Башталганы 11

Вавилонныҥ баканазы

1Ол ӧйдӧ бастыра јер-телекейде јаҥыс тил ле бир тӱҥей эрмек-куучын болгон. 2Улус кӱнчыгыштаҥ барып, Шинар ороондогы ӧзӧккӧ једип, анда јуртай берген.

3– Той балкаштаҥ кирпичтер эдип, отло ӧртӧп кадырып алактар, – деп, олор бой-бойлорына айдышкан.

Анайып, таштыҥ ордына кирпич, череттиҥ ордына сары тӧгӧт тузаланып баштагандар.

4– Бойыска кала ла теҥериге јетире бийик бакана тудалы, – деп, олор јӧптӧшкӧндӧр. – Анайып, бистиҥ ады-јолыс чыгар, јер сайын тарап-таркап калбазыс.

5Улустыҥ тудуп јаткан калазын ла бакананы кӧрӧргӧ, Кайракан теҥеридеҥ тӱшкен. 6Кайракан:

– Бу улус – бир калык, ончозыныҥ тили јаҥыс, – деген. – Олор эдетен керегин баштап алган, эдейин дегенин этпегенче, токтобос. 7Олорго тӱжӱп, тилдерин колыштырып, эрмек-куучынын аайлашпас эдип койоктор.

8Кайракан улусты мынаҥ јер сайын чачылткан, кала јетире тудулбай артып калган. 9Оныҥ учун бу кала Вавилон деп адалган – анда Кайракан јер-ӱстиниҥ ончо улузыныҥ тилин колыштырып, јер сайын чачкан.

Симниҥ калдыктары

10Бу Сим ле оныҥ калдыктары керегинде куучын.

Чайыктыҥ кийнинде, эки јылдыҥ бажында, јӱс јашту Сим Арпахшад деп уулду болгон. 11Арпахшад чыккан кийнинеҥ Сим беш јӱс јыл јӱрген, база уулдарлу ла кыстарлу болгон.

12Арпахшад одус бештӱде Шелах деп уулду болгон. 13Шелах чыккан кийнинеҥ Арпахшад тӧрт јӱс ӱч јыл јӱрген, база уулдарлу ла кыстарлу болгон.

14Шелах одустуда Эвер деп уулду болгон. 15Эвер чыккан кийнинеҥ Шелах тӧрт јӱс ӱч јыл јӱрген, база уулдарлу ла кыстарлу болгон.

16Эвер одус тӧрттӱде Пелег деп уулду болгон. 17Пелег чыккан кийнинеҥ Эвер тӧрт јӱс одус јыл јӱрген, база уулдарлу ла кыстарлу болгон.

18Пелег одустуда Реу деп уулду болгон. 19Реу чыккан кийнинеҥ Пелег эки јӱс тогус јыл јӱрген, база уулдарлу ла кыстарлу болгон.

20Реу одус экилӱде Серуг деп уулду болгон. 21Серуг чыккан кийнинеҥ Реу эки јӱс јети јыл јӱрген, база уулдарлу ла кыстарлу болгон.

22Серуг одус јаштуда Нахор деп уулду болгон. 23Нахор чыккан кийнинеҥ Серуг эки јӱс јыл јӱрген, база уулдарлу ла кыстарлу болгон.

24Нахор јирме тогус јаштуда Терах деп уулду болгон. 25Терах чыккан кийнинеҥ Нахор јӱс он тогус јыл јӱрген, база уулдарлу ла кыстарлу болгон.

26Терах јетен јаштуда Аврам, Нахор ло Харан деп уулдарлу болгон.

Терахтыҥ уулдары

27Бу Терах ла оныҥ калдыктары керегинде куучын.

Терах Аврам, Нахор ло Харан деп уулдарлу болгон. Харан Лот деп уулду болгон. 28Адазы Терах эзен тушта, Харан тӧрӧл јеринде, Ур Халдейде, јада калган. 29Аврам ла Нахор айыл туткан. Аврамныҥ ӱйиниҥ ады Сара, Нахордыҥ ӱйиниҥ ады Милка. Милка Харанныҥ кызы болгон (Харан Милка ла Искениҥ адазы). 30Сара бала табынбас болгон, оноҥ улам ондо балдар јок болгон.

31Терах Ур Халдейдеҥ чыгып, Ханаан јерине ууланган. Оныла кожо уулы Аврам, барказы Лот (Харанныҥ уулы), келди Сара (Аврамныҥ ӱйи) болгондор. Олор Харран јерине једип, анда јуртай берген. 32Терах Харранда эки јӱс беш јаштуда јада калган.

Currently Selected:

Башталганы 11: АЛТ

Highlight

Copy