Mat 5
5
1Nian ramap nahuto asul, ramət mɨvɨn apa lə touɨr ker mawota, kəni tahan nərəmim min kamarva ton.
2Kəni raməwag mamətɨkun ilar, mɨni məma,
3“Nərəm karouloul lə nɨkinilar kamaros nɨvɨtan,
Mɨro-in-ka niko lə neai in thɨnilar.
4 #
Aes 61:2
Nərəm kamaisak kamaros nɨvɨtan,
Mɨro-in-ka Ughin tɨrol ɨvt nɨkinilar.
5 #
Sam 37:11
Nərəm nɨkinilar ramatite kamaros nɨvɨtan,
Mɨro-in-ka tui tən tɨpofən məma thɨnilar.
6 #
Aes 55:1,2 Nərəm kamaimek mameiwaua to nətuatuan kamaros nɨvɨtan,
Mɨro-in-ka tɨparhepɨs.
7Nərəm kamairo rɨtat to nərəmim kamaros nɨvɨtan,
Mɨro-in-ka Ughin tɨrɨro rɨtat to ilar.
8 #
Sam 24:3,4 Nərəm nɨkinilar rhaləl kamaros nɨvɨtan,
Mɨro-in-ka tɨpaip Ughin.
9Nərəm kameilhau nɨmɨlinuan kamaros nɨvɨtan,
Mɨro-in-ka takaunin ilar məma nərərɨ Ughin.
10 #
1 Pita 3:14
Nərəm kamətakɨn ilar to təvhaga ɨvt kamaros nɨvɨtan,
Mɨro-in-ka niko lə neai in thɨnilar.
11 #
1 Pita 4:14
“Lə nian nərəmim kameitat kamiar mamaitakɨn kamiar mamareiua lə kamiar lə nakharan tat min ripɨr ton Io, kamiar nakamaros nɨvɨtan.
12 #
2 Kron 36:16; Apsl 7:52 “Pəs nakaigiən ɨpɨk mamailip, mɨro-in-ka nɨrouan thəmiar ripɨr lə neai, mɨro-in-ka lə nolan karena kamaitakɨn iəni min taha Ughin iərəm kamaiupanin kamiar.
Nɨgəl ne nɨsia
(Mak 9:50; Luk 14:34-35)
13 #
Mak 9:50; Luk 14:34-35 “Kamiar nɨgəl taha tən ɨk. ?Mɨro takəma nauthean taha nɨgəl tɨrɨka, rɨpɨtol mɨva mauthe mɨn? Rɨsavkɨran mɨn to nar ker, mɨro tɨpalakin am, nərəmim kailiwək lan.
14 #
Jon 8:12; 9:5 “Kamiar nɨsia taha tən ɨk. Riəkɨs məma takəlhau auniuan lauanu iərəm rakamɨl ilɨs lə touɨr.
15 #
Mak 4:21; Luk 8:16; 11:33 “Ne nərəmim to kɨsalɨvan nɨsia maruwu lə nɨvigɨnar, mɨro takaləsit lə nəmin ətuatu apa ilɨs, məma tɨrol nhakəkan kəm nərəmim pətɨm apa ima.
16“Lə nolan karena, pəs nɨsia thəmiar tɨrasia lə nɨmrɨ nərəmim, məma takaip təvhaga ɨvt thəmiar kəni manivivi Rɨmɨmiar lə neai.
Iesu ramol Noua taha Moses rɨva in nɨpəlakɨn
17“Nɨkimiar tɨrɨshoan məma iɨva to nosithean Noua taha Moses ne nakharan taha iəni min taha Ughin. Iɨsvean məma sakositha, mɨro iɨva məma sakol rɨva in nɨpəlakɨn.
18 #
Luk 16:17
“Nɨpərhienan iakamɨni to kamiar, mɨroatɨs neai ne tən tɨpiaol naunin, to kɨsosithean takrɨn karena lə nakharan karena lə narɨmnar min pətɨm kɨrai lə Noua, mɨroatɨs rɨva in nɨpəlakɨn.
19“To nar ka, pehe iərəmim tɨrɨrkɨlh takrɨn ɨsuas am lə noua min ɨk, mamətɨkun nərəmim mealan, lə niko lə neai tɨpaunin iərəmim an məma in rɨsuas akɨn. Mɨro iərəm ramhiapatin mamətɨkun, lə niko lə neai tɨpaunin iərəmim an məma in iərəm asul.
20“Mɨro-in-ka iakamɨni to kamiar məma takəma nətuatuan thəmiar rɨsapithean nətuatuan taha nətɨkun min taha Noua ne Farɨsi min, to nɨsarɨnan ima lə niko lə neai.
Niəmha ne nuhuapninan til
21 #
Eks 20:13; Dut 5:17 “Kamiar nɨnairo məma nahigəl oas min kɨmani məkləlan, ‘Tɨnɨshuapninan til,’ ne ‘Pehe iərəmim tɨrhuapnin til, tɨfhuaprai in’.
22“Mɨro Io iakamɨni to kamiar məma pehe iərəmim niəmha tɨrɨtɨk in to pian to nar əpnapɨn am, tɨfhuaprai in. Ne pehe iərəmim tɨrɨnipən to pian ‘!Ik kenoeno!,’ tɨfhuaprai in lə Nikolətən thətar. Ne pehe iərəmim tɨrɨnipən ‘!Ik ialmɨl!’ tɨfhuaprai in lə nɨkəm lilɨn.
23“To nar ka, takəma namos nofənan taham mɨva ikɨn kamhuasɨgɨn nar ikɨn məma takhuasɨgɨn, kəni ka nɨkim rakamho məma niəmha ramɨtɨk əna piam to nar ker ton ik,
24“Əpəs am nofənan taham ikɨn an kamhuasɨgɨn nar ikɨn, mɨvɨn maupan mol ɨvt nɨki piam, oatisɨg mɨva mofən nofənan taham.
25“Ol ɨvt nɨki tɨkɨmɨr taham huaihue am, nian namian əna lə suatu, takamo tɨrvi ik nəkvɨn lə nəlɨmɨ iohuaprai, iohuaprai rofən ik lə nəlɨmɨ polis, kəni ka nəkvɨn lə kalapus.
26“Nɨpərhienan iakamɨni ton ik, to nɨsiəran mɨroatɨs tɨnakɨrou pətɨm akɨn nar kamakeike kəm ik məma tɨnakɨrou.
Nɨkin tat lə pɨravɨn ne nakhleanin pɨravɨn
27“Kamiar nɨnairo məma nahigəl oas min kɨmani məkləlan, ‘Tɨnɨsakhleanin pɨravɨn.’
28“Mɨro Io iakamɨni to kamiar məma iərəm ramap pɨravɨn ker molkeike mə tɨrol təvhaga tat lan, in rɨnakhɨla-ithein lə nɨkin.
29 #
Mat 18:9; Mak 9:47 “Kəni takəma nɨmrɨm matu tɨrol məma nakapitətəl, suliatɨv malakin itha ton ik. Mɨro-in-ka rəvɨt ɨpɨk məma takrɨ nɨpəlakɨm ker tɨrɨmɨs, mapitha məma nɨpəlakɨm pətɨm tɨpalakin lə nɨkəm lilɨn.
30 #
Mat 18:8; Mak 9:43 “Ne takəma nəlɨmɨm matu tɨrol məma nakapitətəl, ɨrakrɨv-itha malakin ton ik. Mɨro-in-ka rəvɨt ɨpɨk məma takrɨ nɨpəlakɨm ker tɨrɨmɨs, mapitha məma nɨpəlakɨm pətɨm tɨpalakin lə nɨkəm lilɨn.
Tɨnɨshaliatɨvan nouaim
(Matiu 19:9; Mak 10:11-12; Luk 16:18)
31 #
Dut 24:1-4; Mat 19:7; Mak 10:4 “Kamɨni nakharan oas ker mɨn məkləlan, ‘Takəma iərəmim ker rolkeike məma tɨrhaliatɨv nouain, tɨrakeike mɨrai nar an lə pepe ker mofən ton, məma tɨrhuatɨkun məma rɨnhaliatɨv.’
32 #
Mat 19:9; Mak 10:11-12; Luk 16:18; 1 Kor 7:10-11 “Mɨro Io iakamɨni to kamiar məma iərəm ramhaliatɨv nouain, mɨro rɨsolan məma to nakhlean, in ramol məma pɨran an tɨrakhɨla. Kəni iərəm ramir pɨravɨn iərəm kɨnhaliatɨv, in ramakhɨla.
Tɨnɨsosan noanavɨl
33 #
Lev 19:12;
Nam 30:2; Dut 23:21 “Nɨnairo mɨn məma kamɨni to nahigəl oas min məkləlan, ‘To nɨsɨrkɨlhan noanavɨl namos, mɨro noanavɨl namos lə nətɨgɨ Iərəmɨra tɨnakakeike mol.’
34 #
Jem 5:12;
Aes 66:1; Mat 23:22 “Mɨro Io iakamɨni to kamiar məma tɨnɨsarosan noanavɨl lə nar ker. Tɨnɨsarosan lə neai, mɨro-in-ka in ikɨn Ughin rakawota ikɨn,
35 #
Aes 66:1;
Sam 48:2
“mɨsarosan lə tui tən, mɨro-in-ka in ikɨn raməlhau nəlɨkɨn ikɨn, mɨsarosan lə Jerusalem, mɨro-in-ka in lauanu asul taha Iərəmɨra asul.
36“Kəni tɨnɨsosan noanavɨl lə thəmkapa, mɨro-in-ka ik nɨsavkɨran məma tɨnakol nouanum ker rɨva mɨtuən o mapɨn.
37“Mɨro nakharan taham ‘Əwəh’, pəs ‘Əwəh’, ne ‘Kəpə’, pəs ‘Kəpə’. Mɨro-in-ka nəta nakharan iərəm ramapitha nakharan ɨk rɨmsɨpən am lə Setan.
Tɨnɨstainan təvhaga taha iərəm ramətakɨn ik
(Luk 6:29-30)
38 #
Eks 21:24; Lev 24:20; Dut 19:21 “Kamiar nɨnairo məma kamɨni məkləlan, ‘Taktain nɨmrɨtil lə nɨmrɨtil, taktain nəlɨvtil lə nəlɨvtil.’
39“Mɨro Io iakamɨni to kamiar məma tɨnɨshairɨganin iərəmim tat. Mɨro takəma iərəmim ker tɨrep nɨkapɨm nɨvtain matu, vhin mɨn nɨvtain kəm in.
40“Ne takəma iərəmim ker rəma tɨrviatɨv ik lə nakharan məma in tɨros sot taham, əpəs am mə tɨros mɨn kot asul taham.
41“Ne takəma iərəmim ker tɨrakeike kəm ik məma tɨnakləs katipa tahan mɨroatɨs kiloməta karena, pəs tɨnakləs mɨroatɨs kiloməta kiu.
42“Iərəm tɨrɨrhapkinpɨna nar ker, ofən kəm in, mɨsetareanin iərəm rəma tɨros nar ker taham.
Tɨnakolkeike tɨkɨmɨr taham
(Luk 6:27-28,32-36)
43“Kamiar nɨnairo məma kamɨni məkləlan, ‘Tɨnakolkeike thəmiel, #Lev 19:18 mamakin tɨkɨmɨr taham.’
44“Mɨro Io iakamɨni to kamiar, Arolkeike tɨkɨmɨr min thəmiar, mameikharvi kəm nərəm kameitat kamiar, marol nɨvɨtan to nərəm kamaimakin kamiar, mameihuak to nərəm kameikhartat lə kamiar mamaitakɨn kamiar,
45“məma tɨphuatɨkun məma kamiar nərərɨ Rɨmɨmiar lə neai. Mɨro-in-ka In ramol mɨt tahan ramhan nərəmim tat ne nərəmim ɨvt, mhalipa nihin kəm nərəmim ətuatu ne nərəm kɨseituatuan.
46“?Mɨro-in-ka takəma nakarolkeike nərəm karolkeike kamiar, nɨkimiar rakamho məma tɨnakaros nəta nɨrouan ton? !Nərəm kamaros takɨs kamarol mɨn mealan!
47“?Ne takəma nakarɨvt to piəmiar am, nolan an ramɨtuapitha taha nərəmim pɨsɨn? !Nərəm kamaros takɨs kamarol mɨn mealan!
48 #
Lev 19:2; Dut 18:13 “To nar ka, pəs nolan thəmiar tɨrətuatu mɨvt, ravkɨri nolan taha Rɨmɨmiar lə neai rətuatu mɨvt.
Tɨnɨsolan nolan ɨvt məma nərəmim am takaip
Currently Selected:
Mat 5: Lenakel NT
Highlight
Share
Copy
Want to have your highlights saved across all your devices? Sign up or sign in
(c) 2023 Covenanter Press - Presbyterian Reformed Church of Australia
