MARK 14

Jisu ze Kemmau Ciem Kepeei

(Mat. 24:36-44)

1 # Tet. 12:1-27. Cidau kahkegwang nah tsehi kaikemak nku Ngyi lang nane dwa. Cingku kedihme dung nah Hezai keledeume Jisu ze nkim tuih lu kera nah pecu teitset ti kera lampui peei ladi. 2Penui rang di, “Anui cide hengyi dau tei kerabe ma, ciciu cai mina dung ma kebwak lubui.”

Jisu ze Bethany gade Keniakkelu

(Mat. 26:6-13; Jhn. 12:1-8)

3 # Luk. 7:37,38. Jisu au Bethany ga Simon, mige kempa gade keherei kelame ge, ki ga bam. Jisu matyei bam ge, mipui ge Alabaster nard kenci le tei kelu pemi kewhung perim kehengui bung ge puihting eh teugwang. Pa cipau bung de tei pup lu delü kehengui de pwa Jisu poi gage rui gai. 4Cika midung ge penui rata di delü ketket dade rang di, “Perim kehengui de tei nkap kecu pe keyi daino? 5Cide rangkang goi 300 swa kekiee gage zwa lubui#14:5. rangkang goi: 6:37 pielu. delü rangkang pwa kegame de peu lubui!” Nah penui pecu kii süt ti. 6Dede Jisu rang gai, “Pecu püt ti! Daitei nnui pecu kebwak lano? Pa a ziemne makeyi nah hezukeyi ge tei gailie. 7#Hez. 15:11.Nnui da kegame bam muihzie, nah kehei dau de nnui keneu dau, nnui penui de ngha lubui. Dede nnui acu ngngwa bam muih lak. 8Pa tei lu kebuibe pa tei gailie; pa marim kehengui a pum gage rui kegai de acu kung kerane mrai telei gai delie. 9Cu, I nnui dage rang siakte gaila kideu pelane ga Samlia keyi ledeu kecu dau, pa tei kegai de pecu kensung gade rang lazie.”

Judas Jisu ze Tuihbeu kera Samdau kelu

(Mat. 26:14-16; Luk. 22:3-6)

10Pecai Judas Iscariot, ledeukelu kereikena hang ge, cingku kedihme da miedi penui dage Jisu ze tuih gaibeu kerane. 11Pa rang kegai de penui siu penui sui yilu, delü pecu rangkang peu kera sampet beu. Cine Judas au Jisu ze tuih gaibeu kera peting keyi peei ladi.

Jisu Ledeukelume ze Ngngwa Kahkegwang Taktyei Ketyei

(Mat. 26:17-25; Luk. 22:7-14,21-23; Jhn. 13:21-30)

12Tsehi kai kemak Nku Ngyi raitu benai, kahkegwang taktyei ziemne meurünna dung de dapketset benai, Jisu ne ledeukelume pecu keteu, “Nang anui ze peu n ziemne dai gade Kahkegwang taktyei telei neu lano?” 13Pecai Jisu penui hang na de sam aidung si eh lang gai: “Namdibe ga lütcu, ciciu de mige duibung pwa kelage nnai de dau luzie. Pecai sui lu 14pa ketet be ki ga, delü ki mpaube dage rang beu lo: Keledeube rang zeu lie, ‘A gu ledeukelume nah I Kahkegwang taktyei tyei kera kibung daiga bam no?’ 15Ciciu de pa nnai de nreuhle kibung dih süt ge lia zie, telei lu delü lamlui mdui kenzeu ge, cika nnai anui ziemne maleune telei luzie.” 16Ledeukelume tetti, namdi ga miedi, nah Jisu penui ze rang kebeu leune siakge ngau lu; nah penai Kahkegwang taktyei de telei lu. 17Tinghegi dige, Jisu ledeukelu kereikena bau de ngngwa gwang. 18#Lei. 41:9.Penui kaira ga matyei bam ge, Jisu rang di, “Nnui hang ge acu tuih gai beuzie lie I rang gaila, acu ngngwa matyei kebam hang ge.” 19Ledeukelume penui sui sia di delü, hang gege pecu keteu cuh di, “Nang acu au rang kesang bam ma ha?” 20Jisu keli gai, “Cide nnui kereikena bau hang ge zie, acu ngngwa pe nku pwa hekwak gage mpung kecu bede. 21Kesanglaisiu ga pa tsai zie de kerang nzwa eh Mina Nabe tsai zie; dede Mina Nabe de tuih gaibeu kerabe au dai kenzwa gede hing no! Cipau de madaude pecu nna kemakbe yiki lie!”

Rampaube Taktyei

(Mat. 26:26-30; Luk. 22:14-20; 1 Ko. 11:23-25)

22Penui matyei bam ge, Jisu nku kwak ge keu lu, ketwa kekie ge tei gai, cide tei pup lu, delü cide pwa pa ne ledeukelume de peu gai. Pa rang gai, “Cide tyei lo, aide a pum delie.” 23Pecai pa hepiak ge pwalu, Tinggwang ze twa gai, delü penui ze cide pwa beu; nah penui pelane cika de sak lu. 24#Tet. 24:8. Jer. 31:31-34.Jisu rang gai, “Aide a jai mina kekiee ziemne lwa gailie, a jai cide Tinggwang samkakkelu de giak kelu lie. 25I nnui dage rang la, I kube zau aide madaude sak dai lakta I Tinggwang Hegwangram gade kube zau keheci sak kemaktane.” 26Pecai penui lei ge tei gai eh Olive Deutuh ga tet miedi.

Peter pecu Mlai kera Jisu Mrai rang kegai

(Mat. 26:31-35; Luk. 22:31-34; Jhn. 13:36-38)

27 # Zek. 13:7. Jisu penui dage rang gai, “Nnui pelane pak dizie delü acu gi dizie, kedanemene kesanglaisiu rang la, ‘Tinggwang meurün kekwabe de teitset gaizie, nah meurün dung pelane zangra dizie.’ 28Dede acu kering gage teucuh kelu cai, I Galilee ga nnui dwa mie rai luzie.”#Mat. 28:16. 29Peter keli gai, “I madaude ncu püt dilak, mi kedame pelane püt ti liede!” 30Jisu Peter dage rang gai, “I nda ge rang la teziu nrui pia na kekoah dwa, nang acu ci melie kecu pia cum rang zie.” 31Peter nkieng gwah eh samli peu gai, “I madaude cide rang lak, I ncu ngngwa tsai maisia di liede!” Nah ledeukelu keda pelane de cinzwa rang di.

Jisu Gethsemane gade Kekie

(Mat. 26:36-46; Luk. 22:39-46)

32Penui Gethsemane lie qu kela heni gega gwang lu, ge Jisu pa ne ledeukelume dage rang gai, “I kekie tei kedi dau aika bam lu.” 33Pa Peter, Jakob, nah Johan penui de ngngwa lu. Lungrei nah rei cangsiak kedi ge peda gwang di, 34nah pa penui dage rang gai, “A mlung ga suisiet de au dizu di eh cide acu tei kecai di lai zeuda. Aika bam eh kwa bam lulo.” 35Pa manage mdei si pet ti, hangdeu ga zeu miedi, delü tei lubui cai, keherei ting pecu peu kah gwang melu kerane kie. 36Pa kie gai, “Peibo, A Pei! Nang au ma pelane tei lubui. Keherei piak aide ada de pwa kezia beu lo. Dede a suibe nzwa so, dede n suibe lulo.” 37Pecai pa caili gwang ge ledeukelume zip bam eh ngau lu. Pa Peter dage rang gai, “Simon, nang zip zeu ni? Nang bamdapkak gede rak bam gailak di deni?” 38Nah pa penui dage rang gai, “Kwa bam lulo, nah nnui mdakkepie ga kaulüt ti melu kerane kie lulo. Rabe au neu zeu, dede pumteihbe au nnei.” 39Pa piage mie dai eh kekie tei gai, sam cidung de teu rang eh. 40Pecai pa ledeukelume da caili gwang ge penui zip zeu eh ngau lu; penui mik mrak gailak di. Nah penui peda ge daipai rang zie bi ci tadi. 41Pa pia pekecum bede caili kegwang dau, penui dage rang gai, “Nnui cude zip zeu nah mtakbam reuni? Yida! Bamdapkak be gwang bam dida! Pie gailo, Mina Nabe de kemau kenkiengme ba gage kai beu bam dida. 42Cuh lu, anui tetcu go. Pielo, aika acu tuih gaibeu kerabe de!”

Jisu ze Tuihkelu

(Mat. 26:47-56; Luk. 22:47-53; Jhn. 18:3-12)

43Jisu au marang bamreu Judas, ledeukelu kereikena bau hang ge, gwang kelu dau. Pecu ngngwa kela maabe cai qiengtie dung nah teibwak dung pwa la, cingku kedihme dung, Hezai keledeume, nah hangkiame ne penui de lang gai. 44Tuihkegaibe hemaabe dage marehi ge peu gai: “I pecu kemam kegaibe de nnui luu neu kelabe da. Pecu tuih lu delü kekwa kailü pecu ngngwa tet lu.” 45Judas gwang kerikezi, pa Jisu da gwang eh rang gai, “Keledeubo!” nah pecu kemam gai. 46Cine penui Jisu ze tuih lu delü pecu herak bing lu. 47Dede cika kebamme hang ge pe qiengtie jütlü cingku kedibe kilabe de bi gai, pe kwen dang mpet ti. 48Pecai Jisu marangcu eh penui dage rang gai, “Nnui qiengtie dung nah teibwak dung pwa eh acu tuih kera gwang maisia dini, I hezai gileu kelame ge nzwa? 49#Luk. 19:47; 21:37.Tingba ge cai tingba ge eh I au nnui de ledeu eh Kerecaki ga bam la, nah nnui acu tuih ma. Dede kesanglaisiu teicang maisia.” 50Pecai ledeukelume pelane pecu püt ti eh pak tetti. 51Rehangme ge, langhcim pai rünne teu eh Jisu caisui la. Penui pecu tuih lu kera teicu, 52dede pa paaula eh pak tetti, pai de pecaile gidi eh.

Jisu Baudi dwa ga Kesap

(Mat. 26:57-68; Luk. 22:54,55,63-71; Jhn. 18:13,14,19-24)

53Pecai Jisu ze Cingku Kedibe ki ga ngngwa gwang di, cika cingku kedihme, hangkiame, nah Hezai keledeume pelane nkwa bam. 54Peter kemdei ge gade sui gwang cingku kedibe ki kigu ga nlüt lu. Pa cika kekwame de ngngwa ntum lu, mi tai ga pecu tei lum eh. 55Cingku kedihme dung nah Baudi pelane pecu teitset ti kera ziemne Jisu ze kemmau sam peei eh bam di, dede penui magede ngau luma. 56Mina zierangme kekiee ge Jisu ze mmau eh kenret rang gai, dede penui ha dung nzwa lu tadi. 57Pecai midung ge cuh sap eh kenret sam aide Jisu ze rang mmau: 58#Jhn. 2:19.“Anui pa rang eh siu, ‘I mina ne tei pwa kebam Kerecaki aide tei kau dizie, nah lang cumne cai mina ne tei kemak ge tei luzie.’” 59Dede penui penui gu maha dung tei pwa samdau lu tadi. 60Cingku kedibe penui pelane dwa gade Jisu ze keteu, “Penui kemmau sam teugwang ncu mmau kela de nang samli gah ni?” 61Dede Jisu nlei tadi nah sam gede rang tadi. Cingku kedibe pecu keteu dai, “Nang Messiah, Samlam kepung Tinggwang Nabe deni?” 62#Dan. 7:13.Jisu keli gai, “I da, nah nnui pelane Mina Nabe nkiengtube ba zetle ntum kebam nah tinggim mwa dung si eh gwang kela ngau luzie!” 63Cingku Kedibe pe pai dung hiet ti eh rang gai, “Anui zierang keda gede si mede yida! 64#Lev. 24:16.Nnui pa Tinggwang ze kemmau sam siu da. Nnui kecet daino?” Penui pelane pecu mmau di, pa au mau dida nah teitset ti kerabe. 65Penui midung ge Jisu ze ncai msui lua, nah penui pe mik hezuilü pecu huih. Penui rang di, “Cau ne ncu huih bi ci lulo!” Nah kekwame pecu teu lü kepeu di.

Peter Jisu ze Kemlai

(Mat. 26:69-75; Luk. 22:56-62; Jhn. 18:15-18,25-27)

66Peter au Cingku Kedibe kila relei dung hang ge cilam gwang kela dau de kigu tai ga bamreu. 67Pa Peter mi lum kebam ngau eh pa pecu pieling gai eh rang gai, “Nang de Nazareth Jisu ze ngngwa la.”

68Dede pa cide mlai di. Pa sam keli eh, “I ci ma…Nang rang kebam ha de I ci ma” degai eh hegole kah mpet ti. Cidau ting siak nrui koah di.#14:68. Laisiu kesa bam ma Cidau ting siak nrui koah di.

69Kila relei de cika de pecu ngau eh cika kebamme dage rang dai gai, “Pa au penui kak ga hang ge!” 70Dede Peter cide mlai dai di. Matie mene cika kesapme Peter ze mmau gaidi, “Nang penui kak gade hang ge lie kecu de mlai gailak, nang de Galilee gade gwang delu” dedi. 71Pecai Peter rang di, “I kesangbe rang kecu reset gaila! I ciciu melie cai Tinggwang ze peu acu saja peu lu! Nnui rang kebam minabe ha I ci ma!” 72Cidau ting siak nrui pia pekenabe koah gai, ge Peter, Jisu peda ge rang kebeu sam de nsung lu, “Nrui koa pekenabe dwa nang acu ci melie kecu pia cum rang zie.” Nah pa pesui sia eh hap di.

Currently Selected:

MARK 14: ZemeNB

Highlight

Copy