LUKE 11

Jisu Kekie ketei Ciem Ledeu kebeu

(Mat. 6:9-13; 7:7-11)

1Pa heni ge gade kekie tei bam, nah pa kie cang dige, pa ne ledeukelu hang ge cu, “Rampaubo, Johan pa ne ledeukelume de ledeu kebeu nzwa kekie ciem anui de ledeu beu lo,” dedi.

2Ge pa penui dade cu, “Nnui kekie ketei dau aide rang lu:

‘Anui Pie, n zi kemcibe tei lulo;

N hegwangram tei gwang kelube tei lulo.

3Tingnai nsangne puk anui de peu lo.#11:3. anui teu maikesia ketyeipuk; mede ncunnai ziemne ketyeipuk.

4Nah anui mau gi beu lo,

kedanemene anui de mi anui dage kemau tei kegaime mau gi beula lu.

Nah anui de mdakkepie gage kai so’” debeu.

5Nah pa penui dade cu, “Nnui kak gade cau be pe zangme ge bam eh tingmuisum ge peda gwang eh cu, ‘A zangbo, acu nku kwak cum releu beu lo; 6kedanemene a zangme ge mbeuh la eh gwang bam ge, I magede pecu kepeu gah lu.’ 7Nah pa pelung gade pekatei pecu resiu eh, ‘Acu keleei so; cu kikam de nkui dida, nah a name dung acu ngngwa zeu ga zeu; I cuh lü ncu magede peu gailak da,’ de eh rang lano? 8I nnui dage ranglia zie, pa pe zangbe lude eh cuh lü pecu magede peu neu melie de, penaang de ziemne pa cuh lü pa teu maikesia leune pecu peu zie.

9“Nah I nnui dage rang la, kie lu, ciciu de cide nnui de peu zie, pei lu, ciciu de nnui ngau luzie, kekung lu, ciciu de cide nnui de nkei beuzie. 10Kedanemene kie kelame leu ngau lula, nah pei kelabe de ngau lula, nah kekuhng kelabe dede nkei beula lu. 11Nnui kak gade cau be, pe na heka kie ge, heka nding gade henei peu lano, 12mede pa nruibom kie ge pecu heruimegapui peu lano? 13Cine nnui kesia keteime de makeyi dung nnui name de kepeu ciem ci cai nnui Pei tinggim kebambe au Kemci Rabe peda de kie kelame de peusi kime zie ni?”

Jisu nah Beelzebul

(Mat. 12:22-30; Mrk. 3:20-27)

14Nah pa pelet kegame ge dade herakesiabe de gwa bam di; herakesiabe mpet dige pelet kegabe de marang lu, ge mina dung penui sui gah di. 15Dede midung ge cu, “Pa herakesia dung reu kedibe Beelzebul de ngngwa herakesia dung de gwa la” dedi.

16 # Mat. 12:38; 16:1; Mrk. 8:11. Cidau midung ge pecu kedak kerane pecu tinggim gade marehi ge tei lia lo kie di. 17Dede pa penui lungning ci lü cu penui dade, “Kedi keheibe de pekatei pecu pungpang di cai kap dila, nah ngngwa ket tei lu kemakpe ki kau dila. 18Satan liede pelam tsam eh kengaurau cai pe kedi dainzwa sap lulai? Kedanemene nnui I Beelzebul de ngngwa herakesiabe de gwa la de rang zeu. 19I Beelzebul de ngngwa herakesiabe de gwa cai, nnui name dung cau de ngngwa cidung de gwa mpet lano? Cine penui ne nnui de keheteume tei zie. 20Dede magade I Tinggwang kenkieng teu herakesiabe de gwa lalie cai, ciciu cai Tinggwang hegwangram gwang nnui da cang bam dida.

21“Mi kenkiengme ge pe roinet teu lü pe hegwangki kwa bam di cai pe gu ma dung kuak bam lula. 22Dede pe swa nkiengki kecume ge pecu dap eh pe swa nkieng luge pa pe roinet cide de nlum kebam dede keutet kap dila nah pe gu süt kelu dung mzi lula.

23“Acu ngngwa la kemakbe au acu mmau la nah acu ngngwa hekwa la kemakbe au teuzang la.

Mci Kemak Rabe Nli Kegwang

(Mat. 12:43-45)

24“Mci kemak rabe mige dade mpet dige, pa pe bahm pei eh dui kega ga dung kah gwang; nah ma gade ngau lu mege pa cu, ‘I nu kebam a ki ga nli gwang dai zieda’ dedi. 25Nah pa gwang ge cide biak di eh telei siakte pwa kebam ngau lu. 26Ciciu eh pa mie herakesiabe keda pe swa siaki kecu sena de ngngwa gwang si lü penui cika lüt lü lungh bam dila; ciciu eh mina cipau de kerai dau swade kekamle siaki dila” debeu.

Misuikeyi Kesangbe

27Pa aide rang gaige mina maabe gade mipui ge sam rang eh cu peda de, “Mipui ncu tetlak kelube pui nah nang petung tung eh kelungh be pui de samlam pungtu delie!” dedi.

28Dede pa cu “Mi Tinggwang sam nking lü cide mzai kelame be samlam pungki reu!” debeu.

Mimakecang bata tei lia lo Kekie

(Mat. 12:38-42)

29Mina maabe kiee reureu dige, pa cu, “Ceheu aide ceheu kesia ge; cide marehi ge peei la, dede marehi gede penui de tei lia lakta, Jonah dage tei keliah rehi de gwale. 30Kedanemene Ninevehme ziemne Jonah marehi tei keliah ge nzwa aipau hoi de ziemne Mina Nabe de cinzwa da. 31Nkangle bie kedibe pui mina aipau hoi dede ngngwa lü keheteu ga cu zie, delü penui de mmau zie; kedanemene pa kideu nlihle de Solomon macisam kingnei zie lie kegwang ziemne, nah ainie, Solomon swa dihki kecu ge aika la. 32Ninevehme aipau hoi dede ngngwa lü keheteu ga cu sap zie, delü cide de mmau dizie; kedanemene Jonah keledeu gade penui lung nreu kelu ne, nah ainie, mige Jonah swa dihki kecu ge aika la.

Mipum Kebaabe

(Mat. 5:15; 6:22-23)

33 # Mat. 5:15; Mrk. 4:21; Luk. 8:16. “Migede mitaubung ge ntau lü mina kega ga mede mabam kang gage kai lama;#11:33. Laisiu kesa ga bam ma mede cide mabam kang gage kai lama. dede mabam reu gage kaila, ciciu eh mi kelütme de kebaabe ngau lu kerane. 34N mik de n pum mitaubung da; n mik yi kebam dau n pum pelane de gimbaa lula; dede cide yi ta dige n pum pelane kemui le puih dila. 35Cine, siakte lu, kemak cai nda kebaa kela de mui di zielu. 36Ciciu eh ma gade n pum pelane baaha bam cai, zige de kemui ga eh, cide baa hemi süt luzie, mitaubung pe kebaa nnui de peu kela dau nzwa eh.”

Jisu Phariseeme nah Hezai keledeume ze Mmau kecu

(Mat. 23:1-36; Mrk. 12:38-40)

37Pa marang kebam dau, Phariseeme ge peda de pecu ngngwa matyei lodi; cine pa lüt bam eh matyei. 38Phariseebe pa pe ba mrai mtiak mene matyei kebam ngau eh pesui gah di. 39Nah Rampaube peda de rang eh, “Nnui Phariseeme hekwak hepiak hegole huii la, dede nnui lungle au mide keheu ketyeime kesiale puih la. 40Nnui kemieeme! Pa hegole tei kegaibe helungle de tei gai meni? 41Dede nnui kwak piak dung ga kebambe pwa kegame de peu lo; nah ainie, makeheibe de nnui ziemne nci lie.

42 # Lev. 27:30. “Dede co, nnui Phariseeme! Kedanemene nnui kangdau rangkang de nah rue de nah giinei pelane de zi kerei tei eh zige kaila, dede Tinggwang masang nah kekube gi dila; nnui aidung de tei kerabe, kedabe dung de gidi mene.

43“Co, nnui Phariseeme! Kedanemene nnui synagogue ga hebahm yitube ga bam neu la nah liitak ni dung gade kelumkegai lu neu kelane. 44Co, nnui! Kedanemene nnui herau mina ngau mene pe reu ga tet kah kelabe nzwa da” debeu.

45Hezai kecime hang ge pe sam keli eh cu, “Keledeubo, nang n sam aide rang eh anui dede herata zeu!” dedi.

46Ge pa rang eh, “Co, nnui hezai kecime de! Kedanemene nnui hepüt pung kerütle mina püt tei beula, dede nnui be cai hepüt dung nnui zurang dung lede deu lama. 47Co, nnui! Kedanemene nnui caihakeci nnui peime ne daptset kedime rau tei kelane. 48Cine nnui nnui peime ta zierangme nah cide petau delie kelame dung delie; kedanemene penui penui de daptset di nah nnui penui rauh dung tei beu kelane. 49Cine Tinggwang Macisam rang, ‘I penui dage caihakecime nah langkegaime de lang gaizie, penui mina kang gede daptset dizie nah sah zie. 50Ciciu eh kideu tei kelu gade caihakecime pelane jailwa kedi de aipau hoi dade kie zie,’ 51#Ken. 4:8. 2 Hl. 24:20,21.Abel gade gwang Zechariah recabam penai Kemci Ni kak gade daptset kedibe kecang jai. yeo, I nnui dage ranglia zie, cide aipau hoi dade luzie.

52“Co, nnui hezai kecime! Kedanemene nnui maci capkaptie be keuteu kedine; nnui de lüt ma, nah nnui mi lüt kelame dede kaam dila!” debeu.

53Pa cika de tet dige, laisiu kecime nah Phariseeme pecu niah ketang bi eh, nah pecu tei perata eh ma kekiee rang gailo eh, 54pe samrang gade ma dungge pecu tui kera pecu kwa bam di.

Currently Selected:

LUKE 11: ZemeNB

Highlight

Copy