Matej 9
9
O Isus oprostinela hem sasljarela e sakate
1O Isus uklilo ko čamco, nakhla tari javer strana taro ezero hem alo ko po gradi. 2Nesave manuša ange ki leste jekhe sakate manuše, pašlo ki postela.
Koga dikhla o Isus lengiri vera, vakergja e sakateske: “Ma dara mo čhavo, oprostime tane te grevija.”
3Togaš nesave učitejla e Zakoneskere vakerge ki peste: “Akava hulinela!”
4A o Isus džangja so mislinena, i pučlja len: “Soske agjar mislinena lošno ko tumare srcija? 5Soj polokhe te vakerel pe: ‘Oprostime tane te grevija’, ili te vakerav leske: ‘Ušti hem phir’? 6Ama ka dokažinav tumenge deka o Čhavo Manušeskoro isi le vlast ki phuv te oprostinel grevija.” Togaš phengja e sakateske: “Ušti! Le ti postela hem dža tuke khere.”
7Ov uštilo hem gelo peske khere.
8Koga o narodo dikhle adava, čudisalile hem slavinge e Devle, adaleske so dengja asavki vlast e manušen.
O Isus vikinela e Mateje
9Koga o Isus gelo adathar, dikhla jekhe manuše so vikinela pe sine Matej sar bešela sine ko than kote so khedela pe danok hem phengja leske: “Ava pala mande!” O Matej uštilo hem gelo pala leste.
10A dži kote o Isus hala sine ki sofra ko kher e Matejeskoro, ale but danočnikija hem javera grešnikija hem hana sine leja hem leskere učenikoncar.
11Koga dikhle o fariseja adava, pučle leskere učenikon: “Soske tumaro učiteli hala hem pijela e danočnikoncar hem javere grešnikoncar?”
12Koga šungja akava o Isus, odgovoringja lenge: “E sastenge na trebela doktori, nego e nasvalenge. 13Ama džan hem sikloven so značinela akava: ‘Milost mangava, a na samo žrtva.’ Soske na alum e pravednikon te vikinav, nego e grešnikon.”
E Isuse pučena bašo posti
14Togaš ale e Jovaneskere učenikija hem pučle le: “Soske amen hem o fariseja poviše puti postinaja, a te učenikija na postinena?”
15A o Isus odgovoringja lenge: “Sar šaj o henamika te roven dži kote o džamutro tano lencar? Ama ka avel dive, koga ka ovel lelo o džamutro lendar, i togaš ola ka postinen.
16Nikoj na sivela nevi krpa ko purano gad, soske ko thojbe ka otkačingjovel o nevo taro purano, hem o otvor ka ovel pobaro. 17Ni na čhorela pe nevi mol ko purane mevija#9:17 mevija Mevovi sine kerde tari zivotinegiri koža kote so koristinena sine sar fučija.. Ako kerge adava, koga i mol ka reslol o mevija ka phajron; i mol ka čhorgol, hem o mevija ka rumingjoven. Nego o nevo mol čhivela pe ko neve mevija, i o solduj ka oven arakhle.”
O Isus vazdela e čhaja taro mule hem sasljarela e nasvale romna
18Dži kote o Isus vakerela sine akava, alo jekh vodači tari sinagoga, pelo ko kočaka anglo leste hem vakergja leske: “Mi čhaj samo so muli. Ama ava hem čhiv to vas upro late, hem oj ka ovel dživdi.”
19O Isus uštilo hem zaedno pe učenikoncar gelo pala leste. 20Ko adava momenti ali pala leste jekh romni so dešuduj berš thavdela sine latar rat. I pipingja le ko krajo taro leskere šeja. 21Soske oj phengja ki peste: “Samo te pipinav man ko leskere šeja, ka sasljovav.”
22O Isus irangja pe, dikhla la hem phengja lake: “Ma dara, mi čhaj, ti vera sasljargja tut.”
Hem i romni ko adava momenti saslili.
23Koga o Isus khugja ko kher e vodačeskoro tari sinagoga, dikhla e manušen so bašalena sine flejta baši muli čhaj hem bute manušen so rovena, 24i vakergja lenge: “Džan tumenge! I čhaj na muli, oj sovela.”
A ola asandile leske.
25Koga o manuša iklile avrik, o Isus khugja kote so sine i čhaj, astargja lakoro vas hem oj uštili. 26Hem šundilo adava ko celo adava than.
O Isus sasljarela e korolen hem e kašuken
27Koga o Isus džala peske sine adathar, duj korole manuša džana sine pala leste, vikindor: “Žalin amen, Čhavo e Davideskoro!”
28Koga khugja ko kher, o korole manuša ale ki leste, hem ov pučlja len: “Verujnena li deka šaj te kerav adava?”
Ola odgovoringe: “Oja, Gospode.”
29Togaš pipingja lengere jakha hem phengja: “Neka ovel spored tumari vera.”
30Hem irasalilo lengoro dikhibe. A o Isus silno opomeningja len vakerindor: “Nikoj ma te džanel bašo akava.”
31Ama ola iklile hem vakerge bašo akava sarinenge ko adava than.
32Dži kote ola iklona sine, ko Isus sine ando jekh manuš so sine opsednimo taro demojna hem našti sine te kerel lafi. 33Koga o Isus ikalgja lestar e demone, o manuš kerela sine lafi. A o manuša čudinge pe hem vakerge: “Nikat asavko nešto na dikhlem ko Izrael!”
34A o fariseja vakerena sine: “Ov ikalela e demonen, preku o gospodari e demonengoro.”
I žetva tani bari ama rabotnikija isi hari
35O Isus džala sine ko sa o gradija hem ko sa o gava, sikavela sine ko lengere sinagoge, propovedindor o evangelije bašo carstvo hem sasljarela sine razno nasvalipe hem slabost. 36Koga dikhla bute narodon, pelo leske žal baši lenge, soske sine but mučime hem bizo pomoš, sar bakhre bizo pastiri.
37Togaš vakergja pe učenikonge: “I žetva tani bari ama rabotnikija isi hari. 38Adaleske, molinen tumare Gospodare e žetvakoro te bičhavel rabotnikija ki pi niva baši žetva.”
Currently Selected:
Matej 9: MAR
Highlight
Copy
Compare
Share
Want to have your highlights saved across all your devices? Sign up or sign in
