BATA 3

Pepi Kesiame geze Teimmi kebeu

1Tingnai ge Peter penai Johan tingna cai bam cum, kekie ketei tingdau Kerecaki ga mie. 2Kirieki Hezukeyibe, de eh qu kela ga pe teilung pelane pepi sia eh kelame ge bam. Tingba ramsangne Kerecaki ga kegwangme dade rangkang hatyei kerane pecu kirieki ga pwa gwang bam la. 3Pa Peter penai Johan lüt kela ngau luge, pa penai dade pecu ma dungge peu lo kie. 4Penai pecu pie lingci gai, delü Peter cu, “Anai de pie lulo!” de eh rang gai. 5Cine pa penai de pie gai, penai dade ma dungge ngau lu kera hengim eh. 6Dede Peter peda ge rang gai, “I rangkang gede bam ma, dede I kebambe I ncu peu la: Nazarethme Jisu Khrista zi gade I nda ge aja kaila cu lu delü tet lu!” 7Pecai pa pe ba zetle teu lu delü pecu ngha mcu lu. Zette eh minabe pideu nah piki dung nkieng lu; 8pa nsak cu lu, sap lu, delü tet togwa cuh di. Pecai pa penai de ngngwa Kerecaki ga lüt ti, tet nah nsün nah Tinggwang ze twa ladi. 9Cika kebam mina dung pa tet nah Tinggwang ze twa la kedi ngau, 10nah penui Kirieki Hezukeyi ga kebam mahaa ketyeibe lie kecu pecu ci kelu dau, peda tei kedi dene pelane penui swaga nah penui macang di.

Peter Kerecaki gade Sam kerang

11Minabe Peter penai Johan ze Solomon kigu lie eh qu kela gade, gieppwa kebam dau, mina dung penui swaga di delü penui da pak gwang. 12Peter mina dung de ngau luge, pa penui dage rang, “Zangme Israelme dung daitei aide ngau nnui macang lano, nah daitei nnui anai de pieling eh bam no? Nnui kecet cide anai kenkieng gade mede keyi le anai mina aipau dede peu tet lulie cet lani? 13#Tet. 3:15.Abraham, Isaac, nah Jakob Tinggwang, anui paome Tinggwang ne, pe kilabe Jisu ze rabe lam de kegwang kendu peu. Dede nnui pecu pwa kenkieng teu kelame ba gage kai di, nah nnui pecu Pilate dwa gade mlai di, Pilate pecu lungmpet beuzie lie cet kelu caine kecang de. 14#Mat. 27:15-23; Mrk. 15:6-14; Luk. 23:13-23; Jhn. 19:12-15.Pa au mci nah yi, dede nnui pecu mlai di, cirünne mereu dapketset me gede lungmpet peu lo nnui Pilate dade kie di. 15Kering gage ngngwa gwang gaibeu kelabe ze nnui teitset ti, dede pecu Tinggwang ne ketsai gade qwak nring lu nah anui au aide zierangme delie. 16Pezi kenkieng dene pepi kesia aipau dede kenkieng peu. Nnui kengau nah kecide pezi kenlum gade tei lulie; cide Jisu ze kenlum gade pecu tei myi lu, nnui pelane kengau nzwa.

17“Nah cu, a siname, nnui nah nnui gu muiteume Jisu dage tei gai kedi de au nnui maci kemakne lie kecu I ci bam. 18Peting ketie gwang kedi dau caihakecime pelane dade pe gu Messiah keherei zie lie kecu reci gaida; nah aide nzwa eh pa cide teicang gaida. 19Cine, helung nreu lu, nah Tinggwang da nreu gwang lu, ciciu de pa nnui mau gi beuzie. Nnui tei lu cai, 20Rampaube dade rabe kenkieng ting gwang zie, nah pa Jisu, nnui ziebene pa ne kedetpwa kebambe, Messiah ze lang gaizie. 21Pa tinggim ga bam maisia ma pelane teiheci kecu ting de gwang cang lu kemaktane, ndaa kelungh pe kemci caihakecime dade Tinggwang reci kegai nzwa. 22#Hez. 18:15,18.kedanemene Mosa rang kecu, ‘Rampaube nnui Tinggwang nnui dage caihakecime gede lang gai beuzie, pa acu langkegai nzwa,#3:22. pa acu langkegai nzwa; mede I nzwa. nah pa au nnui ramme ge zie. Pa nnui dage tei lulo kerang leune nnui mzai zie. 23#Hez. 18:19.Keheibe de caihakeci cipau de sam mzai kemak bede Tinggwang gu mina dung dade teutsam lu delü nkap dizie.’ 24Nah caihakecime pelane sam ge teu eh gwang, Samuel nah pecai gade kegwangme de si eh, cudau tei kebam be reci gai si beu. 25#Ken. 22:18.Pa caihakecime dade kegwang Tinggwang sampet dung de au nnui ziebene lie, nah Tinggwang nnui paome de ngngwa samting samkak kelu ga nnui de ncüt delie. ‘N leuhme dade I kideu ga mina pelane de samlam beuzie,’ de eh Abraham dage pa rang kebeu nzwa. 26Nah cine Tinggwang pe kilabe de kedet lu delü pecu nnui dage lang gai rai, nnui hang gege kecu de peu pe kenlien gade nreu ciak lu eh nnui de samlam beulu kerane” debeu.

Currently Selected:

BATA 3: ZemeNB

Highlight

Copy