩ? -A 'yɛɛ cɛ nʋ naa, -Lagɔ 'nɩ 'mö slɛnɩ nʋ-a? 'Bhëbhë. 15-Wʋʋ yɛ-a, ʋ nɛ -bha Moyizɩɛ de naa:
“-Ɔɔ ngazɩklʋ n 'jɩbha-a n 'yɛ yɩlɩ,
ɔ ngazɩklʋ n yɩlɩ -bha.
-Ɔɔ de n 'jɩbha-a n 'yɛ ngazɩdlɩ 'pa,
ɔ de n pa-a ngazɩdlɩ.”
16-Sɩbha ɩ -wʋ -bha. -Ɩ la'a -ɩ nɩkpɛ 'jɩbha-a, -ɩ ɔ nʋ 'yɛ-a, mɩ-ɩ 'nɩ gbʋ -ka. -Lagɔ la'a -ʋ yɩlɩ-a nɩkpaa ngazɩklʋ, mʋ-ʋ ka-a gbʋ. 17-Wʋʋ yɛ-a, sa'a -Lagɔwɛlɩ gba-a sa'a Ezipötɩɛ dʋdʋnyininyɔɔ de naa:
“-Amö -Lagɔ, -di n -sa-a,
'n n -jimö-a dʋdʋnyininyɔ 'wʋ zʋa,
n 'yɛ -ma -na 'mö na 'mötɛnɔ tuluanɩ,
dʋdʋkpata 'bhuo 'yɛ na 'nglɩ 'ghlimanɩɛ yɛ.”
18-Sɩbha -Lagɔ nʋ -bha. -Mɔɔ ngazɩklʋ ʋ -yɛ 'jɩbha ʋ 'yɛ yɩlɩ-ɛ, ɔ ngazɩklʋ ʋ yɩlɩ -bha, -mɔɔ dlɩ ʋ -yɛ 'jɩbha ʋ 'yɛ 'mö 'tumanɩ-ɛ, ɔ dlɩ ʋ 'tumanɩ-a 'mö.
-Lagɔɔ yʋlʋ -yɛ ʋ ngazɩdlɩ 'sɔɔ wɛlɩ
19-Ɩ la'aa yɛ -mʋmɔ ji-e -sɩka'a na de gba naa: “'Manɩɛ yɛ -Lagɔ kwa 'mö-ö -bhla nɩkpa gbʋ 'wʋ 'nɩ? -Mɔ bhɛlɩ-a ɔ 'yɛ -ɩ ʋ 'jɩbha-a 'ji 'nɩgbönɩ 'nɩ?” 20-Na 'bhëë -nɩ 'na-a? -Mɔ -n glɩnɩ-a 'n -n -yɛ -Lagɔ 'sɔ 'yɛ-a kpɛnɩ 'nɩ? -Laki bhɛlɩ ɛ 'yɛ -bha ɛ mamanyɔɔ de nʋ naa: “'Manɩɛ yɛ -n ma'a-a sa'a” nʋ 'nɩ-ɩ? 21Mamanyɔ mɔ-ɔ 'nɩ bhe manyɛ nyini? Ɔ bhɛlɩ ɔ 'yɛ manyɛko -bhlʋ nya 'nglɩmölaki ma, ɔ 'ka 'yɛ kpakpalaki manɩ. 22'N -Lagɔ -yɛ nʋ ʋ 'yɛ ʋ yʋlʋ -yɛ ʋ 'mötɛnɔ 'sɔ tulua, nɩkpa -wa -yɛ-a ʋ mamalakë, -wa ʋ yʋlʋ ji la-a ghlɩɛ wa 'yɛ 'mʋnɔ, ʋ -kʋa dlɩ 'wʋ sɛ sɩbha-a, sa wa ji-a gba 'nɩ? 23'N -Lagɔ -yɛ nʋ ʋ 'yɛ sa ʋ 'ghlinɔ -zu-a nɩkpa -waa ngazɩklʋ ʋ yɩlɩ-a 'ji tuluanɩ, nɩkpa -wa ʋ -sa-a -bha 'kɩkɩ wa 'yɛ ʋ 'ghlinɔ yɩlɩ-ɛ, sa wa ji-a gba 'nɩ? 24'Mʋa nɩkpa, -abha -bha, -abha -Lagɔ -sa-a -ma 'zwiföa -yɛ -wa 'nɩ-a 'zwiföa glɩnɩ 'sɔɔ 'gbamö. 25Sa -Lagɔ gba-a -ma ʋ 'mögbanɩnyɔ Ozee 'bɔgʋ 'mö naa:
“-Wa 'nɩ la-a na -zakpa glɩnɩ,
'mʋa n ji-e na -zakpa laa.
Dʋdʋ -ʋʋ 'wʋɔ nɩkpa n'n -lɛ la-a 'jɩbha-a,
'mʋa n ji-a -wa n 'jɩbha-a tenyi laa.
26La 'bhë wa -wʋ la-a wa de gba 'le naa,
a'a -lɛ -Lagɔɔ -zakpa-a,
-bha wa jua-a -bhlɩbhlɩ -Lagɔɔ 'gwie lanɩɛ.”
27-Lagɔɔ 'mögbanɩnyɔ Ezayie -nɩ-ɛ, sa'a ɔ gba-a sa'a Izlayɛlɩɛ gbʋ naa:
“Izlayɛlɩɛ ngëyi 'möö nɩkpaa 'bhï
ji gïnyi yawʋɔ -bösɛɛ swɩ 'wʋ -di oo,
wa gla'aa -sɛɛ 'nyize ji-a 'pʋɔ.
28-Wʋʋ yɛ-a, wɛlɩ la'a -ɩ Nyininyɔ gba-a,
'wʋ ɔ ji-a -gaganɩɛ ɔ 'kɩ
ma'a dʋdʋkpata -gömö 'wʋ 'wlenɩ.”
29Sa'a Ezayi gba 'yɛ-a naa:
“'N Nyininyɔ -ɔ 'tɛ-a 'mö nɩ la -aa 'gwie 'pɩ 'wʋ tɩ-ɛ,
Sodɔmö -yɛ Gomɔlʋ 'sɔɔ -gwlɩ ɔ -sa-a yɛ,
ɩ swɩ -a ji la-a -wʋɔ.”
'Tɩtɩɛ -tɩtɩ, Izlayɛlɩɛ -li 'yɛ-a -nɩ
30-Mɩ a jie 'mö-a gba 'nɩ? Nɩkpa -wa 'nɩ-a 'zwiföa glɩnɩ, -wa 'nɩ la-a wa -yɛ -Lagɔ 'sɔɔ -ghöbhanɔ 'nama 'le -wʋ, 'mʋa -Lagɔ zʋa-a 'möslɛnɩngwa 'wʋ wa dlɩwʋkakʋɔ yɛ. 31Izlayɛlɩɛ nɩkpaa -nɩ-ɛ, -ma -Lagɔɔ gböö -bhazʋzʋɛ 'mö wa 'namanɩ-a 'möslɛnɔ, wa'a -lɛ gbö -ɩ slɛmanɩ-a nɩkpa 'mö ghlɩ. 32'Manɩɛ yɛ-a 'nɩ? -Wʋʋ yɛ-a, Izlayɛlɩɛ nɩkpa 'nɩ-ɛ 'möslɛnɔ -ma dlɩwʋkakʋ 'mö 'namanɩ, -ma wa nʋnʋli 'mö wa 'namanʋʋ -bha, ɩ yɛ wa gozo-a tɩkpeyi -ɛ bhlɩ-a nɩkpa yɛ. 33-Sɩbha ɩ 'cɛlɩɔ-a naa, -Lagɔ nɛ:
“-Ma Zelwizalɛmö n zʋ-a gozogozokpiyi yɛ,
kpiyi -ɛ bhlɩ-a nɩkpa yɛ.
'N nɩkpɛ -kɛɛ dlɩ 'wʋ -ka-a,
zʋ 'na 'kɔ 'lɩbha.”
Bete New Testament © Bible Society of Côte d'Ivoire 1996