Apj 16
16
Timotäus wankt met Paulus un Silas met
1Hee kjeem oba uk no Derbe un no Liestra. Un kjikj, doa wia een jewessa Jinja met Nomen Timotäus, een Sän von eene jewesse jleewende judische Fru, oba een griechischa Voda. Apj 17:14; 19:22; 20:4; Flp 2:19-22; 1Tess 3:2,6 2Dee haud een goodet Zeichnis von de Breeda en Liestra un Ikonion. 3Disen wull Paulus met sikj gonen loten un neem un beschneet am om de Juden äat-haulwen, dee en jane Städa wieren; wiels see wisten aula, daut sien Voda een Griech wia. Gal 2:3 4Aus see oba derch de Städa reisden, äwajeewen see äant de Befälungen toom befoljen, waut von de Apostel un Eltestasch en Jerusalem enjesat wieren. 5Aulsoo worden de Jemeenten en däm Gloowen jestoakjt un neemen aule Dach too aun de Zol.
De Roop von Mazedonien
6Aus see dan derch Friegien un de galatische Launtschoft derchreisden, wort äant vom Heiljen Jeist veboden, daut Wuat en Asien to vekjindjen. Apj 18:23 7Aus see oba no Miesien kjeemen, vesochten see, no Bitienien to reisen; oba de Jeist leet äant daut nich too. 8Un see reisden bie Miesien vebie un kjeemen rauf no Troas. 9Un en de Nacht haud Paulus eene Vision: Een Maun von Mazedonien stunt un prachad am un säd: Komm äwa no Mazedonien un halp ons! 10Aus hee oba dise Vision jeseenen haud, vesocht wie fuaz no Mazedonien to reisen, wiels wie daut aunneemen, daut de Har ons beroopen haud, äant daut Evangelium to vekjindjen.
Liedia äare Bekjierunk
11Aulsoo fua wie von Troas loos un kjeemen met jlikje Rechtunk no Samotrake un dän näakjsten Dach no Neapolis 12un von doa no Filippi, dee de väanämste Staut es en daut Poat von Mazedonien un es eene Kolonie. Wie hilden ons oba atelje Doag en dise Staut opp.
13Un aum Sabatdach jinj wie rut ver de Staut, aum Wotastroom, wua see jewant wieren to bäden, un wie saden ons dol un räden to de Frues, dee toopjekomen wieren. 14Un eene jewesse gottesferchtje Fru met Nomen Liedia, eene Purpur-Hendlarin von de Staut Tiatira, horcht too; un de Har muak ar daut Hoat op, daut see oppmoakjsom wia opp daut, waut von Paulus jerät wort. 15Aus see oba jedeept wort un uk äa Hus, prachad see un säd: Wan jie rechten, daut ekj däm Harn tru sie, komt nenn en mien Hus un blieft doa; un see bedwunk ons.
Paulus un Silas em Jefenkjnis
16Daut passieed oba, aus wie toom Jebäd jinjen, daut ons eene Mejal bejäajend, dee eenen Woasaja-Jeist haud un äare Haren derch Woasajen väl Jewenst veschauft. 17Dise kjeem Paulus un ons hinjaraun, schrieech un säd: Dise Mana sent däm aulahechsten Gott siene Deena, dee ons dän Wajch von de Radunk vekjindjen. Mrk 1:24-34 18Un dit deed see väle Doag. Oba Paulus, dän dit besorjd, dreid sikj om un säd to däm Jeist: Ekj jebeed die em Nomen Jesus Christus, ut ar rut to komen! Un dee kjeem en deeselwje Stund rut. Mrk 16:17 19Aus äare Haren oba sagen, daut de Hopninj opp äa Jewenst veschwungen wia, jreepen see Paulus un Silas un schlapten äant opp dän Moakjt-Plauz ver de Bowaschte 20un brochten äant no de Hauptlied un säden: Dise Mana, de Juden sent, vewerren onse Staut Apj 17:6 21un vekjindjen Jewanheiten, dee ons nich erlaupt sent aun to nämen ooda to eewen, wiels wie Reema sent. 22Un daut Volkj räajd sikj opp jäajen äant; un de Hauptlied reeten äant de Kjleeda auf un befoolen, äant met Stakja to schlonen. 2Kor 11:25; Flp 1:30; 1Tess 2:2 23Un nodäm see äant väle Sträakja jejäft hauden, schmeeten see äant en daut Jefenkjnis un befoolen däm Jefenkjnis-Wajchta, äant secha to bewoaren. 24Disa, opp soon Befäl, schmeet äant en daut bennaschte Jefenkjnis un schloot äare Feet en dän Klotz.
De Jefenkjnis-Wajchta bekjieet sikj
25Un medden enne Nacht bäden Paulus un Silas un lowden Gott met Jesank; un de Jefangne hieeden äant. 26Un haustich kjeem doa een grootet Ieedbäben, soo daut de Gruntwenj vom Jefenkjnis jescheddat worden, un fuaz jinjen aul de Däaren op, un aul äare Kjäden worden loos. 27Un de Jefenkjnis-Wajchta wakjt opp ut däm Schlop, un aus hee de Jefenkjnis-Däaren op sach, trock hee daut Schwieet rut un wull sikj selfst dootmoaken, wiels hee docht, de Jefangne wieren utjekleift. 28Oba Paulus roopt met lude Stemm un säd: Doo die kjeenen Schoden; wiels wie sent aula hia. 29Dan foddad hee Licht, sprunk nenn un foll met Zetren ver Paulus un Silas dol. 30Un hee brocht äant rut un säd: Jie Haren, waut mott ekj doonen, om jerat to woaren? Apj 2:37 31See oba säden: Jleew aun dän Harn Jesus Christus, dan woascht du jerat woaren un dien Hus! 32Un see säden am daut Wuat vom Harn un to aulem en sien Hus. 33Un hee neem äant deeselwje Stund enne Nacht no sikj un wosch äant de Striepen auf un leet sikj fuaz oppe Städ deepen, hee un aul de Sienje. 34Un hee brocht äant en sien Hus, sad äant eenen Desch väa un freid sikj, daut hee met sien gaunzet Hus aun Gott jleewent jeworden wia.
35Aus daut oba Dach jeworden wia, schekjten de Hauptlied de Jerechts-Deena un säden: Lot de Mana gonen. 36Dan säd de Jefenkjnis-Wajchta Paulus dise Wieed: De Hauptlied haben häajeschekjt, om junt gonen to loten; aulsoo got rut un got han met Fräd! 37Paulus oba säd to äant: See haben ons, dee wie Reema sent, onen Uadeel effentlich jeschloagen un en daut Jefenkjnis nenjeschmäten, un nu schekjen see ons plietsch#16:37 Ooda: heemlich. wajch? Oo nä; oba lot äant selfst komen un ons rutleiden. Apj 22:25 38Un de Jerechts-Deena säden dise Wieed to de Hauptlied. Un see ferchten sikj, aus see hieeden, daut see Reema wieren. 39Un see kjeemen un beräden äant un brochten äant rut un prachaden äant, daut see ut de Staut rutgonen sullen. 40Dan jinjen see ut daut Jefenkjnis un jinjen en Liedia äa Hus nenn; un aus see de Breeda jeseenen un jetreest hauden, jinjen see wajch.
Aposteljeschicht
Currently Selected:
Apj 16: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft