Башталганы 12

Кайракан Аврамды Ханаанга кычырат

1Кайракан Аврамга айткан:

– Орооныҥды, јуук улузыҥды, адаҥныҥ айлы-јуртын артырып, Мен сеге айдып берген јерге бар. 2Мен сенеҥ улу калык бӱдӱрерим, сени алкап, адыҥды улу эдерим: улус сениҥ адыҥды адап, сен ажыра алкыш алар. 3Сени алкап тургандарды Мен алкаарым, сени каргап тургандарды каргаарым. Сен ажыра јердиҥ ончо калыктары алкалар.

4Кайраканныҥ айтканынча, Аврам јеринеҥ јӱрӱп ийген; оныла кожо Лот барган. Аврам Харраннаҥ чыгып барарда, јетен беш јашту болгон. 5Ол бойыла кожо Сара ӱйин, Лот јеенин, ар-јӧӧжӧзин ле Харрандагы ончо улузын алып, олорло Ханаан јерине ууланган.

Олор Ханаанга једип, 6Шехемниҥ јуугында эрмен агаштарлу Море деп јерге келген. Ол тушта бу јерде ханаанейлер јуртаган, 7је Аврамга Кайракан келип:

– Мен бу јерди сениҥ калдыктарыҥа берерим, – деп айткан.

Анда Аврам Кайраканга тагыл тургускан.

8Оноҥ Аврам Бет-Элдиҥ кӱнчыгыш јанында турган кырларга ууланып, анда бойыныҥ кийис айылдарын тургускан. Анайып, оныҥ кӱнбадыш јанында Бет-Эл, кӱнчыгыш јанында Ай болгон. Анда Аврам Кайраканга тагыл тургузуп, Кайраканныҥ адын адап бажырган. 9Оноҥ тӱштӱкти – Негевти – кӧстӧп барган.

Аврам ла фараон. Аврам Сараны сыйнызы деп тӧгӱнденет

10Ороондо ачана-торо башталган. Ачана-торо тыҥып турарда, Аврам Египет јаар ууланган. 11Египетке јууктап келеле, Сарага айткан:

– Сен јараш ӱй кижи ине. 12Египеттиҥ улузы сени кӧрӧлӧ, мениҥ ӱйим деп оҥдоп ийер. Мени ӧлтӱрӱп, сени дезе тирӱ артырар. 13Олорго сен мениҥ сыйным деп айт, ол тушта ончозы јакшы болор: сен мениҥ јӱрӱмимди аргадап аларыҥ.

14Аврам Египетке келерде, Египеттиҥ улузы Сара сӱрекей јараш ӱй кижи деп кӧрӱп ийгендер. 15Фараонныҥ кӧдӧчилери Сараны кӧрӧлӧ, оныҥ јаражын фараонго мактагылап, оны фараонныҥ ӧргӧӧзине экелгендер. 16Сараныҥ шылтузында Аврамныҥ керектери јакшы болгон: ондо оок то, јоон до мал-аш, эркек ле тижи эштектер, тӧӧлӧр бар болгон. Анайда ок, эр де, уй де кул улус бар болгон.

17Је Кайракан фараонго ло оныҥ јуук улузына Аврамныҥ ӱйи Сара учун јаан тӱбек, оору-јобол ийген. 18Фараон Аврамды бойына кычырып, айткан:

– Сен не анайда эттиҥ? Ол сениҥ ӱйиҥ деп, меге не айтпадыҥ? 19Нениҥ учун оны сыйным деп айттыҥ? Оныҥ учун мен оны ӱй кижи эдип аларга санандым. Эмди ӱйиҥди алганча, мынаҥ бар.

20Фараон Аврамды ӱйиле, бары-јогыла ороонынаҥ јӱрзин деп јакарган.

Currently Selected:

Башталганы 12: АЛТ

Highlight

Copy