Mat 3
3
1Loanian an Jon iərəmim taha nauiatil rɨva mamɨni-atkokɨn nakharan lə tən Jutia, ikɨn rəpia məpia ikɨn,
2 #
Mat 4:17; Mak 1:15 mɨni məma, “Arvhin nɨkimiar, mɨro-in-ka niko taha neai rɨnva iwəkɨt.”
3 #
Aes 40:3
Mɨro-in-ka in ɨk iərəm iəni taha Ughin Aesaea rɨmamakharin, mɨni məma,
“Nouia iərəmim ramakar əpomh ikɨn rəpia məpia ikɨn,
‘Arepina-epinein suatu taha Iərəmɨra,
Arol ətuatu suatu tahan.’”
4 #
2 King 1:8
Jon an ramos napən kamol lə nɨməmi kamel am, mamɨtəut i kɨtəut kamol lə nɨvigɨ pɨlɨk, ne naugɨnan iərəm ramkɨn piru ne nouanhalɨ sukapak ramos ləluan.
5Kəni namin Jerusalem ne tən min pətɨm Jutia ne ikɨn min pətɨm lə nkalɨ nu Jotən kamariər marɨn ton.
6Mɨmaniatɨv təvhaga tat thɨnilar, maros nauian ton lə nu Jotən.
7 #
Mat 12:34; 23:33 Mɨro nian ramap Farɨsi ne Satusi min ripɨr kamarva məma takaros nauian ton, in ramɨni to ilar məma, “!Kamiar nərərɨ snek min! ?Pehe ramofɨna nakɨman to kamiar məma tɨnakaikɨm to niəmha iərəm rakəva?
8“Mɨro pəs tɨnakarhuatɨkun nouan məma nɨnarvhin nɨkimiar,
9 #
Jon 8:33
“mɨsanian lə nɨkimiar məma, ‘Rɨpɨmar in Epraham.’ Mɨro-in-ka iakamɨni to kamiar məma Ughin rhinatin nolan kapiəl min ɨk takarva nərərɨ Epraham.
10 #
Mat 7:19
“Mɨro touek ne kɨpas rɨnɨmɨl itha lə noukɨrɨ nɨk min, məma takɨrai nɨk min pətɨm nouanilar ɨvt rɨka, kalak-pənin lə nɨkəm.
11“Io iakamaui kamiar lə nu taha nɨvhinan nɨkimiar, mɨro iərəm tɨroatisɨgin io In rɨsanən mapitha io, io iɨsavkɨran məma sakəpɨk santel tahan. In tɨraui kamiar lə Nanɨmɨn Avsim ne lə nɨkəm.
12“In ramos kilil lə nəlɨmɨn, məma tɨrvɨn ikɨn kamagrətin wit ikɨn mililitha nɨmɨsmɨsɨn a ikɨn. Ne tɨrəpɨk wit məpkipən lə nima tahan, mɨro tɨrvanakrɨv nɨmɨsmɨsɨn lə nɨkəm lilɨn.”
Jon ramaui Iesu
(Mak 1:9-11; Luk 3:21-22)
13Loanian ka Iesu rɨmsɨpən Kalɨli mɨvɨn to Jon apa lə Jotən məma tɨros nauian ton.
14Mɨro Jon rəma tɨrənhiau, mɨni məma, “?Rɨmatu məma io sakos nauian ton Ik, kəni rɨtol Ik nakəva ton io?”
15Mɨro Iesu rəmarəm mɨnipən ton, “Eghənin am ka tek mə tɨrol mealan, mɨro-in-ka nolan ɨk rɨmatu məma takiaol pətɨm nar Ughin rɨnəlhau.” Kəni ka rameghənin.
16Kɨnauitha ka, Iesu ramiər ihue am lə nu. Kəni ka, airo ru, neai ramheta ton, ne ramap Nanɨmɨn taha Ughin ramatite ravkɨri iouin mɨva mawota lan.
17 #
Jen 22:2; Sam 2:7; Aes 42:1; Mat 12:18; 17:5; Mak 1:11; Luk 9:35 Kəni ka, airo ru, nouian ker rɨsɨpən lə neai mamɨni məma, “In ɨk Nərɨk keike, iərəm nɨkik ragiən ɨpɨk lan.”
Setan ramofənofən kəm Iesu
(Mak 1:12-13; Luk 4:1-13)
Currently Selected:
Mat 3: Lenakel NT
Highlight
Share
Copy
Want to have your highlights saved across all your devices? Sign up or sign in
(c) 2023 Covenanter Press - Presbyterian Reformed Church of Australia
