Dadunu 7
7
Ma Jou'ongu Madutu 'ai 'umata
(Sup. 34:11-16)
1<<Toma 'orasa Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O gasa ngini toma nagara ga'a ḏuanga i'a ngini na osama re ḏegoro. Unanga gena-ge Ma JOU 'O dusu'u bangsa tumudingi supu toma daeraha gena-ge ra ngini ninga momina. Bangsa gena-ge mo-moini lebe lamo'o re te'e reo ngini, gena-ge ngowa-ngowa'a Het, Girgasi, Amori, Kanaan, Feris, Hewi, re Yebus.>> 2Wakutu Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O sipula'a bangsa-bangsa gena-ge ra ngini singadolo ngini na'u sita'aloko ananga. Ḏua awa ngini ni 'a'a jaji ra ananga gena-ge bolo ni sijumu 'akala re sinyingara ma la-la ra ananga mada'a ngini balasu ni sisengene ananga mo-moini singadolo matengo i'a mai riwara ga'a 'ahu. 3Awa ngini ni molo'ara ananga: bae ninga ngowa-ngowa'a were'a 'aḏi molo'ara manga ngowa-ngowa'a nau'u, bolo ninga ngowa-ngowa'a nau'u 'aḏi molo'ara manga ngowa-ngowa'a were'a, 4la awa ananga gena-ge ḏuanga i'a 'aḏi sikiḏanga ninga ngowa-ngowa'a nau'u ra Ma JOU kara 'aḏi siḏagi jou'ongu ma somoara ma mau. Dadi Ma JOU 'ai duruta ga'a ma tero sa'olo u'u, enanga ḏuanga i'a 'i leja-lejanga ra ngini singadolo Unanga jau-jau 'O singi-ngiranga ngini. 5Mada'a ngini balasu ni 'a'a so'o nena-ne: bangsa-bangsa gena-ge manga jou'ongu ma somoara ma jou-jou ma ngi'i, ngini balasu na siruba, ananga gena-ge manga ngasu-ngasu'u maḏi, ngini balasu na siwejere, ananga gena-ge manga ngasu-ngasu'u ate di'a jou'ongu ma somoara we-were'a ngo Asyera, ngini na tawele, re ananga gena-ge manga dulada-dulada ate ma duhu 'oru ḇato, ngini na tau'u. 6Si'a'a mo-moini gena-ge sababu ngini reni siwola i'a di'a Ma JOU Ma Jou'ongu Madutu ga'a ngini silamo'o re siḏubuso di'a Ta Unanga. Toma bangsa mo-moini toma dungia sitabi donga, pa'i ngini ḇato ga'a Ma JOU nu cumutu di'a ni dadi 'Ai 'umata masiretene. Unanga gena-ge Ma Jou'ongu Madutu ga'a ngini ni silamo'o re siḏubuso.
7<<Ma JOU 'o sitantukanga di'a dadalara ngini re 'O cumutu ngini sa'olo 'Ai 'umata, gena-ge ma sababu ngini lebe lamo'o ua reo bangsa-bangsa ma lelegu; ma nyonyata mode-mode'e ngini gena-ge bangsa ga'a lai ceka'a toma dungia nena-ne. 8Mada'a Ma JOU 'O cumutu ngini sababu Unanga 'O dadalara ngini re mau 'A sitotomo 'Ai jaji ga'a Ro si'a'a rema sasi taninga ngimo-ngimono singadolo Unanga 'O sigasa ngini supu toma Mesir Rai kuasa ma pari cua re tuusu ngini toma ngi'i ga'a ngini ni dadi budaka toma Firaun 'olana Mesir 'ai kuasa. 9Sababu gena-ge, sidaioranga awa mangale Ma JOU Ma Jou'ongu Madutu ga'a ngini ni silamo'o re siḏubuso, pa'i Unanga gena-ge ḇato Ma Jou'ongu Madutu. Re ngini nyengara ni sigare ninga ngo-ngaku ra Unanga di'a 'O sitotomo 'ai jaji re 'O sijumu 'Ai dadalara ga'a 'i ngali ua singadolo ju'uda cala rema cala ananga gena-ge ga'a dadalara Unanga re siḏagi 'Ai parenta-parenta. 10Mada'a Unanga 'o balasa ananga ga'a emono Unanga singadolo 'O singi-ngiranga ananga. Unanga 'O taka-taka ua 'O sihukumu ananga gena-ge ga'a 'aḏi emono Unanga. 11Sababu gena-ge, ngini balasu ni siḏagi tau-taunu huku-hukumu re 'atoranga-'atoranga mo-moini toma parenta rimoi gena-ge ma dara ga'a ngoi, Musa, ta singadolo ḏua ra ngini wangere nange-ne.>>
Barakati di'a ngowa'a ga'a mete'e
(Dad. 28:1-14)
12'A Musa 'o kanau moju toma ngowa'a Israel ma betongo so'o ne:<<Na'o ngini ni totoho la-la 'atoranga-'atoranga re siḏagi gena-ge tau-taunu, Ma JOU Ma Jou'ongu Madutu ga'a ngini silamo'o re siḏubuso, Unanga 'a sitotomo 'Ai jaji re 'A sijumu 'Ai dadalara ga'a 'i ngali ua ra ngini. Unanga 'a siḏagi so'o gena-ge mete'e 'Ai jaji ga'a 'O 'a'a rema sasi taninga ngimo-ngimono. 13Unanga ḏuanga i'a 'O dadalara re sibarakati ngini, singadolo ni sanga ngowa-ngowa'a repe re ngini ganapu ma dogo-dogo. Unanga ḏuanga i'a 'O sibarakati ninga guḏa-guḏa singadolo enanga ma hasili gandum, 'ang̱gur, re zaitun ma goroho, Unanga ḏuanga i'a sibarakati ngini singadolo ninga sapi ma nau'u re were'a, 'abingi re doba lai repe. Barakati mo-moini gena-ge, ngini ḏuanga i'a na sanga toma daeraha ga'a Ma JOU Ro 'a'a jaji rema sasi taninga ngimo-ngimono. 14Bangsa rimoi i'a mai ua toma dungia nena-ne ma dara, ga'a Ma JOU ya'u sibarakati pai'i reo ngini singadolo bae we-were'a re na-nau'u matengo i'a mai ua ga'a kama ngowa'a ua, bae ninga haiwani biara rimoi i'a mai ua ga'a kama ngowa ua. 15Ma JOU ḏuanga i'a 'O saolo ngini toma si-siḏi 'oru ḇato re 'O sikiḏanga ngini toma bahala mo-moini ga'a ninga ngimo-ngimono raḏi oḏi'i toma Mesir. Mada'a bahala mo-moini gena-ge 'i singa'unu taninga lawa-lawana ga'a 'aḏi emono ngini. 16Bangsa le'a ḇato ga'a Ma JOU Ma Jou'ongu Madutu ga'a ngini silamo'o re siḏubuso Unanga gena-ge 'O sipula'a ra ngini, ngini balasu na'u singi-ngiranga. Awa ni basono dadalara ra ananga. Awa ni siḏagi manga jou'ongu ma somoara ma mau. Sababu na'o ni si'a'a so'o gena-ge ma tero sa'olo ni piri'u toma jojoḏi ma dara ga'a ni sibebasa diri yoḏu'u.>>
17<<Ḏa ngini nyengara ni kanau taninga 'akala re sinyingara ma dara so'o ne: <Bangsa-bangsa nena-ne lebe repe re te'e reo ngene. Sanga ua, ngene nyengara wa'u dusu'u ananga!> 18Awa mojongo ananga. Mada'a ni 'elingi 'oru ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge Ro si'a'a toma 'olana Mesir re tai rayata mo-moini. 19'Elingi ma bahala-bahala lamo'o ga'a ninga ngimo-ngimono masiretene ya oḏi'i ḏua. 'Elingi ḏi'i ga'a 'i hera-heranga, didina'o-didina'o heranga, re kuasa re de-de'e lamo'o ga'a Ma JOU Ma Jou'ongu Madutu ga'a ngini silamo'o re siḏubuso Unanga gena-ge 'A sijumu wakutu 'O sigasa ninga ngimo-ngimono supu toma Mesir. So'o gena ḏi'i Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ḏuanga i'a 'O si'a'a toma bangsa mo-moini ga'a ngini na'u mojongo. 20Re dogo ḏi'i, Ma JOU, Unanga gena-ge Ma Jou'ongu Madutu ga'a ngini silamo'o re siḏubuso, Unanga ḏuanga i'a 'O si'a'a ananga 'aḏi mojongo, singadolo kalaha ngowa'a ga'a 'aḏi wiḏi re 'aḏi magogono, ananga gena-ge ḏi'i mai ngini na'u singi-ngiranga mo-moini. 21Dadi mojongo awa toma bangsa-bangsa gena-ge. Sababu Ma JOU Ma Jou'ongu Madutu ga'a ngini silamo'o re siḏubuso, Unanga 'age taninga sigolona. Unanga gena-ge Ma Jou'ongu Madutu ga'a kuasa lamo'o ma pari cua re ngini balasu ni mojongo pa'i Unanga ḇato. 22Mada'a Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'o dusu'u bangsa-bangsa gena-ge ceka'a ua-ceka'a ua taninga momina. Awa ngini ni singi-ngiranga ananga ca-caiti yoḏu'u, la haiwani-haiwani nga-ngabala awa 'i ma dogo-dogo singadolo 'i repe woḏi re 'i dadi bahaya di'a ngini. 23Mada'a Ma JOU, Ma Jou'ongu Madutu ga'a ngini silamo'o re siḏubuso Unanga ḏuanga i'a 'O sipula'a ananga ra ngini re Unanga 'o siruwahe ananga mode-mode'e singadolo ananga 'aḏi iranga moini. 24Unanga ḏuanga i'a 'O sipula'a manga 'ola-'olana ra ngini. Ananga ngini ḏuanga i'a na'u singi-ngiranga singadolo manga lomanga ri 'elingi riwara. Matengo i'a mai ua nga'unu matahana talaḏi ngini; ananga mo-moini ngini ḏuanga i'a na'u singi-ngiranga. 25Ni tau'u manga jou'ongu ma somoara ma dulada-dulada ga'a ananga ya silamo'o re siḏubuso. Awa ni nyafusu salaka bolo guraci ga'a 'o pata toma dulada-dulada gena-ge. Re awa na 'oro di'a ninga diri masiretene, la awa enanga gena-ge 'i piri'u ngini ninga 'akala re sinyingara ma nyafusu ma tero sa'olo jojoḏi singadolo ni silamo'o re siḏubuso dulada gena-ge, sababu ga'a gena-ge Ma JOU 'a emo-emono, re Unanga gena-ge Ma Jou'ongu Madutu ga'a ngini ni silamo'o re siḏubuso. 26Awa ni singosama dulada rimoi i'a mai ua taninga wala ma dara sababu ngini 'i sirimoi reo dulada gena-ge re ḏuanga i'a siwola i'a di'a singi-ngiranga kasingadolo-ngadolo i'a. Ngini balasu ni emo-emono mode-mode'e re emono dulada gena-ge, sababu gena-ge 'i siwola i'a di'a singi-ngiranga kasingadolo-ngadolo i'a.>>
Currently Selected:
Dadunu 7: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
