Mat 4
4
1 #
Hip 2:18; 4:15 Oatisɨg, Nanɨmɨn Avsim ramir Iesu rɨvɨn ikɨn rəpia məpia ikɨn, məma Iarɨmɨs tɨrofənofən kəm In.
2Kəni In raməpəs naugɨnan mɨroatɨs nian fote (40) ne lapɨn fote (40), oatisɨg ka ramɨmek.
3Kəni Iofənofən rɨva ton mɨni ton məma, “Takəma Ik Nərɨ Ughin, ɨni məma kapiəl min ɨk karva pret.”
4 #
Dut 8:3
Mɨro rəmarəm mɨni məma, “Kamrai məma, ‘Iərəmim to rɨsɨmiuhan lə naugɨnan#4:4 O pret am, mɨro lə nakharan pətɨm iərəm rɨmsɨpən lə nhulɨ Ughin.’ ”
5Kəni ka Iarɨmɨs ramir In kamian Jerusalem, lauanu ɨvt taha Ughin, mamɨliatin In ilɨs akɨn lə nhagɨ Nimeihuak Asul,
6 #
Sam 91:11,12 mamɨni ton məma, “Takəma Ik Nərɨ Ughin, ivk run. Mɨro-in-ka kamrai məma,
‘In tɨrakeike kəm agɨlo min tahan məma takaimh ɨvt ik,
Ne ilar takaləs ik lə nəlɨmɨnilar,
Məma to nɨsautinan nəlɨkɨm lə kapiəl ker.’”
7 #
Dut 6:16
Mɨro Iesu ramɨni ton, “Kamrai mɨn məma, ‘Ik tɨnɨsofənofənan kəm IƏRƏMƗRA taham Ughin.’ ”
8Kəni ka, Iarɨmɨs ramir mɨn In, kamian ilɨs lə touɨr asul akɨn ker, mhuatɨkun ton niko min pətɨm lə tui tən ne nɨvɨtan thɨnilar.
9Ne ramɨni ton məma, “Narɨmnar min pətɨm ɨk sakofɨna kəm Ik, takəma tɨnaksin nowulɨm kəm io mɨnivivi io.”
10Mɨro Iesu ramɨni ton, “!Akɨmpən isou, Setan! Mɨro-in-ka kamrai məma, ‘Tɨnakəhuak kəm IƏRƏMƗRA Ughin taham, ne In pɨsɨn am tɨnakolatkokɨn nar kəm In.’ ” #Dut 6:13
11Kəni ka Iarɨmɨs raməpəs In, ne airo ru, agɨlo min kamarva ton məma takaip ɨvt.
Iesu ramɨruouɨn mamavsitoin nakharan ɨvt lə tən Kalɨli
(Mak 1:14-15; Luk 4:14-15)
12 #
Mat 14:3; Mak 6:17; Luk 3:19,20 Nian Iesu ramɨro məma kaməlhau Jon lə kalapus, In ramləlɨg-pən Kalɨli.
13 #
Jon 2:12
Kəni raməpəs Nasərət mɨva mamarɨk Kapeneam, lə nkalɨ tehe, lə tən kaupan in taha Sepiulon ne Naftali,
14məma nakharan iəni taha Ughin Aesaea rɨnɨnitha tɨrva in nɨpəlakɨn, iərəm ramɨni məklan,
15 #
Aes 9:1,2 “Tən Sepiulon ne tən Naftali,
Iərəm in suatu to nɨvɨnan lə tehe,
Lə nɨvtai nu Jotən,
In Kalɨli, tən taha nərəpɨsɨn kɨsɨnian məma namin Isrel.
16 Nahuto kamaiwota lə napinəpan kamaip nɨsia asul,
Ne nərəm kamaiwota lahau lə nhanɨpɨsan taha nɨmɨsan,
Nɨsia ramət to ilar.”
17 #
Mat 3:2
Loanian an Iesu ramɨruouɨn mamavsitoin nakharan, mɨni məma, “Arvhin nɨkimiar, mɨro-in-ka niko taha neai rɨnva iwəkɨt.”
Iesu ramaunin nərəmim min kɨvər taha nosan nəm
18 Nian Iesu ramaliwək lə nkalɨ tehe Kalɨli, ramap wus mil kiu ilau pian, Saemon iərəm kamaunin məma Pita ne norhɨn Antɨru, kamuaruin nakɨpɨn lə tehe, mɨro-in-ka ilau iərəmim mil taha nosan nəm.
19Kəni ramɨnipən to ilau, “Uouatisɨgin Io, kəni sɨpol kamilau iərəmim mil taha nosatil.”
20Kəni ihue am kamuəpəs nakɨpɨn mamuɨroupən In.
21Kəni ka ramaliwək nouan-takrɨn mɨn mamap kiu mɨn ilau pian, Jemɨs nərɨ Sepeti ne Jon norhɨn, kamhaiwota lə tui niko ilhel rɨmɨnilau Sepeti mamhatil ɨvt nakɨpɨn thɨnilhel. Kəni ramaunin ilau,
22ne ihue am kamuəpəs niko ne rɨmɨnilau mamuɨroupən In.
Iesu ramol ɨvt nərəmim min ripɨr lə nɨmɨsan min
(Luk 6:17-19)
23 #
Mat 9:35; Mak 1:39 Kəni Iesu ramavɨn pətɨm lə tən Kalɨli mamətɨkun lə nimeihuak min thɨnilar, mamavsitoin nakharan ɨvt taha niko taha Ughin, kəni mamol ɨvt nərəmim min lə nɨmɨsan min ne namhean min thɨnilar.
24Kəni ka kamavsitoin In ikɨn min pətɨm lə tən Siria. Ne kamarpɨk marva ton nərəmim min kamarɨmɨs lə nɨmɨsan pɨsɨn pɨsɨn min ne namhean pɨsɨn pɨsɨn min, nərəm nanɨmɨn tat ramalɨmɨn ilar, nərəm nɨkavean ramho ilar, ne nərəm takrɨ nɨpəlakɨnilar rɨmɨmɨs. Kəni ramol ɨvt ilar.
25Kəni nahuto ripɨr kamaroatisɨgin, iərəm kamasɨpən lə tən Kalɨli, ne tən kamaunin nətɨgɨn məma Lauanu Kətilɨm-Kətilɨm, ne Jerusalem, ne tən Jutia, ne ləvtai Jotən.
Iesu ramət lə touɨr ker mamətɨkun nərəmim min
(Luk 6:20-23)
Currently Selected:
Mat 4: Lenakel NT
Highlight
Share
Copy
Want to have your highlights saved across all your devices? Sign up or sign in
(c) 2023 Covenanter Press - Presbyterian Reformed Church of Australia
