Mateu 13
13
Cisimo ca Muka Kukuva Vimbuto
(Mako4:1-9; Luka8:4-8)
1Ha Litangua lije vene, Yesu uahumine mu njivo kaha uayile nakukatumama ku mukulo ua cisali. 2Kaha vivunga viakama viezile kuli ikeye nakumuzengeleka, nankuma uakovelele mu vuato nakukatumama, kaha civunga coshe cemanene ku cikuma ca cisali. 3Kaha uavalekele viuma viavingi mukulikuasesa visimo nguendi,
“Muka kukuva uayile nakukuva. 4Kaha omo uakele nakukuva vimbuto vimo viauililile ku mukulo ua ngila, kaha tuzila vezile nakuvilia. 5Kaha vimbuto vikuavo viauililile ha mavue aje kuhakele livu lialingi, kaha hajevene viasokele, muomu kuhakele livu lia lingi. 6Vuno honi omo litangua liatuhukile kaha vije vimbuto viajujuamene, muomu mizi yavio kuyakovelele cikuma mu livu, kaha vije vimbuto viomine. 7Vimbuto vikuavo viauililile hakati ka mingonga, kaha ije mingonga yakolele nakuvituva. 8Vimbuto vikuavo viauililile ha mavu acili kaha viemine muacili, vimo vimbuto vihita, vimo viemine vimbuto makumi atanu na limo, kaha vikuavo naua viemine vimbuto makumi atatu kupulakana vije vivakunine. 9Uoshe uje hali na matuitui ovue.”
Vutumbe vua Visimo
(Mako4:10-12; Luka8:9-10)
10Ambahoni vandongisi vezile kuli Yesu nakuhandeka nguavo, “Vika honi ukahandekela navo mu visimo?”
11Kaha uavakumbuluile nguendi, “Yeni vanamihana kuzivuka vushueke vua vumuene vua muilu, vuno honi kuli vakevo kuvavahanenevuo. 12Muomu uoshe uje alinavio vakamuvuezelako vikuavo naua, kaha akakala na viavingi, vuno honi uje kesi cipue nacimo, cipue cije cali naco vakamuniekaco. 13Eci cikeco canehesa linga njihandeke navo mu visimo muomu vakevo vamona, vuno honi kuvamonesesa, kaha vovua, vuno honi kuvevuisisa. 14Cilivene kuli vakevo vinalishulisisa vije viahandekele kananguizi Isaya nguendi,
“‘Cilivene mukevua vuno honi kumukevuisisa,
kaha cilivene mukamona vuno honi kumukamonesesa.
15Muomu mitima yava vantu inahono mana,
kaha na matuitui avo anaziki,
kaha na mesho avo vana afuiki,
keti ngoconi mesho avo akamona
kaha na matuitui avo akevua,
kaha na mitima yavo ikevuisisa,
nakutengulukila kuli yange, muanahandeka Njambi,
linga njivakanguise.’
16“Vuno honi akukuisula mesho eni muomu amona, na matuitui eni, muomu ovua. 17Muavusunga njihandeka kuli yeni nguange, tunanguizi vavengi na vantu va vusunga vatondele kumona cikuma evi vimuli nakumona, vuno honi kuvavimuene, nakuivua vije vimulinakuivua, vuno honi kuvaviuvuile.
Yesu Alumbununa Cisimo ca Muka Kukuva Mbuto
(Mako4:13-20; Luka8:11-15)
18“Ambahoni ivuilileni cisimo ca uje muka kukuva. 19Omo uoshe uje ovua lizi lia Vumuene kaha kaliuvuisisa, kaha uje muka vupi eja nakuambata vije vivanakuvu mu mutima uendi, eyi ikeyo mbuto ije ivakuvile ku mukulo uangila. 20Kaha mbuto ije ivakuvile ha mavu a mavue, ava vakevo vaje vovua lizi kaha hajevene valitambula nanzolela, 21vuno honi kuliesi na mizi muli vakevo, kaha likala lika muka ntsimbu kandende. Kaha omo tuyando cipue mapakeso vija muomu ya lizi, kaha hajevene kuvalikavangeya. 22Kaha vimbuto vije vivakuvile ha mingonga, ava vakevo vovua lizi, vuno honi omo ha kuzanga via ha mavu nakuzanga vufuko vua mavu kaha vikatuva lije lizi, kaha kulikemi vushuka. 23Kaha ije mbuto ivakuvile ha mavu acili, ava vakevo vaje vovua lizi nakulivuisisa, vakevo cilivene vakema vushuka vavuingi vuakupua vimo vimbuto vihita, vimo vikuavo viemine makumi atanu na limo, kaha vikuavo naua viemine makumi atatu kupulakana vije vivakuvile.”
Cisimo ca Shaku
24Kaha Yesu uavatelele cisimo cikuavo naua nguendi, “Vumuene vua muilu tuasa kuvusetekesa ngue yala uje uakuvile mbuto yacili mu lihia liendi, 25vuno honi tele vantu vanakosa, citozi cendi uezile nakukuva shaku muje mu lihia lia tiliku, kaha uayile. 26Omo ije tiliku yakolele nakuhaka vinona ambahoni naikeyo ije shaku yasholokele. 27Kaha vaje vangamba vendi vezile kuli ikeye nakumuleka nguavo, ‘Muene nkuma ku uakunine lika mbuto yacili mu lihia liove ndi? Kaha cineja vati honi linga mukale naua na shaku?’ 28Kaha uahandekele kuli vakevo nguendi, ‘Kuli citozi uje nalingi eci.’ Kaha vaje vangamba vendi vahandekele kuli ikeye nguavo, ‘Nkuma utonda linga tuye tukaitukulemo ndi?’ 29Vuno honi uavakumbuluile nguendi, ‘Houe!’ Muomu muje mu mukaitukulamo ije shaku hamo mukatukuila kumo na tiliku. 30Vieceleni vioshe linga vikole kuvanga noho ha ntsimbu yakuteja, kaha ha ntsimbu yakuteja njikaleka vaka kuteja nguange, ‘Tukulenimo tahi shaku muikute mikuta, kaha itsimikeni, vuno honi kungululeni tiliku nakuihaka mu cishete cange.’”
Cisimo ca Mbuto ya Musalata
(Mako4:30-32; Luka13:18-19)
31Kaha Yesu uavatelele cisimo cikuavo naua nguendi, “Vumuene vua muilu vunapu ngue nona ya mbuto ya musalata ije muntu uambatele nakukuna mu lihia liendi. 32Yapua yaindende cikuma ku vimbuto vioshe, vuno honi omo ikola ikapu ciputa cakama na kukola kupua muti, nankuma tuzila va muilu vakeja nakutungila mashua ha mitango yauo.”
Cisimo ca Cimbaluila
(Luka13:20-21)
33Kaha Yesu uavatelele naua cisimo cikuavo nguendi, “Vumuene vua muilu vuapua ngue cimbaluila cije mpuevo uambatele nakucishingasanena ha lilonga haje hakele vinganja vitatu via vunga vua tiliku kuvanga noho vioshe viafutunukile.”
Vika Yesu Akalikuasesela Visimo
(Mako4:33-34)
34Vioshe evi Yesu uavihandekele ku vivunga mu visimo, cilivene nacimo cahi cahandekele kuli vakevo kuakuhona kulikuasesa cisimo. 35Eci capuile kushulisisa vije viahandekele kananguizi nguendi,
“Njikafukula kanua kange mu visimo.
Njikahandeka vioshe vije vialishueka hume ha luvula lua mavu.”
Yesu Alumbununa Cisimo ca Shaku
36Ambahoni Yesu uasezele civunga nakuya mu njivo kaha vandongisi vendi vezile kuli ikeye nakuhandeka nguavo, “Tulumbunuine cisimo ca shaku ya mu lihia.”
37Kaha uavakumbuluile nguendi, “Uoshe uje akuna mbuto yacili napu Muna Muntu. 38Lihia likelio mavu, kaha mbuto ije yacili ilumbununa vana va Vumuene, kaha naije shaku inapu vana va muka vupi, 39kaha uje citozi uje ua ikuninemo ikeye napu Satana. Kaha kuteja cikeco kuhua ca mavu, kaha vaka kuteja vakevo tungelo. 40Ngue mujevene muvaka kungungulula shaku nakuitsimika na tuhia, mukemovene mu cikafua naku mamanusuilo a mavu. 41Muna Muntu akatuma tungelo vendi, kaha vaka kunguluila hamo vije vikanehesa vupi navaje vakalingi vupi mu Vumuene vuendi, 42nakuvombila mu litende lia tuhia, kuje vantu vaka lila nakulishumanga ku mazo 43Ambahoni vaka vusunga vaka viakuma ngue litangua mu vumuene vua Ishavo, uoshe uje ali na matuitui ovue.
Cisimo ca Vufuko Vuakushueka
44“Vumuene vua muilu vunapu ngue vufuko vuakushueka mu lihia, vuje omo muntu avuuana kaha avushueka naua ambahoni hakuvuahelela cendi aya nakukalandesa vioshe vije alinavio kaha alanda lije lihia.
Cisimo ca Vusanga vua Seho
45“Naua Vumuene vua muilu vunapu ngue muntu uje muka kulandesa uje atonda vusanga vuaseho, 46uje omo auana vusanga vumo vua seho yakama, kaha aya nakukalandesa vioshe vije alinavio kaha akavulanda.
Cisimo ca Vuanda vua Kuta Vantsi
47“Naua Vumuene vua muilu vunapu ngue vuanda vua kuta vantsi vuje vuvanate mu cisali kaha vutsiha muyati uoshe ua vantsi, 48omo vuashulile vamala vavukokelele ha ntunda kaha vatumamene nakuhangulamo vantsi vacili nakuvahaka mu mitonga yavo vuno honi vombilile vaje vakupihia. 49Nankuma omu mukemo mucikafua naku mamanusuilo a mavu. Tungelo vakeja nakutepesa vaka vupi ku vaka vusunga, 50nakuvombila mu litende lia tuhia, kuje vantu vakalila nakulishumanga ku mazo
Vusunga vua Vuha novu vua Laja
51“Yesu uavehuile nguendi, nkuma munaviuvuisisa viuma vioshe evi ndi?”
Kaha vamukumbuluile nguavo, “Eyo.”
52Kaha uahandekele kuli vakevo nguendi, “Nankuma uoshe mulongisi ua mashiko uje ivalongesele via Vumuene vua muilu napu ngue uje vavenia njivo, uje ahumisa vufuko vuendi vua laja novu vua vuha mu citulikilo cendi.”
Yesu Vamuviana ku Nazaleta
(Mako6:1-6; Luka4:16-30)
53Kaha omo Yesu uamanusuile kuta vije visimo, uahumineko kuje, 54nakuya ku cifuti cendi nakukavalongesa mu njivo yavo ya malombelo, kaha vaje voshe vamuvuile vali komokelele cikuma nakuhandeka nguavo, “Nkuma kuli ou yala kuanauana mana aua na vikomoueso evi? 55Nkuma ou keti ikeye muna uje muka kushonga ndi? Nkuma vaina keti Maliya? Nkuma vamunaina keti Yakomba, na Yosefa, na Simoni na Yunda ndi? 56Nkuma vashongo vendi voshe va vampuevo keti ava tuli hamo navo ndi? Nkuma kuli honi ou yala nauana vioshe evi?” 57Kaha vamuvianene.
Vuno honi Yesu uahandekele kuli vakevo nguendi, “Kananguizi kuveku musingimika mu cifuti cendi cipue muimbo liendi kuvanga lika kueka.” 58Kaha kalingilileko vikomoueso kuje muomu ya kuhona kutsiliela cavo.
Currently Selected:
Mateu 13: NNTZ
Highlight
Share
Copy
Want to have your highlights saved across all your devices? Sign up or sign in
