Mateu 14
14
Kutsa ca Yiuano Muka Kumbuitika
(Mako6:14-29; Luka9:7-9)
1Ha ntsimbu ije muene Helonde omo uevuile lutsimo lua Yesu, 2kaha uahandekele kuli vangamba vendi nguendi, “Ou ikeye Yiuano muka kumbuitika, vanamusangula ku vatsi, mukemo evi vinzili vili nakupanga muli ikeye.”
3Muomu Helonde uakuatele Yiuano nakumukuta nakumuhaka mu kamenga, muomu ya mulonga ua Helondiya mpuevo ya munaina Filipu, 4muomu Yiuano uahandekele kuli ikeye nguendi, “Kuya ku lishiko yove ku uapandele kumuambata.” 5Cipue vene uatondele kumutsiha, vuno honi kamutsihile uateuele vantu, muomu vamuvuile nguavo uapuile kananguizi.
6Vuno honi omo litangua lia kuvuluka kusemuka ca Helonde liahetele, muna Helondiya uampuevo uakinine hakati ka civunga ca vantu kaha uavuahelesele Helonde, 7nankuma uamukulahesele nakulisinga kumuhana vioshe viatondele kulomba.
8Muomu vaina vamusindiyile, kaha ualombele nguendi, “Njihane mutue ua Yiuano muka kumbuitika ha lilonga.”
9Vuno honi muene uovuile vusiua, muomu yakulisinga cendi na vangenzi vendi vaje vakele navo, kaha uashikile linga vamuhane vije vialombele, 10nankuma vayile nakukateta mutue ua Yiuano mu kamenga. 11Kaha mutue uendi vaunehele ha lilonga naku uhana kuli muana mpuevo, kaha ua uhanene vaina. 12Kaha vandongisi va Yiuano vezile nakuambata muvila uendi naku utsinda, kaha vayile nakukalekesa Yesu.
Yesu Ahana Viakulia Makulukazi Atanu a Vantu (5, 0 0 0)
(Mako6:30-44; Luka9:10-17; Yiuano6:1-14)
13Honi omo Yesu uovuile eci, uahumine kuje mu vuato kaha uayile kumutambela ua likaliendi. Vuno honi omo vivunga viovuile eci, viamukavele ha mavu kuhuma ku vinganda. 14Omo Yesu uayile ha ntunda uamuene civunga cakama, kaha uavovuililile ngozi, kaha uavakanguisile ku mishongo yavo.
15Omo capuile cinguezi, vandongisi va Yesu vezile kuli ikeye nakuhandeka nguavo, “Cino cinapu cihela ca kuholoka, kaha litangua honi liatoko, kaha leka vivunga linga vaye ku membo vakalilandele viakulia vakevo vavenia.”
16Kaha Yesu uahandekele nguendi, “Kuvapandele kuya, vahaneniko vimo valie.”
17Kaha vahandekele kuli ikeye nguavo, “Tuli lika na vimbolo vitanu na vantsi vavali.”
18Kaha Yesu uahandekele nguendi, “Vineheni kuno kuli yange.” 19Kaha uashikile vivunga ngeci vatumame ha muila, kaha uambatele vimbolo vitanu na vantsi vavali kaha uatalele muilu, kaha uavikuisuile, nakutavuozola vimbolo nakuvihana kuli vandongisi vendi, kaha vandongisi vendi vavihanene ku vivunga. 20Kaha voshe valile nakukuta. Kaha vakunguilile mitonga ya vimbazuvuila ya kushula ya kupua likumi na ivali. 21Kaha vaje valile vapuile ngue makulukazi atanu a vamala, kuhumisako vampuevo na vanike.
Yesu Enda ha Mema
(Mako6:45-52; Yiuano6:15-21)
22Hajevene Yesu ualekele vandongisi vendi linga vakovele mu vuato vaye kulutue luendi musinia tele ikeye acili na kuleka vivunga linga vaye. 23Kaha hanima ya kuleka vivunga linga vaye, uaille helu lia munkinda lika liendi mukulombela. Uakele kuje likaliendi noho cinguezi, 24vuno honi ha ntsimbu ije vuato vuakele hakati ka cisali kaha vuakele nakulininganga na mankimba muomu mpunzi yakele nakuvuluisa.
25Kaha ku vandemba Yesu uezile kuli vakevo, oku alinakuenda helu lia mema. 26Vuno honi omo vandongisi vendi vamumuene ali nakuenda ha mema, vovuile liova cikuma kaha vahandekele nguavo, “Ndumba ya muntu!” Kaha vatambekele naliova.
27Kaha hajevene Yesu uahandekele kuli vakevo nguendi, “Simpeni, keti muteue yange vene.”
28Kaha Petulu uahandekele kuli ikeye nguendi, “Muene, nga yove, njileke njije kuli yove nange njende ha mema.”
29Kaha Yesu uahandekele nguendi, “Ija.” Kaha Petulu uahumine mu vuato nakuenda ha mema kuya kuli Yesu, 30vuno honi omo uamuene mpunzi uateuele, kaha uaputukile kuvombela kaha uatambekele nguendi, “Muene njovole.”
31Hajevene Yesu uoluele livoko liendi, nakumukuata kaha uahandekele nguendi, “Yove muntu ua lutsilielo lua lundende, Nkuma vika uli nakulikanouela?” 32Kaha omo vakovelele mu vuato mpunzi yahuile. 33Kaha vaje vakele mu vuato vamulemesele nguavo, “Muavusunga u Muna Njambi.”
Yesu Akanguisa Vaka Kuvavala mu Ngenesaleta
(Mako6:53-56)
34Kaha omo Yesu na vandongisi vendi vajavukilile musinia, vezile ku cihela ca Ngenesaleta. 35Kaha omo vantu vakumutambela uje vamuzivukile, vatumine voshe vaku cihela cije nakumunehela voshe vaje vakele na kuvavala. 36Vamulombele linga vakuate cipue ku mukunduilo ua kazaku kendi, kaha voshe vaje vakuateleko vakangukile.
Currently Selected:
Mateu 14: NNTZ
Highlight
Share
Copy
Want to have your highlights saved across all your devices? Sign up or sign in
