GHLƆMÖÖ NƖKPAA 'BƆGƲ 6
6
-Lagɔɔ ngazɩdlɩkakɩɛ, nɩkpa ɛ sa-a 'jinyloli 'mö
1Sa -a ji-e 'mö-a gba 'nɩ? -Ma 'jinyloli 'möö cɛ -a ji-e -bhla glɩɛ -Lagɔɔ ngazɩdlɩ 'yɛ -aa de -gömö bhlinɩ 'nɩ-ɩ? 2'Bhëbhë! 'Jinylolie de -abha 'tlɩɔ-a, samɩ -a ji-e 'mö-ö -bhla -ma 'jinyloli 'mö 'mö glɩglɩnɩɛ 'nɩ? 3Bhlɩ'ɩ a'aa cɛ sɛ -ji naa -abha la'a 'bhuo wa badize-a -a -yɛ Zezwi 'Kli 'sɔ 'yɛ plɩnɩ-ɛ, -a -nyɔɔ 'sɔ 'yɛ -ma ɔ tlɩtlɩɛ 'mö 'wʋ 'slonʋɔ yɛ wa -badizeya-a? 4La wa -badizeya-a, sa -a -nyɔɔ 'sɔ 'yɛ la-a tlɩ -a -nyɔɔ 'sɔ wa -kaya zʋ -sɩbha -bha. Sa Zezwi 'Kli 'wlʋ-a 'kudungwaa 'gbamö -ma -Tɩbha -Lagɔɔ 'ghlinɔ 'mö, -a 'yɛ 'yɛ -sɩbha -nɩ 'pɩ lile -wʋ.
5-Wʋʋ yɛ-a, -a -nyɔɔ 'sɔ -yɛ -ma ɔ tlɩtlɩɛ 'mö 'wʋ 'slonʋ-ɔ, -a -nyɔɔ 'sɔ ji 'yɛ -ma ɔ gluwlʋwlʋɛ 'mö 'wʋ 'slonʋ. 6A -ji sɛ naa nɩkpɛ la'a -ɔ a glɩnɩ la-a -tɩtɛɛ do'o -yɛ Zezwi 'Kli 'sɔ yɛ -bha su 'klʋ 'kʋnʋɔ 'bhë, ku la'a -ʋ nʋ-a 'jinyloli 'yɛ bhata, -a ji-a 'mö 'jinylolie göngwa glɩnɩ 'sɔ. 7-Wʋʋ yɛ-a, nɩkpɛ -yɛ-a 'mö tlɩ-ɛ, ɔ'ɔ-a 'mö 'jinylolie nʋnʋgbʋ -ka 'sɔ.
8'N -a -yɛ Zezwi 'Kli 'sɔ -yɛ 'tlɩɔ-ɔ, -a kɩ dlɩ 'wʋ naa -a -nyɔɔ 'sɔ ji 'yɛ -bhlɩ. 9-A -ji sɛ naa Zezwi 'Kli 'wlʋ-ɔ -ma 'kudungwa 'gbamö ɔ 'na-a 'mö tlɩ 'sɔ, tlɩtlɩɛ 'nɩɔ-a 'mö bhɛlɩ. 10-Wʋʋ yɛ-a, ɔ tlɩ-a, 'jinylolie yɛ ɔ tlɩ-a 'gamö 'gamö. La ɔ -bhlɩ-ɛ 'mö-ö -sɩka'a -Lagɔɔ yɛ ɔ -bhlɩ -bha. 11Ɩ yɛ, nɩkpa la'a -wa 'tlɩɔ-a 'jinylolie de 'bhë -wa -bhlɩ-a -Lagɔɔ yɛ -ma Zezwi 'Kli 'mö, a 'libhï ajɩ wa swɩ 'wʋ. 12-Ma ɩ 'mö, 'jinyloli 'na-a nyini-a 'mö a ku -ʋ -yɛ-a tlɩtlɩlu -nɩ, a 'na-a zʋ-a 'mö -bha ʋ 'jɩbhajɩbhali -nɩ. 13A'a 'nyɛ a nɩma 'jinyloli 'ye a 'yɛ -ɩ 'nɩ-a 'mö slɛnɩ nʋɔ yɛ -nɩ, a 'nyɛ ajɩ -Lagɔ 'ye, abha 'tlɩɔ la-a 'bhë abha -bhlɩ-ɛ 'mö-ö -sɩka'a, a 'nyɛ a nɩma -Lagɔ 'ye ʋ 'kɩ 'wʋ 'libhï, a 'yɛ -ɩ slɛnɩ-a 'mö nʋ. 14-Bhaa do'o, 'jinyloli 'na 'kaya-a 'mö ngo -zinɩ. -Wʋʋ yɛ-a, -Lagɔɔ gbö 'nɩya-a 'mö nyini 'sɔ, ʋ nɩkpajɩbhajɩbhʋ-ʋ nyiniya -bha.
A-a nʋ -ɩ slɛnɩ-a 'möö libho
15Sa -ɩ la'a -sa 'mö-a zɔmö 'nɩ? -Lagɔɔ gbö -nɩya-a 'mö nyini, ʋ nɩkpajɩbhajɩbhʋ-ʋ -nyiniya -bhaa yɛ -a ji-a 'mö-a 'jinyloli nʋ 'le -wʋɔ -a 'yɛ -bha glɩɛ? 'Bhëbhë! 16A'aa cɛ sɛ -ji naa a -yɛ ajɩ nɩkpɛ 'ye 'nyɛ ɔ 'kaya ɔ gïyie swɩ nyini-e, -ɔ a -wʋ-ɔ -sɩbha -bha zʋ 'le ɔ göngwa a glɩnɩ-a? Ɛ ji 'jinyloli -ɩ kwa-a tlɩtlɩbhɛyɩ glɩnɩ, ɛ ji -Lagɔɔ -bhazʋzʋɛ -ɛ kwa-a nɩkpa 'möslɛnɔɔ 'yuogblʋ'ʋ glɩnɩ-ɛ, -ɩ a 'nyɛ-a ajɩ 'ye, ɩ göngwa a glɩnɩ -bha. 17N bhalɩ -Lagɔ, sa a 'wlʋ-a 'jinylolie gïyi 'mö 'bhë, wɛlɩ wa 'paya-a ngli 'n a jiɩ-a a dlɩ 'bhuo nya -bha zʋnʋ. 18A 'wlʋ-a 'jinylolie gïyi 'mö, 'n a ji-e 'mö-a -sɩka'a -ɩ slɛnɩ-a 'möö göngwa zʋ. 19-Ma ɩ 'mö, 'pɩnɩkpaa swɩ n -wʋ-a 'mö -sanɩ 'le, a 'kɩ 'jinanɩswɩ'ɩ 'mö 'nʋɔ yɛ. Sa la'a sa a 'nyɛ la-a a nɩma 'jinyloli -yɛ pɩplali 'sɔ 'ye a 'yɛ 'jinylolie -gɔpö 'bhuo nʋɔ yɛ-ɛ, a 'nyɛ-a 'mö -sɩbha -sɩka'a a nɩma -ɩ slɛnɩ-a 'mö 'ye a 'yɛ ɩ göngwa glɩnɩ, a 'yɛ 'wlawla zʋ.
20-Wʋʋ yɛ-a, la do'o a glɩnɩ la-a 'jinylolie göngwa-a, a gbʋ 'nɩ la -ɩ slɛnɩ-a 'mö 'mö -wʋ. 21-Bhaa do'o 'na-a? -Ɩ a nʋ-a 'manɩ a -sa-a -bha ɩ de 'nɩ? Zʋ 'wʋ ɩ bhïya-a 'mö-a -sɩka'a, -wʋʋ yɛ-a, -ma ɩ 'bhlonʋbhɛyɩ tlɩtlɩɛ-ɛ -wʋ-ɔ -ma. 22-Ma ɩ 'mö, -sɩka'a-a 'mö, a yɛ 'jinyloli 'mö 'wlʋ, a yɛ -Lagɔɔ göngwa zʋ 'bhë a 'yɛ 'wlawla zʋɔ yɛ. 'Mɩ -ɩ la'aa 'bhlonʋbhɛyɩ 'kɔgwlɛpɩ -wʋ-ɔ -ma. 23-Wʋʋ yɛ-a, 'jinylolie 'pɛnɔ tlɩtlɩɛ -bha. -Ɩ -Lagɔ nyɛ-a 'soko 'wʋ -ma -aa Nyininyɔ Zezwi 'Kli 'mö-ö -nɩ-ɛ, 'kɔgwlɛpɩ -bha.
Bete New Testament © Bible Society of Côte d'Ivoire 1996