KENDEU 40

Joseph Hebaangme Mang kieh Rangkebeu

1Tingkak ge cai Egypt ga hegwangpei piak kepwabe penai nku kerube hegwangpei suisiet tei di. 2Pa heta ketei aipau kena dede pe rata di, 3nah penai ze Joseph ze kai kenzeu kekwa kedihbe ki ga hebaangki gage kainzeu di. 4Penui peting ketie ge hebaangki ga bam di, ge cika kedibe Joseph ze teu penui kilabe tei lu.

5Zeuziu ge hebaangki cika piakpwabe nah nku kerube penai mang mmii, nah hemang kena de pekieh ketsamtsam. 6Joseph tingco penai da gwang ge, pa penai sui sia kebam ngau lu. 7Pa penai dade keteu, “Daitei henai nnai sui sia bam no?” dedi.

8Penai keli eh, “Anai hemang ge rip mmii, nah aika migede hemang be kieh de ranglia lu kera gah lie” debeu. Joseph cu, “Tinggwang hemang kieh siak lu kebui peu kelabe. Nnai mang ada ge siak gailo” dedi.

9Cine zau piak kepwabe cu, “A mang lede kubebang ge a dwa ga 10pe kiak kecum si eh sap. Penei dung bwa pet kerikezi pepa dung pah pet lu, nah kubetsi dung meuh di. 11I hegwangpei piak pwabam; cine I kubetsi dung raai lü hepiak gage tuigai lü cide pecu pwa beudi” dedi.

12Joseph rang eh, “Aide pekieh aiciu; pe kiak kecum de tingbazie kecum. 13Lang cumne gage hegwangpei ncu lungmpet lü n mau gi beuzie, delü ncu peu n bahm ga sap dai zie. Nang ndaa pe piakpwa ketei nzwa nang pecu pe piak pwapeu dizie. 14Dede ma keheibe de nda de yi kelu dau a ma nsung gailo, nah n zai yi eh hegwangpei dage a ha rang eh acu hebaangki aika de mpet lu kera ngha gailo. 15Kesangbe, acu Ibrime deu gade tuih kebai teu di, nah I Egypt ga dede hebaangki ga gwang lu kebui heta gede tei ma” dedi.

16Nku kerube hepiak kepwabe mang kieh yi kecu ci luge, pa Joseph dage rang gai, “I de a mang ge mmii; I nku raak kecum a peu gage pwa la. 17Perak pepeutube ga hegwangpei ziemne nku ketsamtsam pwa la; ge nruine dung cidung de tyei bam” dedi.

18Joseph keli eh, “Cide pekieh aide: nku raak kecum de lang cumne. 19Lang cumne gage hegwangpei ncu lungmpet beuzie delü n peu dang dizie! Delü n pum pwa tsingpak gage kezu luzie, delü nruine dung n teih tyei zie” debeu.

20Pecai lang cumne pecu kenna tingba benai hegwangpei pe kang ga kedihme pelane de ngngwa ketaktyei; pa pe piakpwabe penai pe nku kerube de lungmpet lu delü penai de pe kang kedihme dwa ga ngngwa gwang lu. 21Pa pe piakpwabe de ndaa bahm gage kai beu dai, 22dede pa nku kerube de teitset ti. Cide Joseph rang kebeu de kesiakge tei di. 23Dede hepiak kepwabe madaude Joseph ha cet la tadi — pa pecu nsungta zing di.

Currently Selected:

KENDEU 40: ZemeNB

Highlight

Copy