KENDEU 39

Joseph nah Potiphar Nau

1Ishmaelme Joseph ze Egypt ga nzang mie lü zwapwa hegwangpei kang ga kedibe, hegwangki kekwa kedibe Potiphar ze peudi. 2#Bat. 7:9. Rampaube Joseph ze ngngwa la nah peu pecu nkieng kelu tei lu. Pa Egyptme pei pe mpaube ki ga lungh, 3nah Rampaube Joseph ze ngngwa la eh pecu peu pe ta keheibe ga dede yi nkieng kelu ngau lu. 4Potiphar pecu ngau pesui lü pecu pwa pe ngha be tei lu; cine pa pecu peu pe ki ga nah pe mabam pelane keteube tei. 5Cipau caile de, Joseph ziemne Rampaube Egyptme pei kilungme nah pe ki ga kebam pelane nah pe luh ga kebam leune de samlam beu. 6Potiphar ma pelane kenkieng pwa Joseph ze peudi nah pa pe taktyei gwale magede cet mning tadi. Joseph pe teilung yi nah hezuyi, 7nah matie mene pe mpaube pei nau Joseph ze nrai eh pecu ngngwa jeu ga gwang lodi. 8Pa pecu mlai eh cu, “Ainie, a mpaube kilung ga magede cet mning kera gah da, kedanemene I aika kebam ne. Pa acu pe ma pelane keteube tei luda. 9Pa kilung aika pe kenkieng kebam kieege I de bam, nah pa magede ada de keutuah teu bam ma ncu gwale. Cine I dainzwa heta kesia cikenzwa tei eh Tinggwang dage kemau tei gailu laino?” dedi. 10Pa tingba ge cai tingba ge eh Joseph dade rang bam liede, pa pecu ngngwa jeu ga gwang ma.

11Dede tingnai ge Joseph pe ta tei kera kilung ga nlüt kela dau, kilame migede cika ga. 12Pa pe pai teu lü pecu herak lü cu, “Acu ngngwa jeu ga gwang lo” dedi. Dede pa pak mbaih hegole mpet ti, pe pai pe ba gage gidi eh. 13Pa pe pai gidi eh kisie mie kedi ngau lü, 14pa pe kilame ze qu lü cu, “Aide pielo! A napei kilung ga ngngwa kegwang Ibrime aipau de anui ze nneu zeuda. Pa a kibung ga lüt lü acu teuh kera nteicu, dede I matu lu kebuita tugai. 15Pa I mra kegai siu luge hegole pak mie dida, pe pai a tai gage gidi eh” dedi.

16Pa Joseph mpaube kilung gwang kemaktane pe pai peda ge kainzeu di. 17Delü pa peda ge cipau ha de pau beu: “Nang aika ngngwa kegwang Ibrime kilabe de a kibung ga lüt eh acu kenneu ta tei. 18Dede I mra gaige pa pe pai a tai gage gi gai eh hegole pak mpet ti” debeu.

19Joseph mpaube deiga süt ti 20nah Joseph ze tuih lu delü pecu hegwangpei baangme ze kai kenzeu gage kai di, nah pa cika bam di.

21 # Bat. 7:9. Dede Rampaube Joseph ze ngngwa la eh pecu samlam beu, cine hebaangki kekwabe pecu pesui di. 22Pa Joseph ze hebaangme keda pelane peube tei beu delü pecu hebaangki ga heta keheibe reu kenkieng keteube tei beu. 23Hebaangki kekwabe Joseph kang ga ma keheibe kebam be pie rengei mede yidi, kedanemene Rampaube Joseph ze ngngwa la eh pe ta keheibe ga dede peu pecu yi kelu tei kelu ne.

Currently Selected:

KENDEU 39: ZemeNB

Highlight

Copy