Matej 6
6
Bašo dejba e čorolenge
1O Isus phengja: “Pazinen! Ma keren šukaripe anglo manuša te šaj te dikhen tumen javera, soske ako kergjen adava, nane te ovel tumen nagrada taro tumaro Dad soj ko nebo.
2Hem agjar koga deja e čorolenge, ma vaker adava javno, sar so kerena o dujmujale ko sinagoge hem ko ulice, te šaj te poštojnen len sarinen. Čače vakerava tumenge, ola dobinge više pi nagrada. 3A koga deja e čorolenge, ma te džanel to levo vas so kerela to desno. 4Hem de e čorolenge tajno, a to Dad, so dikhela soj kerdo tajno, ka nagradinel tut.”
I molitva
5“Hem koga molinena tumen ma oven sar o dujmujale, soske ola mangena te molinen pe ko sinagoge hem ko ploštadija, te šaj te dikhen len o manuša. Čače vakerava tumenge ola dobinge više pi nagrada. 6Ama tu, koga molineja tut, khuv ki ti soba korkori, phan o udara hem molin tut te Dadeske e Devleske soj tano ko tajnost, a to Dad, so dikhela soj kerdo tajno, ka nagradinel tut. 7Hem koga molinena tumen, ma vakeren but čuče lafija sar okola so na džanena e Devle, soske ola mislinena deka ka oven šunde ako vakerge but lafija. 8Adaleske ma oven sar lende, soske tumaro Dad džanela so trebela tumenge, angleder te roden lestar. 9Adaleske agjar molinen tumen:
‘Dade amareja, so sijan ko nebo,
neka ovel sveto to anav,
10te avel to carstvo,
neka ovel ti vojla,
sar ko nebo agjar ki phuv.
11Amaro šuko maro de amen avdive,
12hem oprostin amare grevija sar so amen oprostinaja okolenge so grešinena amenge.
13Cide amen taro iskušenie, hem arakh amen taro Beng.
[Soske to carstvo, ti sila ti slava ko sa o vekija. Amin.]’
14Soske ako oprostingjen javerenge koga ka grešinen tumenge, agjar tumaro Dad soj ko nebo, ka oprostinel tumenge. 15Ama ako na oprostingjen javerenge, ni tumaro Dad nane te oprostinel tumenge tumare grevija.”
Bašo posti
16“Koga postinena, ma mukhen tumaro muj sar o dujmujale, soske ola kerena adava te šaj te dikhen len o manuša deka postinena. Čače vakerava tumenge, ola dobinge više pi nagrada. 17Ama tu koga postineja, thov to muj hem harav te bala, 18te na dikhen tut o manuša deka postineja, nego samo to Dad soj ko tajnost. Togaš to Dad so dikhela so kerela pe ko tajnost ka nagradinel tut.”
Bašo barvalipe ko nebo
19“Ma kheden tumenge barvalipe ki phuv, kote so o insektija hem i rgja ka uništinen le, hem kote so čora khuvena hem čorena le. 20Nego kheden tumenge barvalipe ko nebo, kote so o insektija hem i rgja na uništinela le, a ni o čora našti te aven hem te čoren le. 21Soske kaj tano to barvalipe, adathe ka ovel to srce da.
22I jakh tani svetlina te teloske. Ako te jakha tane saste, celo to telo ka ovel pherdo svetlinaja. 23Ama ako ti jakh tani lošno, celo to telo ka ovel pherdo temninaja. Togaš ako i svetlina ki tute tani temnina, kozom pobari ka ovel adaja temnina!”
Našti služinela e Devleske hem e parenge
24“Nikoj našti te služinel duje gospodarenge. Ili jekhe ka mrzinel, a okole ka mangel, ili jekheske ka ovel poslušno, a e dujtone nane te podnesinel. Našti služinena hem e Devleske hem e parenge.”
Bašo sekiracije
25“Adaleske vakerava tumenge: Ma sekirinen tumen bašo tumaro životo, so ka han hem so ka pijen, ili so ka phiravel tumaro telo. Nane li o životo považno taro hajbe, a o telo považno taro šeja? 26Dikhen e čiriklen. Ola ni sejnena, ni na khedena te čhiven ki štala. A palem parvarela len tumaro Dad soj ko nebo. A na sijen li tumen považno lendar? 27A šaj li nekoj tumendar sekirindor te prodolžinel hari po životo?
28Hem soske sekirinena tumen šejenge? Dikhen sar bajrona o lulugja ko pole. Ni mučinena pe, ni na sivena peske šeja. 29A vakerava tumenge ni o car Solomon, so sine but barvalo, na sine uravdo agjar, sar jekh lendar. 30Ako o Devel agjar uravela o pole e lulugjencar, so avdive tane adathe, a tajsa frdela pe ki jag, kozom poviše šeja ka del pe tumenge tikne verakere? 31Adaleske ma sekirinen tumen hem ma vakeren: ‘So ka ha?’ ili ‘So ka pija?’ ili ‘So ka urava?’ 32Soske sa akava rodena okola so na džanena e Devle. A tumaro Dad soj upre ko nebo džanela so trebela tumen. 33Ama najanglal roden o carstvo e Devleskoro hem leskiri pravda, i sa akava ka del pe tumenge.
34Adaleske, ma sekirinen tumen bašo tajsutno dive, soske o tajsutno dive ka sekirinel pe peske. Sekova dive isi le dovolno pe problemija.”
Currently Selected:
Matej 6: MAR
Highlight
Copy
Compare
Share
Want to have your highlights saved across all your devices? Sign up or sign in
