GHLƆMÖÖ NƖKPAA 'BƆGƲ 5
5
-Lagɔ -kaya 'möslɛnɩngwa 'wʋ zʋa -ɩ -a ghlɩ-a
1-Lagɔ -kaya-a 'mö -aa dlɩwʋkakʋɔ yɛ 'möslɛnɩngwa 'wʋ zʋa 'bhëë yɛ, -aa Nyininyɔ Zezwi 'Klie yɛ -a -yɛ -Lagɔ 'sɔ yɛ -ghöbhanɩ 'bhë. 2Mɔ-ɔ ka-a 'nglɩ 'n -Lagɔ ji-a -aa dlɩwʋkakʋɔ yɛ -aa de ngazɩdlɩ 'pa, ngazɩdlɩ -ɛɛ yɛ -aa dlɩa 'nyʋnanɩɔ-ɔ -ma, -Lagɔɔ 'ghlinɔ -a ji-a 'ylɩ -bhlʋ yɩlɩɛ yɛ, 'n -aa dlɩa 'tɛ-a 'wʋ, 'n -a -wʋ-a 'mʋna li 'le. 3Ɛ'ɛ -lɛ ɩ 'nyizee yɛ, -ma yʋlɔyʋlʋɛ 'bhë 'mö, 'mʋna -a li -bha. -A -ji sɛ naa, yʋlɔyʋlʋɛ-ɛ ka-a 'nglɩ 'n -a nyʋnanɩ-ɛ -ma dlɩ. 4-Ma dlɩɛ -manyʋnanɩnyʋnanɩɛ 'mö, sa -a ka-a -Lagɔɔ dlɩ -ma ɩ 'tuluanɩɔ -bha. Sa -a ka-a -Lagɔɔ dlɩ -yɛ 'tuluo-o, dlɩɛ 'wʋtɛnɔ -a ghlɩ -bha. 5Dlɩɛ 'wʋtɛnɔ 'nɩ nʋ-a 'mö -nɩ nɩkpɛ yʋlʋ, -wʋʋ yɛ-a, Zuzu 'Wlawla -Lagɔ -laya-a -gömö, mʋ-ʋ pa-a -ma -aa dlɩa zɔmö -Lagɔɔ 'jɩbhajɩbhʋ. 6La bhë -aa la-a -lu -bhlʋ 'tɩɛ 'bhë bhɛlɩ, la -Lagɔ -dɩ la-a -bha nyini-a, 'n Zezwi 'Kli ji-a -abha panɩ-a -Lagɔ -gömöö 'wlumö tlɩ. 7Nɩkpɛ -ɔ slɛnɩ-a 'mö, wa 'yɛ ɔ 'wlumö tlɩ, ɩ'ɩ 'wʋ jɔnʋ. Na dlɩ nɛ nɩkpɛ bhɛlɩ ɔ 'yɛ la -ma dlɩ zʋ ɔ 'yɛ nɩkpɛɛ -nɩkpɛɛ 'wlumöö tlɩtlɩgbʋ nglu. 8-Ma ɩ 'mö, -ɩɩ 'mö -Lagɔ tulua-a naa 'jɩbha ʋ -jɩbhaya -bha, mɩ-ɩ -yɛ-a naa la -a glɩnɩ la-a -bhla 'jinylolie nʋnʋngwa, -bha Zezwi 'Kli tlɩnɩ-a -aa 'wlumö. 9Ɔ dlu -ʋ 'suluo-a yɛ, ʋ -kaya-a 'mö la'a -bha -Lagɔ 'ji 'klʋ 'möslɛnɩngwa 'wʋ zʋa 'bhë-ë, mɔ-ɔ 'na -kaya-a -Lagɔɔ -zijle ngli -sa-a? 10-Wʋʋ yɛ-a, la -a glɩnɩ la-a -bhla -Lagɔɔ tʋngwa, -ma ʋ 'Guo tlɩtlɩɛ 'mö -a -nyʋʋ 'sɔ yɛ la'a -ghöbhanɩ 'bhë-ë, e 'kë zi la -a -nyʋʋ 'sɔ -ghöbhanɩ-ɛ 'mö-ö la'a -sɩka'a, -bha ʋ 'Guo 'pɩ 'na-a -kaya-a puaa? 11Ɛ'ɛ -lɛ -ɩ la'aa 'nyize, -Lagɔ -ʋʋ yɛ -a ghlɩnɩ-ɛ -ma -aa Nyininyɔ Zezwi 'Kli 'mö -ghöbhanɔ, ʋ mö -a linɩ-a 'mʋna 'gamö.
Taka -nɩkpɛ Ada -yɛ Zezwi 'Kli 'sɔɔ wɛlɩ
12-Ɩ la'aa yɛ, sa -ma nɩkpɛ -bhlʋ Ada 'mö 'jinyloli jinɩ-ɛ ma'a 'pɩ 'wʋ, 'jinylolie yɛ 'n tlɩtlɩɛ ji-a ji-e, -sɩbha tlɩtlɩɛ ji-a nɩkpa 'bhuo -gömö 'jinyloli nɩkpa 'bhuo nʋ-aa yɛ. 13La -Lagɔ 'nɩ-ɛ -bhla -ma Moyizɩ 'mö ʋ gbö nɩkpa 'ye 'nyɛnɩ, 'jinyloli-e la ma'a 'pɩ 'wʋ. Gbö 'nɩ la -bhla -bhlɩɛ yɛ, 'jinylolie gbʋ 'nɩ ghlɩ la -bha -Lagɔɔ de nɩkpa. 14Tɛnɩ Ada -ɔ -ji la-a -ɩ -Lagɔ 'jɩbha-a 'wʋ, -n 'yɛ Moyizɩ 'wʋ nyini-e, tlɩtlɩɛ-ɛ -sɩbha nɩkpa 'bhuo -gömö, 'jinyloli -ɩ Ada nʋ la-a, -wa 'nɩ la-a -ɩ -Lagɔ 'jɩbha-a -ji 'bhë -wa nʋ-a 'jinyloli, ɛ -wʋʋa 'yɛ -gömö. 'Mɔ Ada la'a, -ɔ la'a -ɔ ji la-a jie ɔ 'wʋpalɩlɔ -bha.
15-Ma ɩ 'mö, -Lagɔɔ 'nyɛnyɛlu -yɛ ʋ wɛlɩɛ -bhasasɩɛ 'sɔ 'nɩ -bhlʋ -wʋ. -Wʋʋ yɛ-a, Ada -bhlʋ 'tɩɛ -Lagɔɔ wɛlɩɛ -bhasa yɛ nɩkpa -bebe -yɛ tlɩ-ɛ, e 'kë zi -Lagɔɔ ngazɩdlɩ -yɛ ʋ 'nyɛnyɛlu sɔ -ɩ 'bhönɩ-ɛ -ma nɩkpɛ -ɔ -yɛ-a Zezwi 'Kli -bhlʋ 'mö, mɩ-ɩ 'na-a -bebe 'wʋ nɩkpa -bebe -gömö jie? 16-Lagɔɔ 'nyɛnyɛlu -yɛ Ada -bhlʋ 'tɩɛ 'jinyloli 'sɔ 'nɩ -bhlʋ -wʋ. -Wʋʋ yɛ-a, nɩkpɛ ji 'jinylolie 'köbhë -bhlʋ 'tɩ nʋ, -Lagɔɔ -zijle ghlɩɔ -bha. -Lagɔɔ 'nyɛnyɛluo -nɩ-ɛ, nɩkpa -wa nʋ la-a 'jinylolie -bebe, 'mʋa ʋ zʋa-a 'möslɛnɩngwa 'wʋ. 17Nɩkpɛ -bhlʋɔ 'jinylolie yɛ tlɩtlɩɛ -wʋ la'a nɩkpa 'bhuo -gömö-ö, e 'kë zi nɩkpa -bebe -waa de -Lagɔ 'pa-a ngazɩdlɩ 'n ʋ jua-a 'möslɛnɩngwa 'wʋ zʋa -ma Zezwi 'Kli -bhlʋ 'tɩ 'mö, mʋa-a 'na-a -ma 'kɔgwlɛpɩ 'wʋ nyini-e?
18Ɩ yɛ sa Adaa 'jinylolie 'köbhë -bhlʋ 'tɩɛ yɛ -Lagɔɔ -zijle ji-a nɩkpa 'bhuo -gömö-ö, -sɩbha Zezwi 'Kli -bhlʋɔ 'möslɛnɩköbhë -bhlʋ 'tɩɛ yɛ -Lagɔ bhɛlɩ-a ʋ 'yɛ nɩkpa 'bhuo 'möslɛnɩngwa 'wʋ zʋa, wa 'yɛ 'kɔgwlɛpɩ ghlɩ. 19-Ma ɩ 'mö, sa Ada -bhlʋ 'tɩɛ -Lagɔɔ wɛlɩɛ -bhasa yɛ nɩkpaa -bebe zʋ-a 'jinylolie nʋnʋngwa-a, -sɩbha Zezwi 'Kli -bhlʋ 'tɩɛ -Lagɔɔ wɛlɩɛ -bhazʋ yɛ -Lagɔ ji-a nɩkpaa -bebe 'möslɛnɩngwa 'wʋ zʋaa. 20-Lagɔɔ gbö ji-a, 'jinyloli 'yɛ -gömö bhlinɩɛ yɛ -bha. -Ma ɩ 'mö, la 'jinyloli bhlinɩ-a -gömö-ö, -bha -Lagɔɔ ngazɩdlɩ bhlinɩ 'yɛ-a -nɩ -gömö tenyi. 21Sa 'jinyloli nyini la-a nɩkpa tlɩtlɩɛ nya-a, -Lagɔɔ ngazɩdlɩ 'yɛ -sɩbha 'möslɛnɔ nya nɩkpa nyini, -a 'yɛ -ma -aa Nyininyɔ Zezwi 'Kli 'mö 'kɔgwlɛpɩ ghlɩnɩɛ yɛ -bha.
Bete New Testament © Bible Society of Côte d'Ivoire 1996