Dadunu 8
8
Tana'a ma la-la di'a ni tegoro
1'A Musa 'o kanau moju toma ngowa'a Israel ma betongo so'o ne: <<Huku-hukumu re 'atoranga-'atoranga mo-moini ga'a toma parenta rimoi ma dara ga'a ngoi ta pula'a ra ngini wangere nange-ne, ngini balasu na siḏagi tau-taunu, la ngini ni ḏuanga i'a ni 'ahu tau-taunu re dogo repe re ni osama re ḏegoro tana'a ga'a Ma JOU ro 'a'a jaji rema sasi taninga ngimo-ngimono. 2Re 'elingi Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O sinyanyasele ninga ngimo-ngimono toma ḏo-ḏagi mo-moini ma dara mete'e daeraha baulaco ma di'ara musungu nyagi rata ma dara. Ḏo-ḏagi ma dara gena-ge Ma JOU 'Ai maksudu la ananga gena-ge nyengara 'aḏi madoto'o di'a sigare manga ngo-ngaku ra Unanga. Dadi Unanga 'o tai'i ananga, la Unanga 'o disa waro mangale 'oru ananga nyengara bolo ua 'aḏi siḏagi 'Ai parenta tamanga 'akala re sinyingara ma dara. 3Unanga mau 'o doto'o ananga di'a 'aḏi sigare ngo-ngaku ra Unanga rema duhu so'o ne: Unanga 'o sieanga i'a ananga 'aḏi dadi sawini kara 'O pula'a manna sa'olo manga ngo-ngoromo ga'a ngini bolo ananga ninga ya nana'o nyangu. Ma JOU 'o si'a'a so'o gena di'a doto'o ananga gena-ge mangale manusia wo 'ahu pa'i wo oromo roti ḇato ua, mada'a wo 'ahu ḏi'i, sababu wo mete'e Ma Jou'ongu Madutu 'ai demo-demo mo-moini.#Mat. 4:4; Luk. 4:4 4Ma di'ara musungu nyagi rata, ngini ninga ngimo-ngimono manga pakeanga 'i cira ua re ananga manga rou 'i roboso ua. 5'Elingi taninga 'akala re sinyingara ma dara mangale Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge 'O doto'o ngini ma tero Ḇaḇa matengo 'o doto'o 'ai ngowa-ngowa nau'u.
6Dadi, ngini balasu ni mete'e huku-hukumu ga'a Ma JOU 'A parenta ra ngini singadolo ninga 'ahu ma ngo'omo 'i mete'e 'Ai huku-hukumu re ḏi'i ni silamo'o re mojongo Unanga ga'a Ma Jou'ongu Madutu ga'a ngini ni silamo'o re siḏubuso. 7Sababu Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O sigasa ngini toma daeraha ga'a rousu; tana'a ga'a ma ḇanyo lai repe re ḇanyo ma la'o, rema ḇanyo ga'a 'i waloro lai siḏi toma tana'a ma dara ie si'uisi toma picaru-picaru re sau-sau. 8Daeraha gena-ge ma hasili jelai re gandum, ate 'anggur ma sowo'o re ate ara ma sowo'o re ate delima ma sowo'o, ate zaitun ma sowo'o re madu. 9Toma daeraha gena-ge ngini ni oromo roti singadolo moini ua re basono kama kuranga ua. Ma maḏi ma dara 'age rema ḇesi, re toma sau-sau ma dara na'o ngini ni paiti ḏuanga i'a sanga tamḇaga. 10Ngini ḏuanga i'a ni oromo singadolo ḏugala re ngini ni puji re silamo'o Ma JOU Ma Jou'ongu Madutu ga'a ngini silamo'o re siḏubuso sababu tana'a gena-ge lai rousu ga'a Unanga ra pula'a ra ngini.>>
Si'elingi re sidaioranga Ma JOU awa
11Ma 'istiari ino awa singadolo sidaioranga Ma JOU Ma Jou'ongu Madutu ga'a ngini silamo'o re siḏubuso; sababu ni mete'e ua 'Ai huku-hukumu, parenta-parenta, 'atoranga-'atoranga ga'a ngoi to pula'a ra ngini wangere nange-ne. 12Na'o so'o gena ngini reni oromo singadolo ḏugala re ni simomi'i ninga wala-wala ma la-la ḏua di'a na tegoro, 13re mo-moini ta ngini ganapu dogo: bae ninga sapi, 'abingi re doba ma duo-duo bae ninga salaka re guraci re ngini ninga harata mo-moini ma lelegu ḏi'i, 14singadolo ninga 'akala re sinyingara 'i momole kara ngini ḏuanga ni sidaioranga Ma JOU Ma Jou'ongu Madutu ga'a ninga ngimo-ngimono 'aḏi silamo'o re siḏubuso ga'a Ro sigasa ananga supu toma Mesir, ngi'i ga'a ananga 'aḏi dadi budaka. 15Unanga gena-ge ga'a 'O sigasa ngini toma daeraha baulaco ga'a loasa re bahaya, ga'a rema cuku'u rema bisa re 'a'atama. Toma tana'a gena-ge ga'a dudungu singadolo ma ḇanyo cua, Unanga 'O si'a'a ḇanyo 'i waloro toma kie maḏi ino, la ananga sanga ka'e. 16Toma daeraha baulaco gena-ge, Unanga gena-ge 'O pula'a manna di'a ninga ngimo-ngimono manga ngo-ngoromo, ngo-ngoromo ga'a ananga ya nana'o soi rimoi i'a mai ua. Ma JOU 'O si'a'a so'o gena la ananga 'aḏi madoto'o di'a sigare manga ngo-ngaku ra Unanga re tai'i ananga, la ma ḏo-ḏogumu Unanga 'O 'a'a la-la ra ananga. 17Awa ngini ni kanau taninga 'akala re sinyingara ma dara ma betongo so'o ne: <<Ngini ninga dinga'unu re de-de'e masiretene singadolo dadi ngowa'a rema-enanga.>> 18Mada'a 'elingi mangale Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O pula'a ninga dinga'unu, la ngini ni dadi ngowa'a rema-enanga. Unanga 'O si'a'a so'o gena sababu singadolo wangere nange-ne Unanga 'O sitatapu jaji ga'a si'a'a rema sasi taninga ngimo-ngimono.
19<< Re na'o ngini ni sidaioranga Ma JOU Ma Jou'ongu Madutu ga'a ngini silamo'o re siḏubuso singadolo ni siḏagi enanga ma mau re mapagara ninga biono toma tana'a toma jou'ongu ma somoara ma biono di'a na silamo'o re siḏubuso. Wangere nange-ne ngoi, 'a Musa, to si'elingi mode-mode'e ngini Ma JOU ḏuanga i'a Nu singi-ngiranga. 20Na'o ngini ni mete'e ua Ma JOU Ma Jou'ongu Madutu ga'a ngini silamo'o re siḏubuso, tantu ḏua ngini Ma JOU ḏuanga i'a Nu singi-ngiranga, ma tero bangsa-bangsa ga'a Ma JOU ḏuanga i'a ya'u singi-ngiranga taninga momina.>>
Currently Selected:
Dadunu 8: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
