Saunt Matthew 8
8
1Whan he was come doun frae the mountain, a meikle thrang followet him.
2An’, behald, there cam’ a leper an’ worshippet him, sayin’, Lord, gif thou wilt, thou canst mak’ me clean.
3An’ Jesus pat furth his han’, an’ touchet him, sayin’, I will; be thou clean. An’ straughtway his leprosy was cleanset.
4An’ Jesus saith until him, See thou tell nae man; but gae thy gate, shaw thysel to the priest, an’ offer the gift that Moses commaundet for a witness until them.
5An’ whan Jesus was gane intil Capernaum, there cam’ until him a centurion, beseechin’ him,
6An’ sayin’, Lord, my servan’ lieth at hame ill o’ the palsy, sairly afflickit.
7Jesus saith until him, I will come an’ heal him.
8The centurion answer’t an’ said, Lord, I amna wordy that thou sudst come anunder my roof; but speak the word only, an’ my servan’ sall be healet.
9For I am a man in authority, haein’ sodgers aneath me; an’ I say til this man, Gae, an’ he gaeth; an’ til anither, Come, an’ he cometh; an’ til my servan’, Do this, an’ he doeth it.
10Whan Jesus hear’t it, he wonder’t, an’ said til thae wha followet, Verily I say unto you, I haena fund sae meikle faith, na, in a’ Israel.
11An’ I say until you, That mony sall come frae the east an’ wast, an’ sall sit doun wi’ Abraham, an’ Isaac, an’ Jacob, in the kingdom o’ heaven.
12But the childer o’ the kingdom sall be coost out intil outer mirkness; there sall be greetin’ an’ runchin’ o’ teeth.
13An’ Jesus said until the centurion, Gae thy gate; an’ as thou hast believet, sae be it dune until thee. An’ his servan’ was healet in that vera same hour.
14An’ whan Jesus was come intil Peter’s house, he saw his wife’s mither bedfast, an’ ill o’ a fever;
15An’ he touchet her han’, an’ the fever left her; an’ she rase up, an’ minister’t until them.
16Whan the gloamin’ was come they broucht until him mony wha were possesset wi’ deevils, an’ he coost out the spirits wi’ his word, an’ healet a’ wha were ill.
17That it micht be fulfillet whilk was spoken by Esaias the prophet, sayin’, Himsel teuk our infirmities an’ bure our sicknesses.
18Now whan Jesus saw a meikle thrang about him, he gied commaun’ment to gae til the ither side.
19An’ a certain scribe cam’, an’ said until him, Maister, I will follow thee whithersaever thou gaest.
20An’ Jesus saith until him, The tods hae holes, an’ the burds o’ the air hae nests; but the Son o’ man hathna whare to lay his head.
21An’ anither o’ his disciples said until him, Lord, let me first gang an’ bury my father.
22But Jesus said until him, Follow me; an’ let the dead bury their dead.
23An’ whan he was gane intil a ship, his disciples followet him.
24An’, behald, there rase up an unco tempest in the sea, insaemeikle that the ship was cover’t wi’ the waves; but he was sleepin’.
25An’ his disciples cam’ until him, an’ waukenet him, sayin’, Lord, saufe us: we perish!
26An’ he saith until them, Why are ye sae fearfu’, O ye o’ little faith? Syne he rase up, an’ rebuket the win’s an’ the sea; an’ there was an unco calm.
27But the men wonder’t, sayin’, What kind o’ man is this that e’en the win’s an’ the sea obey him?
28An’ whan he was come til the ither side intil the kintra o’ the Gergesenes, there met him twa possesset wi’ deevils comin’ out o’ the tombs, unco fierce, sae that nae man micht gang by that road.
29An’, behald, they criet out, sayin’, What hae we to do wi’ thee, Jesus, thou Son o’ God? art thou come here to torment us afore the time?
30An’ there was a guid way aff frae them a hirsel o’ mony swine feedin’.
31Sae the deevils besoucht him, sayin’, Gif thou cast us out, let us gae intil the hirsel o’ swine.
32An’ he said until them, Gae. An’ whan they were come out, they gaed intil the hirsel o’ swine; an’, behald, the hale hirsel o’ swine ran headlang doun a heugh intil the sea, an’ perishet in the waters.
33An’ they wha herdet them fled, an’ gaed their gate intil the toun, an’ tauld ilka thing, an’ what was befa’en to the possesset o’ the deevils.
34An’, behald, the hale toun cam’ out to meet Jesus: an’ whan they saw him they besoucht him that he wad gang awa out o’ their marches.
Currently Selected:
Saunt Matthew 8: SCOMAT
Highlight
Share
Copy
Want to have your highlights saved across all your devices? Sign up or sign in
Translated by George Henderson. Published in Londin in 1862.
