Matej 10
10
O Isus bičhavela e dešudujen
1O Isus vikingja pe dešuduje učenikon hem dengja len avtoriteti te ikalen lošna duhija hem te sasljaren sekova nasvalipe hem slabost. 2A akala tane o anava e dešuduje apostolengere:
o prvo Simon (so vikinela pe Petar) hem leskoro phral Andrej;
o Jakov o čhavo e Zavedejeskoro, hem leskoro phral o Jovan;
3o Filip hem o Vartelomej;
o Toma hem o Matej o danočniko;
o Jakov, o čhavo e Alfejeskoro hem o Tadej;
4o Simon Kananiec hem o Juda Iskariot so predajngja e Isuse.
5O Isus bičhalgja akale dešudujen vakerindor: “Ma džan maškar o manuša so nane Evreja hem ma khuven ko nesavo gradi e Samarijengoro. 6Ama najanglal džan ko našavde bakhre e Izraeleskere. 7Dži kote džana vakeren akava: ‘Alo paše o carstvo nebesno.’ 8Sasljaren e nasvalen, vazden e mulen, sasljaren adalen so isi len lepra, ikalen e demonen. Bizo pare dobingjen, bizo pare den. 9Ma len tumencar ni zlato, ni srebro, ni bakri ko tumare pojasija, 10ni torba drumoske, ni javer gad, ni javera sandale, ni kaš phiribaske. Soske o rabotniko zaslužinela pi plata.
11Ko kova gradi ili gav ka khuven, roden adathe nesave manuše soj tano dostojno hem ačhoven leste ko kher, sa dži kote na džana tumenge taro adava than. 12I koga ka khuven ko adava kher, vakeren: ‘Mir tumencar.’ 13Hem te priminge tumen, neka ačhol tumaro mir lencar. A te na priminge tumen, tumaro mir neka iranel pe tumende. 14Ako nekoj na primingja tumen ili na mangla te šunel tumare lafija, ikloven taro adava kher ili taro adava gradi hem tresinen i prašina taro tumare pre sar znako deka nane tumen ništo lencar. 15Čače phenava tumenge, polokhe ka ovel bašo Sodom hem i Gomora ko sudno dive nego adale gradeske.”
Bašo progoniba
16“Akje, bičhavava tumen sar bakhre maškar o ruva. Adaleske oven mudra sar o sapa hem mirna sar o gulubija. 17Pazinen tumen, soske ka oven predajme ko sudo hem ka kamšikujnen tumen ko sinagoge. 18Baši mange ka anen tumen anglo vlastija hem cajra sar svedokija lenge hem e manušenge so nane Evreja. 19Ama koga ka astaren tumen ma sekirinen tumen so ka phenen ili sar ka vakeren. Ko adava vreme ka del pe tumenge so te vakeren, 20soske nane tumen te vakeren, nego o Duho tumare Dadeskoro ka kerel lafi preku tumende.
21O phral pe phrale ka predajnel ko meriba, a o dad pe čhave. O čhave ka oven protiv pumare roditejla, hem ka predajnen len ko meriba. 22Sarine ka mrzinen tumen baši mange, ama adava so ka ačhol verno dži ko krajo ka ovel spasimo. 23Koga ka progoninen tumen ko jekh than, našen ko javer. Čače phenava tumenge, nane te resen te nakhaven sa o gradija taro Izrael angleder o Čhavo Manušeskoro te avel.
24Nane učeniko pobaro taro po učiteli, ni o sluga pobaro taro po gospodari. 25Dovolno i e učenikoske te ovel sar po učiteli, a o sluga te ovel sar po gospodari. Ako o gazda e khereskoro vikimo Veelzevul – o Beng – kozom poviše leskere kherutnen ka vikinen agjar!”
Ma daran
26“Adaleske, ma daran lendar, soske sa soj garavdo ka dikhol javno hem sa soj tajno, ka šungjol. 27Adava so phenava tumenge ki temnina, vakeren le ki svetlina; hem adava so pohari phenela pe tumenge ko kan, vakeren le taro krovi sarinen te šunen le.
28Ma daran okolendar so šaj mudarena o telo, a našti mudarena i duša. Ama daran okolestar so šaj uništinela hem i duša hem o telo ko pekol. 29Na bikinela pe li duj čirikla jekhe dinareske. Ama nijekh lendar nane te perel ki phuv, bizi vojla tumare Dadeskiri. 30A tumenge ko šero sekoj bal tani gejmi. 31Adaleske, ma daran; tumen sijen povredna taro but čirikla.”
Ma ladža taro Isus
32“Koj ka priznajnel deka tano mlo anglo manuša, me da ka priznajnav le deka tano mlo anglo mo Dad soj ko nebo. 33Ama koj ka otkažinel pe mandar anglo manuša, me da ka otkažinav man lestar anglo mo Dad soj ko nebo.”
Na mir nego čhurik
34“Ma mislinen deka alum te anav mir ki phuv. Na alum te anav mir, nego čhurik. 35Alum te odvinav:
‘e čhave leskere dadestar,
e čhaja lakere dajatar,
e bojra lakere sasatar.
36O dušmajna e manušeskere ka oven leskere kherutne.’
37Sekoj so mangela pe dade ili pe daja poviše mandar, nane dostojno te ovel mo učeniko. Sekoj so mangela pe čhave ili pe čhaja poviše mandar, nane dostojno te ovel mo učeniko. 38Koj na lela po krsto hem na džala pala mande, nane dostojno te ovel mo učeniko. 39Koj ka arakhel po životo ka našavel le, a koj ka našavel po životo baši mange ka arakhel le.”
O nagrade e učenikongere
40“Koj priminela tumen, priminela man, a koj priminela man, priminela okole so bičhalgja man. 41Koj ka priminel proroko, adaleske soj proroko, ka dobinel proročko nagrada, a koj ka priminel pravedniko, adaleske soj pravedniko, ka dobinel nagrada taro pravedniko. 42Hem ako nekoj dela jekheske akale tiknendar te pijel jekh čaša šudro pani, adaleske soj mo učeniko, čače vakerava tumenge, adava manuš nane te našavel pi nagrada.”
Currently Selected:
Matej 10: MAR
Highlight
Copy
Compare
Share
Want to have your highlights saved across all your devices? Sign up or sign in
