LUKE 12

Hezaitei Helo kecu

(Mat. 10:26-27)

1 # Mat. 16:6; Mrk. 8:15. Cipau tingdau mina changchang gwang nkwa luge penui hang gege reu dauh di, ge pa ledeukelume dage mrai rang eh, “Nnui Phariseeme gu tsehi, cide cii hezai ketei de mriak lulo. 2#Mrk. 4:22; Luk. 8:17.Magede keulia laklie gum kenzeu galie, mede peu ci laklie kebai kenzeu galie. 3Makeheibe de nang kemui gade rang kedi de kebaa ga siu zie, nah nang kilung kenkim gade cüt kegai de kireu gade sa gai dizie lie.

Cau ze Hing Kerabe

(Mat. 10:28-31)

4“I nnui dage rang la, a zangme dung, mipum daptset kelame de hing so, pecai penui ciswa magede tei si gai laklu. 5Dede nnui cau de hing bui bi I mrai ranglia zeu: daptset kelu cai mijaai gage kelien gaidi lu kebui kenkieng cau bam bi cipau dede hing lu; yeo I nnui dage rang zeu, pecu hing lu.

6“Nkine mengei de peusa kena gade zwa la melui ni? Nah cidung kak gade ket nage de Tinggwang dwa de nsung tadi lama. 7Daitei, nnui tam dung kecang de pei luda. Ngngi so; nnui au nkine kekiee ge swade nnui mi whungki lu.

Khrista ze Luu kelu nah Püt kedi

(Mat. 10:32-33; 12:32; 10:19-20)

8“Nah I nnui dage ranglia zie, keheibe de mina dwa de a ha rang kelame, mina Nabe de Tinggwang gu tinggimgwame dwa de pe ha rang zie; 9dede keheibe de mina dwa de a ha rang meih di cai Tinggwang gu tinggimgwame dwa de pe ha rang meih dizie.

10 # Mat. 12:32; Mrk. 3:29. “Nah keheibe de Mina Nabe de sam ge rang mmau la de pe mau gi beuzie; dede Kemci Rabe de rang msia kelame mau au gi beulak.

11 # Mat. 10:19,20; Mrk. 13:11; Luk. 21:14,15. “Nah mi nnui de synagogue ga nah kedihme dung nah kenkieng teu kelame da ngngwa kegwang dau nnui dainzwa mede nang daipai sam rang keli zie bi mede nnui depai rang zie bi cet eh nnui lungnei so; 12kedanemene Kemci Rabe bamdapkak peting siak dau nnui daipai rang maisia bi nnui de ledeu beu zielu.”

Kehei Kemieebe Samgwa

13Mina maabe gade mige peda de cu, “Keledeubo, a sinabe de anai hema gumkelu de mzi lulo rang beu lo,” dedi.

14Dede pa peda de cu, “Minabo, cau ne acu nnai de kepiebe mede kemzibe tei gaibeu no?” dedi. 15Nah pa penui dade rang eh, “Siakte lu nah makehengim pelane gade mriak lulo; kedanemene mina teilung pe mabam kekiee ga bam swa lula melu,” debeu.

16Nah pa penui dage samgwa ge rang eh cu, “Keheime ge luh ga malungh mmyi süt lu. 17nah pa pekatei pelung gade mning eh, ‘I daipai tei zie ah, kedanemene I maga gede a tsiu hekwa kera bahm ga da,’ dedi. 18Nah pa rang eh, ‘I aide tei zie: I a tsiuki ra lü tei mdi si zie; nah I cika ge a tsiu pelane nah a gunia kai hekwa zie. 19Nah I a rabe dage rang zie, A rabo! Nang ma keyibe kekiee mmi kekiee teu lu kera bam dida; relui lu, tyeisak eh n sui yilu.’ 20Dede Tinggwang peda ge rang eh, ‘Kemieebo! Heziu nda de n rabe de luu lu zieda; nah nang hema telei kelu dung de cau be gu zie no?’ ”

21“Cine cipau de au pekatei pe ziemne hema hekwa lü Tinggwang kilam mahei kemak kauge delie,” debeu.

Tinggwang ze Kenlum

(Mat. 6:25-34)

22Nah pa ledeukelume dade cu, “Cine I nnui dage ranglia zie, nnui teilung ziemne nnui lung keherei so, daipai tyei zie ah de mede daipai teu zie ah de eh. 23Kedanemene nnui teilung au ketyeipuk swa di nah mipum au paiheni swa diki reulu. 24Nruine dung zai cet kai pielo: penui heleuh gi lama nah rum de lama, penui hema kehekwaki mede tsiuki de bam ma, ciciu de Tinggwang penui puk teila. Nnui dai kenzwa kieege nruine swade nnui mi whungki reu no! 25Nah nnui cau be pelung keneile pe teilung gage mok kette tei tie#12:25. manage lungh si; mede lungh cehu si. silu laino? 26Nnui ma keceu cikenzwa nage de tei gai laklie cai, daitei eh nnui kedabe dung ziemne nnui lungnei lano? 27Teizuinbungtiepa zai cet gai pie, penui dainzwa lungh labi; penui mata tei lama mede helang de zang lama; ciciu de I nnui dage ranglia zie, Solomon pepwah keyi pelane teu de aidung de kette nzwa eh keru ma.#1 Hg. 10:4-7; 2 Hl. 9:3-6. 28Dede Tinggwang cinzwa tsehei henai luh ga lungh kebam nah ncünne mimang gage kelien gaidi kelabe keruu de tei beula lie cai dai kenzwa kieege pa nnui keruu au tei beuki me laino, nnui kenlum ketsamme?

29“Nah nnui daipai tyei zie bi nah daipai sak zie bi de pei so, mede nnui lungnei so. 30Kedanemene kideu ga minaleu pelane de aidung de peei la; nah nnui Pei nnui cidung keu maikesia ci. 31Dede nnui pe hegwangram pei lu, ciciu de pelane de si eh nnui de peu zie.

Tinggim Mahei dung

(Mat. 6:19-21)

32“Ngngi so, pemaa kecam nabo, kedanemene nnui de kedi peu kera nnui Pei sui di delu. 33Nnui mabam zwa di delü kegame de mapeu lo; rangkang bung sia dila kemakbe pei, mahei riem dila kemak tinggim ga, cika keregame de gwang la kemak nah ntu taklei nede tei msia dila kemak gage hekwa lulo. 34Kedanemene n mahei kebam ga, cika n mlung de bam zielu,” debeu.

Kila Kwa Kebamme

35 # Mat. 25:1-13. “Nnui qiakang de peu kaangpung bam lu nah nnui mitaubung de peu heu bam lu, 36#Mrk. 13:34-36.nah mi penui Rampaube meunui ngyi gade kilung kegwang kwa kebamme nzwa lu, ciciu eh pa gwang kekuhng kerikezi pecu nkei pwapeu lu kela nzwa. 37Rampaube kegwang dau kilame mrak bam eh penui de peu ngaukelume samlam pungtu da; kesangsiakbe I nnui dage ranglia zie, pa pe qia kaanglü penui de peu taktyei bahm ga bam zie, delü pa gwang cidung dede lamlui zie. 38Pa kwa pekenabe mede pekecumbe gade gwang eh penui kwa bam eh ngau lu cai kila cidung de samlam pungtu da! 39#Mat. 24:43,44.Dede aide ci lu, magade kilung teu kebambe daipau bamdapkak gage keregabe gwang zie bi, cide ci cai, pa rak bam dizie nah peu pe ki rak lü lüt lak. 40Nnui telei lu maisia; kedanemene Mina Nabe au nnui cet kemak bamdapkak gage gwang zielu.”

Kila Makesangbe nah Masangkemakbe

(Mat. 24:45-51)

41Peter cu, “Rampaubo, nang samgwa aide anui ziemne rang zeu mi pelane ziemne rang zeu no?” dedi.

42Ge Rampaube cu, “Ciciu cai cau be makesang nah makeci kikwabe no, cipau dede pe mpaube pe kilung ga kilame reu bam eh penui de peting siak dau ketyeipuk penui qwa peu kera? 43Pe mpaube gwang de ciciu bam eh ngau lu kera kilabe de samlam pungtu delie. 44I kesangsiakbe nnui dage rang zeu, pa mina cipau dede peu pe mabam pelane reu kedibe tei zie. 45Dede kila cipau de pekatei pecu resiu eh, ‘A mpaube gwang rii dida’ de rang eh kilapei nah kilapui dung de dap cai, ciciu eh tyei nah sak eh mie bam cai, 46kila cipau de Rampaube pa cet bam kemak nah bamdapkak pa ci kemak dau gwang zie delü pecu dang tüt dizie#12:46. pecu dang kecai dizie; mede pecu kelien gi dizie. delü nlum kemakme lamge pecu kai dizie.

47“Nah kilabe pe mpaube lungning ci lu, dede telei luma mede pe lungning nzwa tei lu mecai, pa dap telei süt kecu ge ngau luzie. 48Dede mige ci mene dap süt dilu kebuita dungge tei di cai, pecu dap ncam zie. Peu kiee kebeu keheibe dade kie kiee zie; mina pecu peu kieeki kebeube dade peda de kiee gwa kecu kie zie.

Jisu Mide deu Kepangbe

(Mat. 10:34-36)

49“I kideu gage mi kai beuzie lie gwang; nah magade cide heu bam di delie cai! 50#Mrk. 10:38.I duipum tei kera ge bam, nah I cide teicang lu kemaktane a lungnei bam! 51I kideu ga lungciep peu kerane gwang lie nnui cet lani? Ma, I nnui dage ranglia zie, dede pang kepup; 52kedanemene cu gade kilung gega hang mengei pangpup dizie, hang cum hang na de mmau nah hang na hang cum de mmau dizie; 53#Mik. 7:6.penui pangpup dizie; pe pei pe na de mmau nah pe na pe pei de mmau, pe pui pe napui de mmau nah pe napui pe pui de mmau, penai pe geipui de mmau nah pe geipui penai de mmau zie,” debeu.

Peting Ci kelu

(Mat. 16:2-3)

54Pa mina maabe dage rang si eh, “Nnui tingnaimik kemlütle kemwa ge hihm cuge, nnui zette, ‘Tingrui gwang zeu’ de rang la; nah rui kesangla. 55Nah nnui nkangle kaigui kengau dau cu, ‘Tinglum zieda’ de rang la; nah ciciu kesangla. 56Nnui hezaitei kelame dung! Nnui kideu ga tingju au rang ci lula; dede daitei nnui cudau ting ha rang lu ci la meno?

Nnui Ngauraume ze Ngngwayi dai lu

(Mat. 5:25-26)

57“Nah nnui daitei makemjeube nnuikatei cet lula meno? 58Nang n ngauraube de ngngwa pelung tei nciep di, mecai pa ncu hetuketiakpe da teugwang zie nah hetuketiakpe ncu langpwa kedibe ba gage kai dizie, nah kedibe ncu hebaangki gage kai dizie. 59I nnui dage ranglia zie, nang n peusa keceu kamtu nabe dede mjo kap di kemaktane nang mpet gailak,” debeu.

Currently Selected:

LUKE 12: ZemeNB

Highlight

Copy