GHLƆMÖÖ NƖKPAA 'BƆGƲ 8
8
Namönamöbhʋ -ʋ Zuzu 'Wlawla nyɛ-a
1-Sɩka'a-a 'mö, -wa -yɛ-a Zezwi 'Klie -lʋa, wa 'jinylolie gbʋ 'na 'kʋa-a 'mö ghlɩ 'sɔ. 2-Wʋʋ yɛ-a, Zuzu 'Wlawlaa gba -a nyɛ-a 'pɩ -ma Zezwi 'Kli 'mö ka'a 'jinyloli -yɛ tlɩtlɩɛ 'sɔɔ gba ngli -sa 'bhë. 3-Ɩ -Lagɔɔ gbö 'nɩ la-a bhɛlɩ ɩ 'yɛ nʋ, 'pɩnɩkpa 'nɩ 'mö 'tɛ-ɛ wa 'kɩ -bha zʋɔ yɛ-ɛ, la -Lagɔ tia-a ʋjɩɛ 'Gu, 'mɩ ʋ nʋ -bha. Mɔ-ɔ 'libhï-a -aa ku -ʋ nʋ-a 'jinylolie swɩɛ -lu 'wʋ, 'n -Lagɔ ji-a -ma ɔ 'mö 'jinyloli lunʋ. 4Ɔ nʋ-ɔ -sɩbha-a, -ɩ -Lagɔɔ gbö gba-a, -abha la'a -abha 'nɩ nʋ-ɔ 'mö-a -ɩ -aa ku 'jɩbha-a, -abha nʋ-a -ɩ -Lagɔɔ Zuzu 'jɩbha-a wa 'kɩ -ma -aa 'mö yɩlɩnɩɛ yɛ -bha.
5-Wa la'a -wa namö-a -ɩ wa ku 'jɩbha-aa bhʋ-ɔ, 'jinyloli -ɩ wa ku 'jɩbha-a 'mɩ wa nʋ -bha. -Wa namö-a -Lagɔɔ Zuzuo bhʋ-ɔ, -ɩ -Lagɔɔ Zuzu 'jɩbha-a 'mɩ wa nʋ -bha. 6-Ɩ ku 'jɩbha-a, -ɔ ɩ 'tʋ -yɛ 'lɩbha tlɩtlɩbhɛyɩ ɩ kɔ -bha. -Ma ɩ 'mö, -ɔ nʋ-a -ɩ -Lagɔɔ Zuzu 'jɩbha-a, 'pɩɛ pɩ -yɛ -gömöwlonɔ 'sɔ ɩ nyɔ -bha. 7-Wa kuo -li -zinɩ-a ngo, -Lagɔɔ tʋngwa wa glɩnɩ -bha, -wʋʋ yɛ-a, wa'a zʋ -bha -Lagɔɔ gbö, wa'a bhɛlɩ wa 'kɩ -bhaa 'bhë zʋ. 8-Ma ɩ 'mö, -wa la'a -wa wajɩɛ ku nyini-a 'nɩ bhɛlɩ wa 'yɛ -Lagɔ dlɩ yawʋ nanɩ. 9Abhaa -nɩ-ɛ, a ku 'nɩya-a 'mö -sɩka'a nyini, -Lagɔɔ Zuzu nyiniya -bha, 'n -Lagɔɔ Zuzu -yɛ 'dɛdɛ'ɛ -ma a dlɩa zɔmö -wʋ. Zezwie Zuzu nɩ -ma nɩkpɛ dlɩ zɔmö -wʋ-ɔ, ɔ'ɔ -Lagɔɔ -lɔ glɩnɩ. 10'N Zezwi 'Kli -yɛ -ma a dlɩ zɔmö glɩ-ɛ, 'dɛdɛ'ɛ 'jinylolie yɛ, -tlɩ a ku 'tlɩɔ -bha 'bhë-ë, -Lagɔ kaya 'möslɛnɩngwa 'wʋ zʋa 'bhëë yɛ -bhlɩ a zuzuku -bhlɩ -bha. 11-Lagɔ -ʋ -sa-a -ma 'kudungwa 'gbamö Zezwi 'Kli, ʋ Zuzu -yɛ -ma a dlɩa zɔmö glɩ-ɛ, mʋ-ʋ -sa-a -ma 'kudungwa 'gbamö Zezwi 'Kli, ʋ Zuzu-u glɩ-ɛ -ma a dlɩa zɔmö ji a kwi -ɩ -yɛ-a tlɩtlɩli 'pɩ 'nyɛ.
12-Ɩ la'aa yɛ, -dagwieyi, kuo nʋnʋlie gagbʋ -nɩya -gömö -wʋ 'bhë -a 'yɛ -ɩ ku 'jɩbha-a nʋ. 13A -yɛ -ɩ a ku 'jɩbha-a nʋ-ɔ, tlɩɛ a ji -bha. 'N a -yɛ -Lagɔɔ Zuzuo 'mötɛnɔ nya -ɩ a ku 'jɩbha-a sɛ -sa-a, 'mɩ a ji-a -bhlɩɛ. 14-Wa la'a 'bhuo -Lagɔɔ Zuzu -su-a, mʋa-a glɩnɩ-a -Lagɔɔ gwie. 15-Wʋʋ yɛ-a, Zuzu la'a a ghlɩ-a, ɛ'ɛ -lɛ -mʋ zʋaya göngwa 'wʋ 'bhë a 'yɛ -bhla nganɔ -gömö -ka 'sɔ mʋ. Zuzu Wlawla la'a -ʋ zʋaya-a -Lagɔɔ 'gwie 'wʋ, -ʋ nʋ-a -a la -Lagɔ “-Atʋ” 'mʋ a ghlɩ -bha. 16-Lagɔɔ Zuzuo 'bhë mʋ-ʋ gbanɩ-ɛ -ma -aa dlɩa zɔmö naa, -Lagɔɔ gwie -a glɩnɩ -bha. 17'N -a -yɛ -Lagɔɔ 'gwie glɩnɩ-ɛ, -ɩ -Lagɔ nʋ-a ʋ ji ʋ 'gwie 'nyɛɛ mɩ -a ji 'yɛ-a -nɩ ghlɩɛ. -Lagɔɔ -li -a ji-a ghlɩɛ, -a -yɛ Zezwi 'sɔ 'n -a 'kɩ-a 'wʋ -gbɔnʋ, 'n -abha -nyɔɔ 'sɔ -yɛ yʋlɔ -a -nyɔɔ 'sɔ 'yɛ 'nglɩ möö yɛ.
-Lagɔɔ 'ghlinɔ 'kadʋ -ʋ ji-a jie
18N -ji sɛ naa yʋlɔyʋlʋ -ʋ -a -wʋ-a -zɩnɩ'ɩ yʋlɔ 'le, wa'a bhɛlɩ wa 'kʋ -Lagɔɔ 'ghlinɔ -ʋ ʋ -jiya-a zʋma 'ji tuluanɩɛ 'wʋ palɩ. 19-Ɩ la'aa yɛ 'pɩ 'wʋɔ -li 'bhuo -wʋ-a dlɩgbagba nya -ɩ -Lagɔ ji-a ʋ 'gwiee yɛ tulua -kʋ 'le. 20-Wʋʋ yɛ-a, 'pɩ 'wʋɔ -li 'nɩ-a 'mö -lu 'ji -ka, ɩ 'bhï mɩ 'nɩ-ɛ -sɩbha ɩjɩ zʋa, -ɔ zʋɩ-ɛ -sɩbha mɔ-ɔ 'jɩbhɩ-ɛ -sɩbha. 21Dlɩ 'tɛ-ɛ 'wʋ naa 'mɩ 'pɩ 'wʋɔ -li ji 'ylɩ -bhlʋ gïyi 'mö 'wlʋ, -Lagɔgwiee -gömöwlonɔ wa ji-a ghlɩɛ wa 'yɛ 'nglɩ mö, ɩ 'kʋ 'yɛ -nɩ ghlɩ. 22-Ma ɩ 'mö, -a -ji sɛ naa -zɩnɩ'ɩ -bhla, klu 'le 'pɩ 'wʋɔ -li 'bhuo -wʋ -bha, sa 'wlusanglɔ 'nɩ-ɛ la'a -gbaapö, 'n ɩ -wʋ-ɔ -sɩbha -gbaapö 'le. 23Ɛ'ɛ -lɛ 'pɩ 'wʋɔ -lie 'nyize, -aa 'bhï 'gamö, -abha -Lagɔ -la-a Zuzu 'Wlawla -gömö -ɩ ʋ -jiya-a 'nyɛɛ 'wʋtɛnɩluo swɩ, -sɩbha -a -wʋ 'yɛ-a -nɩ 'mlɩ klunʋ 'le, la -Lagɔ ji-a -aa ku zetinɩɛ ʋ -kaya ʋ 'gwie 'wʋ zʋa 'jinanɩswɩ'ɩ 'n -a -wʋ-ɔ -bha -kʋ 'le. 24-Wʋʋ yɛ-a, -ma dlɩɛ 'wʋtɛnɔ mö -a -jinɩ-a sɛ naa -a yɛ 'pʋpʋɛ ghlɩ 'bhë. -Ma ɩ 'mö, dlɩɛ 'wʋtɛnɩli la'a wa jɩnɩ-a 'wʋ-ɔ, wa'a 'tɛnɩɩ-a 'mö dlɩ 'sɔ. -Ɩ wa jɩnɩ-a 'wʋ-ɔ, ɩ yɛ wa dlɩ ji bhe-a 'mö -bhla 'wʋ 'tɛ-ɛɛ? 25'N -ɩ -aa -lɛ-a 'wʋ jɩnɩ -aa dlɩ -yɛ ɩ yɛ 'wʋ 'tɛ-ɛ, dlɩ -a -wʋ-ɔ -ma nyʋnanɩ 'le 'n -a -wʋɩ-a -kʋnʋ 'le.
26-Sɩbha -aa 'mö 'tɛɛ yɛ -Lagɔɔ Zuzu -jiya-a 'wʋ. -Wʋʋ yɛ-a, -a -yɛ -Lagɔ -bɛlɩ 'pa 'le -wʋ-ɔ, 'manɩ -a jiʋ 'jɩbhanɩɛ -a 'nʋ -ji, -Lagɔɔ Zuzuo 'bhë mʋ-ʋ pa-a -aa 'wlumö -bɛlɩ, 'n ʋ sulu-a nyɔmʋ wɛlɩ -ɩ -aa -lɛ-a bhɛlɩ -a 'yɛ zɔmö -sa nya. 27-Lagɔ -ʋ -ji-a nɩkpaa dlɩa, ʋ -ji -ɩ Zuzu 'Wlawla 'jɩbha-a, -wʋʋ yɛ-a, -ɩ -Lagɔ 'jɩbha-a -ma ɩ 'mö ʋ sa-a 'n ʋ pa-a -Lagɔɔ -lʋaa 'wlumö -bɛlɩ.
28-Bha -ɩ la'aa -gömö, -a -ji sɛ naa -wa la'a -wa 'jɩbha-a -Lagɔ, -wa -Lagɔ wɔzɩ-a wa 'yɛ -ɩ ʋ 'jɩbha-a nʋɔ yɛ-ɛ, -ɩ la'a 'bhuo -ɩ ghlʋa-a, -ma ɩ 'mö -Lagɔ 'plɩnɩ-a 'n ʋ nʋʋa-a -lie -li 'ji. 29-Wʋʋ yɛ-a, -wa la'a -Lagɔ -ji-a 'kɩkɩ, 'mʋa ʋ -sa-a -bha 'gamö wa -yɛ ʋ 'Gu 'sɔ 'yɛ 'wlʋnʋ, ʋ 'Gu 'yɛ -dagwie -bebee 'yizi glɩnɩɛ yɛ. 30-Wa ʋ -sa-a -bha 'gamö, wɔzɩ ʋ wɔzʋa -bha, -wa ʋ wɔzɩ 'yɛ-a, 'möslɛnɩngwa ʋ zʋʋa-a 'wʋ, -wa ʋ zʋa-a 'möslɛnɩngwa 'wʋ, 'nglɩ ʋ 'pʋa-a -gömö 'gamö.
'Jɩbha -Lagɔ -jɩbhaya-a tenyi
31Wɛlɩ -mɩ -a ji-e -bha -ɩ la'aa -gömö zʋɔ 'nɩ? 'N -Lagɔ -kaya nimï -wʋ-ɔ, -mɔ bhɛlɩ-a ɔ 'yɛ -aa gbʋ zʋ 'nɩ? 32-Lagɔ -ʋ 'nɩ-a ʋjɩɛ 'Gu 'wʋ gwɩ, -ʋ zʋɔ-a -aa 'bhuoo yɛ-ɛ, sa ʋ 'na -kaya 'mö-a -li 'bhuo -ma ʋ 'Gu 'mö 'nyɛnɩ ʋ ngazɩdlɩɛ yɛ 'nɩ? 33-Mɔ bhɛlɩ-a ɔ 'yɛ -wa -Lagɔ -sa-a -bha gbʋ 'wʋ kwa 'nɩ? -Lagɔ, mʋ-ʋ zʋʋa-a 'möslɛnɩngwa 'wʋ. 34-Mɔ bhɛlɩ-a ɔ 'kʋa gbʋ köbha 'nɩ? Zezwi 'Kli yɛ wa yɛ tlɩ 'bhë, ɛ'ɛ -lɛ ɩ 'nyize, ɔ yɛ 'yɛ glu 'wlʋ 'bhë, ɔ glɩ -ma -Lagɔɔ linɩkpɛsɔ pɩa 'bɩ, ɔ-ɔ -aa 'wlumö -Lagɔ -bɛlɩ 'pa 'le.
35Zezwi 'Kli-i -ɔ -jɩbhaya-a, -mɔ bhɛlɩ-a ɔ -kaya yawʋ -sa 'nɩ? Yʋlɔyʋlʋɛ-a 'nɩɩ bhlɩ'ɩ dlɩnimïnimie-a? 'Zwɩziazie-a 'nɩɩ, ngɔmʋ-a? Pʋa-a 'nɩɩ, gbɩɛ ghlɩghlɩɛ-a 'nɩɩ, bhlɩ'ɩ tlɩtlɩɛ-a? 36Sa ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö naa:
“-Na yɛ sa zlɩ zɩ-a,
'n wa -lɩbhaya -bha,
'n wa -libhïya-a wlia wa -wʋ-a
'lɩbhalɩbhabhɛyɩ kwa 'lee swɩ 'wʋ.”
37-Ma -li la'a 'bhuo 'mö, tʋ -a lu-a -Lagɔ -ʋ -jɩbhaya-aa 'nglɩ 'mö. 38Na dlɩ 'tɛ-ɛ 'wʋ naa, ɛ ji tlɩtlɩɛ glɩnɩ, ɛ ji -bhlɩbhlɩɛ glɩnɩ, ɛ ji -Lagɔzuzuku glɩnɩ, ɛ ji -ma -Lagɔ 'wʋɔ 'mötɛnɩzuzuku -mɩmɩ glɩnɩ, ɛ ji -li -ɩ -bhlɩ-a -zɩnɩ'ɩ glɩnɩ, ɛ ji 'yɛ -ɩ ji-a zʋma jie glɩnɩ, 39ɛ ji 'mötɛnɩli glɩnɩ, ɛ ji -ma ghayɩɛ -bhlɩbhlɩli glɩnɩ, ɛ ji ma'a zɔmöö -li glɩnɩ, -Lagɔ -ʋ tulua-a -ma -aa Nyininyɔ Zezwi 'Kli 'mö -aa 'jɩbhajɩbhʋ, -bhlɩbhlɩlu -jalʋɔ 'bhë 'nɩ bhɛlɩ ʋ -kaya yawʋ -sa 'lɩlɩlɩ!
Bete New Testament © Bible Society of Côte d'Ivoire 1996