Башталганы 2
2
1Анайып, теҥери ле јер, олорды толтырган ончо неме бӱткен.
2Кудай Бойыныҥ ижин тӱгезип, јетинчи кӱнде Бойыныҥ керектеринеҥ токунаган. 3Кудай јетинчи кӱнди алкап, оны агару кӱн болзын деген. Не дезе Кудай јайаар ижин тӱгезип, бу кӱнде амыраган.
Адам ла Ева Эдем садта
4Теҥери ле јер канайда бӱткени керегинде куучын: Кудай Кайракан јерди ле теҥерини јайап турган тушта 5јердиҥ ӱстинде кандый да јыраа да, ӧлӧҥ дӧ јок болгон. Не дезе Кудай Кайракан јерге јаҥмыр ийгелек туш, јерде иштейтен кижи де јок болгон. 6Јӱк јердеҥ кӧдӱрӱлген буу јердиҥ ӱстин сугарып турган болгон.
7Кудай Кайракан кижини јердиҥ тобрагынаҥ бӱдӱрӱп, оныҥ тумчугына јӱрӱмниҥ тыныжын ӱрӱп ийерде, кижи тындана берген.
8Оноҥ Кудай Кайракан кӱнчыгышта Эдем деп јерде сад тарып отургузала, јайаган кижизин ондо јаттырган. 9Кудай Кайракан садта кӧрӧргӧ дӧ јараш, тӱжӱми де јакшы кандый ла агаштар отургускан. Садтыҥ ортозына дезе јӱрӱмниҥ агажын, јакшыныҥ ла јаманныҥ билгирин берер агаш ӧскӱрӱп салган.
10Эдемнеҥ чыккан суу садты сугарып, оноҥ ары тӧрт коолго айрыланып агат. 11Олордыҥ бирӱзиниҥ ады Пишон, ол алтынла бай Хавила деп ороонды эбире агат. 12Ол ороонныҥ алтыны јакшы, ондо база јараш јытту чагана ла баалу-чуулу оникс деп таш бар. 13Экинчи суу Гихон, ол Куш деп ороонды эбире агат. 14Ӱчинчи суу Тигр, ол Ассириянаҥ кӱнчыгыштай агат. Тӧртинчи суу – Эфрат.
15Эдем садты кичееп кӧрӱп турзун деп, анда кижини јаттырып, 16Кудай Кайракан ого мынайда јакыган:
– Садта бар кандый ла агаштыҥ алама-јиилектеринеҥ ји, 17је јаҥыс ла јакшыныҥ ла јаманныҥ билгирин берер агаштыҥ алама-јиилегин јибе. Јип ийзеҥ, ол ло кӱн ӧлӱп каларыҥ.
18Оноҥ Кудай Кайракан айткан:
– Кижиге јаҥыскан јӱрерге јаман. Ого јараар болушчы јайап берейин.
19Кудай Кайракан јердеги кандый ла аҥдарды ла теҥеридеги кандый ла куштарды јайап, олорды кижи канайып адаарын кӧрӧргӧ, кижиге экелген. Кижи тындуга кандый ат берген, ол онойып ла адалган. 20Кижи ончо мал-ашка, теҥеридеги куштарга, ончо аҥдарга ат адаган, је бойына јараар болушчы таппаган. 21Айдарда, Кудай Кайракан кижини калыҥ уйкуга кийдирип, оныҥ бир кабыргазын кодороло, ордын этле бӧктӧгӧн. 22Кудай Кайракан ол кабырганаҥ ӱй кижини бӱдӱреле, оны кижиге экелген. 23Кижи:
– Бу эмди сӧӧгимнеҥ бӱткен сӧӧк, эдимнеҥ бӱткен эт, – деген. – Эр кижинеҥ алылган учун, ол ӱй кижи деп адалар.
24Мыныҥ учун эр кижи ада-энезин артырып, ӱйиле јуртап, оныла бир эт-кан болот.
25Эр кижи ле ӱй кижи экилези куба-јылаҥаш болгондор, је уйалбайтандар.
Currently Selected:
Башталганы 2: АЛТ
Highlight
Share
Copy
Want to have your highlights saved across all your devices? Sign up or sign in
© Российское Библейское Общество, 2025
© Институт перевода Библии, 2025
