MARK 13

Jisu Kerecaki Tei msia di kera ha Kerang

(Mat. 24:1-2; Luk. 21:5-6)

1Jisu Kerecaki püt ti kezeu dau, pa ledeukelume hang ge rang gai, “Pielo, Keledeubo! Miswa kega dai kenzwa tsuqang nah ki dungge bi!” 2Jisu keli gai, “Nnui ki kedih aidung de ngau bam mi? Aika ntsuqang ket de pe bahm ga bahm lak; cidung leune to nkei dizie.”

Keherei nah Kesah

(Mat. 24:3-14; Luk. 21:7-19)

3Jisu Olive Deutuh ga ntum bam, Kerecaki gade kah pet eh, cidau Peter, Jakob, Johan, nah Andrew penui nkim eh peda gwang lu. 4Penui rang gai, “Aide daidau di zie bi anui dage ranglia lo, nah ma aidung pelane tei di kera peting gwang bam kedi lia kera daipai tei di zie bi anui dage ranglia lo.” 5Jisu penui dage rang gai, “Kwa bam lu, nah peu mige dede nnui de cwa diso. 6Mina kekiee ge, a ziemne marang lalie rang eh gwang eh, ‘I au pa da!’ de rang zie nah penui mina kekiee de cwa dizie. 7Nah nnui kemna ga roitak koa dung kesiu dau nah kemdei ga roitak dung ha siu kelu dau helung keherei so. Cii kenzwa dung tei maisia, dede cide pekieh penlihbe gwang bam kecu de ma. 8Deudi dung ketket de regi zie; hegwangram dung ketket de regi zie. Kehei gade nlui teu dizie, nah herakum dung cuh zie. Aidung de au nna tedteei kerai dung nzwa da.”

9“Nnuikatei de kwa bam lu maisia. Nnui de tuih luzie nah tutiak ki ga ngngwa mie zie. Nnui de synagogue gade dap zie; nnui a ziemne kedihme nah hegwangme dwa ga sap zie penui dede Samlia keyi rang beu kerane.#Mat. 10:17-20; Luk. 12:11,12. 10Dede penlihbe gwang kemak dwa, Samlia keyi de mina pelane dage ledeu maisia. 11Nah nnui de tuih lü tutiak bahm ga ngngwa kemie dau, daipai rang zie bi de mrai nnui lung keherei so; peting gwang de, nnui de kepeube rang lu. Kedanemene nnui kerang sam de nnui gu ma; cide Kemci Rabe dade gwang zielu. 12Mina dung penui katei penui siname de teitset ti kera tuih gai beuzie, nah mipei dung de penui name dung dage cinzwa tei gaizie. Hename penui puipei dung de nco dizie nah penui de teitset dizie. 13#Mat. 10:22.A ziemne mina leune nnui de nkau zie. Dede penlih ga lia cang kelu bede keli luzie.

Nrim Süt kela

(Mat. 24:15-28; Luk. 21:20-24)

14 # Dan. 9:27; 11:31; 12:11. “Nnui ‘Kenrim Nrim süt’ kecu ge pa sap kerabe kemak ga kesap ngau zie.” (Kepeime de peu ci lu: aide pekieh dai bi kecu ci bih lu maisia!) “Judea ga kebamme kideutuh dung gage pak gailu maisia. 15Pe kireu ga kebambe pa teu maikesiabe keu kerane hungh kilung ga nlüt eh peting tei nggah kerabe ma.#Luk. 17:31. 16Luh ga kelabe pe pai keu kera kilung ga caili gwang so. 17Cidau ting mipui tetlak kelame nah pe na nepam kela pui dung dai rei ge rei zie bi! 18Aidung de tingtiak dau tei melu kerane Tinggwang dade kie lu! 19#Dan. 12:1; Keu. 7:14.Cidau ting reide au Tinggwang kideu damkelu gade cu kecang hangdeu ga madaude ci kemak swade siaki zielu. Madaude cikenzwa gede gwang dai de lak. 20Dede Rampaube tingbazie dung cidung tei ncam dida; pa ciciu di mecai, migede ring bam lak. Dede pa ne kedetkelume ziemne, pa cide tingbazie dung tei ncam di. 21“Cine, keheibe de nnui dage” ‘Pielu, aika mede cika Messiah!’ de rang de pecu nlum so. 22Kedanemene kenret Messiah dung nah kenret caihakecime cuh zielu. Penui mimakecang nah miswa kega ta dung tei eh, tei lubui cai, Tinggwang ne kedetkelume dede cwa kera tei zie. 23Nnui mriak lu! Peting kegwang dwa ge I nnui de maleune ranglia dida.

Mina Nabe Kegwang

(Mat. 24:29-31; Luk. 21:25-28)

24 # Isa. 13:10; Joe. 2:10,31; 3:15; Keu. 6:12. Isa. 13:10; Eze. 32:7. Keherei ting cai tingbazie dung gade tingnaimik mui dizie, hekei baa sita dizie, 25#Isa. 34:4; Keu. 6:13. Joe. 2:10.heghi dung tinggim gade cak mie dizie, nah tingkahm ga kenkieng dung de penui bahm dung gade teukelai dizie. 26#Dan. 7:13; Keu. 1:7.Pecai Mina Nabe mikngau tei gwang zie, kemwa ga nkieng nah ndu süt eh gwang zie. 27Tinggwang ne kedetkelu mina dung de hangdeu nlih gade kedale kecang gade hekwa lu kerane pa tinggimgwame de kideutuh mdai gage lang gaizie.

Nzüt bang gade keledeu

(Mat. 24:32-35; Luk. 21:29-33)

28Nzüt bang gede nnui de keledeu ge peu gailo. Pekiak dung ndiak nah renu nah cide penui bwa pet ge, nnui hepwak ting gwang mna kedi ci lula. 29Cinzwa eh, nnui aidung tei bam kedi kengau dau, nnui pe tingbe mna bam kedi ci luzie, ndeu cuh di kera telei kelu de.#13:29. peting nna dida, ndeu cu lauda; mede pa au mna dida gwang kera telei luda. 30Ma aidung pelane cu mina ring kebamme pelane tsai ciak di kemak dwa tei di kera nsung lu. 31Tinggim nah kideu gah dizie, dede a sam au madaude gah dilak.

Migede Tingba mede Bamdapkak Ci ma

(Mat. 24:36-44)

32“Ciciu de, migede daidau cipau tingba mede bamdapkak gwang zie bi ci ma, Tinggim ga samgwame, mede Nabe de; Peibe rünne ci bam. #Mat. 24:36. 33Kwa bam lu, mriak lu, nnui pe tingbe daidau gwang zie bi ci melu. 34#Luk. 12:36-38.Cide au mige pe kilame de nlum beudi eh kilung gade hebeuh teitet kedi ge nzwa zie, penui ketket kecu de pe ta ramcau peudi eh nah kikam kekwabe de kwa bam lulo rang beu kedi cai. 35Kwa bam lu, cine nnui daidau ge ki mpaube gwang zie bi ci kemakne aide tinghegi, mede muisum mede tingbaa ra, mede naimik kepet dau lubui. 36Pa zette gwang cai, nnui zip zeu eh pecu peu ngau diso. 37Cine, I nnui dage kerangbe I pelane dage rang la: kwa bam lu!”

Currently Selected:

MARK 13: ZemeNB

Highlight

Copy