Башталганы 1
1
Јер-телекейди јайаганы
1Баштап Кудай теҥерини ле јерди јайаган.
2Јер кеп-бӱдӱм јок ло ээн болгон. Тӱби јок сууныҥ ӱстинде караҥуй болгон. Кудайдыҥ Тыны сууныҥ ӱстиле кайып јӱрген.
3Кудай:
– Јарык болзын, – деген.
Јарык боло берген. 4Јарык јакшы болгонын кӧрӧлӧ, Кудай оны караҥуйдаҥ башкалап, 5јарыкты «тӱш», караҥуйды дезе «тӱн» деп адаган.
Эҥир кирген, таҥ аткан – баштапкы кӱн ӧткӧн.
6Кудай айткан:
– Сууныҥ ортозында кӧк-телкем болзын, оны эки башка бӧлӱзин.
Анайда ла боло берген. 7Кудай кӧк-телкемди јайаган, онойып кӧк-телкемниҥ алдында сууны ла ӱстинде сууны эки башка бӧлӱген. 8Кӧк-телкемди «теҥери» деп адаган.
Эҥир кирген, таҥ аткан – экинчи кӱн ӧткӧн.
9Кудай айткан:
– Теҥериниҥ алдындагы суу бир јерге јуулзын, кургак јер кӧрӱнӱп келзин.
Анайда ла боло берген. 10Кудай кургак јерди «јер», бир јерге јуулган сууны «талай» деп адаган. Кудай кӧрзӧ, бу јакшы эмтир.
11Кудай айткан:
– Јердеҥ ӧзӱмдер ӧссин: ӱрен чачар јӱзӱн бӱдӱмдӱ ӧлӧҥдӧр лӧ ӧзӧгинде тӱжӱм берер ӱрендӱ јӱзӱн бӱдӱмдӱ агаштар.
Анайда ла боло берген. 12Јер ӧзӱмдер ӧскӱрген: ӱрен чачар јӱзӱн бӱдӱмдӱ ӧлӧҥдӧр лӧ ӧзӧгинде тӱжӱм берер ӱрендӱ јӱзӱн бӱдӱмдӱ агаштар. Кудай кӧрзӧ, бу јакшы эмтир.
13Эҥир кирген, таҥ аткан – ӱчинчи кӱн ӧткӧн.
14Кудай айткан:
– Теҥериде тӱшти тӱннеҥ аҥылайтан јарыткыштар болзын; олор ӧйлӧрди, кӱндерди ле јылдарды ылгаштырар аҥылу темдектер болзын. 15Олор теҥеринеҥ јаркындалып, јерди јарыдып турзын.
Анайда ла боло берген. 16Кудай эки јаан јарыткыш јайаган: јарыткыштардыҥ јааны тӱшти башкарып, кичӱзи дезе тӱнди башкарып турзун деп. Анайда ок, Ол јылдыстарды јайаган. 17-18Кудай олорды јерди јарыдып, тӱшти ле тӱнди башкарып, јарыкты караҥуйдаҥ бӧлӱп турзун деп, теҥериге кондурган. Кудай кӧрзӧ, бу јакшы эмтир.
19Эҥир кирген, таҥ аткан – тӧртинчи кӱн ӧткӧн.
20Кудай айткан:
– Сууларда тынар-тындулар кыймырашсын, јердиҥ ӱстиле, теҥериниҥ телкемиле куштар учсын.
21Анайып, Кудай талайдыҥ јаан балыктарын, сууда кыймырашкан јӱзӱн бӱдӱмдӱ тынар-тындуларды, канатту јӱзӱн-јӱӱр куштарды јайаган.
Кудай кӧрзӧ, бу јакшы эмтир. 22Кудай олорды алкап, айткан:
– Кӧптӧп ӧзӱгер, талайлардыҥ сууларын толтырыгар. Јердиҥ ӱстинде куштар кӧптӧзин.
23Эҥир кирген, таҥ аткан – бежинчи кӱн ӧткӧн.
24Кудай айткан:
– Јер јӱзӱн бӱдӱмдӱ тынар-тындулар бӱдӱрзин: мал-ашты, кыймырашкан курт-коҥысты, јердиҥ аҥдарын.
Анайда ла боло берген. 25Кудай јердиҥ јӱзӱн бӱдӱмдӱ аҥдарын, мал-ашты, јерде кыймырашкан курт-коҥысты јайаган. Кудай кӧрзӧ, бу јакшы эмтир.
26Кудай айткан:
– Бойыстыҥ сӱр-кебериске, Бойыска тӱҥей эдип кижи јайайлы. Кижи талайдыҥ балыктарын, теҥериниҥ куштарын, мал-ашты, јер-телекей ӱстин, јерде кыймырашкан курт-коҥысты башкарып јӱрзин.
27Анайып, Кудай кижини јайаган. Кудай оны Бойыныҥ сӱр-кеберине, Бойына тӱҥей эдип јайаган; эр кижини ле ӱй кижини јайаган. 28Кудай олорды алкап, мынайда айткан:
– Кӧптӧп ӧзӱгер, јерди толтырып, оны ээлегер. Талайдыҥ балыктарын, теҥериниҥ куштарын, јер ӱстинде кандый ла тындуларды, курт-коҥыстарды башкарып јӱригер.
29Кудай айткан:
– Јер ӱстинде кандый ла ӱрен чачар јӱзӱн бӱдӱмдӱ ӧлӧҥдӧрди ле тӱжӱм берер ӱрендӱ јӱзӱн бӱдӱмдӱ агаштарды Мен слерге курсак эдип берип јадым. 30Јердиҥ аҥдарына, теҥериниҥ куштарына, јерде кыймырашкан курт-коҥыстарга – кандый ла тынар-тындуларга дезе ӧзӱмдердиҥ кӧк-јажаҥын Мен курсак эдип берип јадым.
Анайда ла боло берген. 31Кудай Бойыныҥ јайаганын ајарып кӧрди – ончозы јакшы эмтир.
Эҥир кирген, таҥ аткан – алтынчы кӱн ӧткӧн.
Currently Selected:
Башталганы 1: АЛТ
Highlight
Share
Copy
Want to have your highlights saved across all your devices? Sign up or sign in
© Российское Библейское Общество, 2025
© Институт перевода Библии, 2025
