BATA 2

Kemci Rabe Kegwang

1 # Lev. 23:15-21; Hez. 16:9-11. Pentecost tingbabe kegwang dau, kenlumme pelane gwang heni gega nkwa bam. 2Zette eh ting gade kaigui keci koa kenzwa makoa ge cika gwang, nah cide ne penui kebam ki pelane puih di. 3Pecai penui mi mina mleu kenzwa dungge zang pet delü cika mina leune de tung kegai ngau di. 4Penui pelane de Kemci Rabe ne puih di delü heled keda dung gade marang cuh di, Rabe ne penui de peu rang lu kebui tei kebeu nzwa eh. 5Jerusalem ga Judahme lungh bam, kideu deudi leune gade kegwang renet keteume. 6Penui makoa aide kesiu dau, mina maadi ge nkwa lu. Penui pelane penui suiyi di, kedanemene penui hang gege kecu kenlumme penui led gade marang kebam siu kedine. 7Penui swaga nah penui macang eh rang di, “Ainzwa eh marang kebamme aidung de au Galileeme lie! 8Ciciu cai, dainzwa cide, penui anui ramme led gade marang kebam anui pelane siu zeu no? 9Anui au Parthia, Media, nah Elam gade gwang; Mesopotamia, Judea, nah Cappadocia gade gwang; Pontus nah Asia gade gwang, 10Phrygia nah Pamphylia gade, Egypt nah Cyrene kemna Libya cuikui dung gade gwang. Anui kangge au Rome gade gwang, 11Judahme nah Gentileme Judaism renet mzai kedi maa nana, nah anui kangge au Crete nah Arabia gade gwang ciciu de anui pelane Tinggwang makedihh tei kegai ha dung penui anui led gade rang kebam siu!” dedi. 12Penui macang nah kebwak di eh, penui hang gege dade keteu eh, “Aide pekieh daino?” dedi. 13Dede kedame kenlumme de teu henui tei di eh, “Mina aidung de sak miee bam!” dedi.

Peter Samrang

14Pecai Peter apostleme keda kereiket dung de ngngwa cuh sap lu delü hemaabe dage sabaq eh marangcu di: “Zangme Judahme nah Jerusalem ga lungh kebam nnui pelane, a koa kingnei gailo delü acu peu aide pekieh dai bi kecu nnui dage rang lo. 15Mina aidung de au nnui kecet nzwa, sak miee bam ma; cu au tingco bam hekui gwale mereu. 16Meliene, aide ha caihakecibe Joel rang gailie: 17‘Aide I peting kekamle bie tei gaizie, Tinggwang rang la: #Joe. 2:28-32.

I a Rabe minaleu dage rui gaizie.

Nnui napei nah napui dung a sam pwa pau zie;

Nnui rehangme marengei dung ngau zie,

nah nnui kecingme hemang mmi zie.

18Yeo, a kilame, mipei nah mipui dung hang nana dage,

cipau tingdau I a Rabe rui gaizie,

nah penui a sam sa zie.

19I nreu lebie ting gage mimakecang dung nah nkangle kideu reu gage miswa kega dung tei gaizie. Cika hejai, mi, nah katung kecu mika bam zie;

20tingnaimik mui dizie, nah hekei hejai nzwa gie dizie, Rampaube Tingba kedi nah kendu de kegwang dwa.

21Nah ciciu de, Rampaube dage kengha kie eh sa gai kelume de keli beuzie.’”

22“Sam aidung de kingnei lulo, zangme Israelme dung! Nazarethme Jisu gu nreu lede kehungh kenkieng de nnui dage keulia ncigi gaida Tinggwang peda de miswa kega nah mimakecang dung pelane tei kegai gade. Nnuikatei de ci bam, kedanemene cide aika nnui kak gade tei delu. 23#Mat. 27:35; Mrk. 15:24; Luk. 23:33; Jhn. 19:18.Pekatei pe mariam rehi gade Tinggwang au Jisu ze nnui de pwapeu kera cet pwa la dida; nah kemaume de peu pecu gwak eh nnui pecu teitset dida. 24Dede Tinggwang pecu ketsai gade qwakcuh luda, cide kenkieng gade pecu lungmpet peu, kedanemene pecu ketsai ne hebaangme ge tei eh kaizeu gai laklu.#Mat. 28:5,6; Mrk. 16:6; Luk. 24:5. 25Kedanemene David pe ha rang kegai, #Lei. 16:8-11.

‘Peting pelane ga Rampaube a dwa ga kela I ngau;

pa a tai ga la, nah I keherei dilak.

26Nah cine I au suiyi le

puihpung bam lie de,

Nah I, tsai zie liede,

keregui de cisiak eh mtak luzie,

27kedanemene ketsaime deu gage nang acu gi gaidi laklu;

nang au n kila kesamsang de peu herau gade tim gah di laklu.

28Kering ga gwang lu kera lampui de nang acu liah gaida,

nah nang kebam de ziemne suiyi le acu pui luzie.’ ”

29“A siname, I nnui dage anui pao kenlang Hegwangpei David ha rang nci gai maisia. Pa au tsaidi nah kung di, nah henai kecang de pe rauh au aika anui da bam. 30#Lei. 132:11; 2 Sa. 7:12,13.Pa au caihakecime ge, nah Tinggwang pecu sampet kebeu de pa ci bam: Tinggwang samkak mting eh pa David leuhme gade hegwang tei beuzie lie beu, David nzwa eh. 31David au aipau cai Tinggwang tei gwang kerabe ngau, nah cine pa Messiah ringcu dai kera ha rang, ‘Pecu ketsaime deu gage gi gai dima; pe paaube herau gade tim gah dima,’ de eh pa kerang dau. 32Tinggwang ne aipau Jisu ze de ketsai gade qwak nring lu, nah aipau ha de anui pelane au zierangme delie. 33Pecu qwak nring pwa pe pei, Tinggwang ba zetle ge kai luda, nah peda de Kemci Rabe ngau luda, pe sampet kebeu nzwa eh. Cu nnui kengau nah kesiu de au pe mapeuh lie cide pa ne anui dage rui gaibeu da. 34#Lei. 110:1.Kedanemene cide au David tinggim ga hangh ma; meliene pa rang gai, ‘Rampaube a Rampaube dage rang: Aika a zetle bam lulo 35I n ngauraume de n pi kang gage kaipwa n pidauh nzwa tei lu kemaktane.’

36“Ciciu cai, Israelme pelane, Jisu aipau de, nnui pecu gwakkedibe au, Tinggwang ne Rampaube nah Messiah tei kebeube de delie kecu cisiak lu kerabe lie!” 37Mina dung aide siu kelu dau, penui lung keherei süt ti delü Peter nah apostleme kedame dung dage rang eh, “Anui daipai tei laino, siname?” dedi. 38Peter penui dage rang gai, “Nnui hang gege kecu pe mau dung gade nreu lu maisia delü Jisu Khrista zi gade duipum tei lu, ciciu de nnui mau dung gi beuzie; nah nnui Tinggwang mapeuh, Kemci Rabe ngau luzie. 39Kedanemene Tinggwang sampet au nnui nah nnui name ziebene, nah kemdei ga kelame pelane Rampaube anui Tinggwang peda ge qu gai kelume pelane ziebene tei beu delie.”

40Peter penui dade kie nah sam keda kekiee ge teu pa penui de kecung gai, “Mina kenlien aidung deda kemau ziehi kegwang gade nnui de keli lulo!” de rang eh. 41Penui mina kekiee ge pe sam nlum lu delü duipum tei lu, nah mina 3,000 nsam ge cipau nai hemaabe ga silu. 42Penui penui ting apostleme dage kai eh maci lu, hemaabe ga ncüt lu delü hemaabe taktyei mzi tyei nah ngngwa kekie tei.

Kenlumme kak ga Kelungh Teilung

43Apostleme dade miswa kega nah mimakecang kekiee ge tei, nah mina leune kengngi gele puih di. 44#Bat. 4:32-35.Kenlumme pelane ngngwa hemaa ge tei ntiprip jüja eh bam di nah penui gu dung hang ge gede ngngwa mzi bam di. 45Penui penui gunia nah mabam dung zwa, delü pelane kak gade rangkang mzi, hang gege kecu teu maikesia rehi gade. 46Penui tingba ramsangne maa ge tei eh Kerecaki gade redau, nah penui penui ki dung gade ngngwa ncüt lü matyei, suiyi nah lungciep teu eh tyei, 47Tinggwang ze twa, nah mina pelane suiyi de teu lungh kehega eh lungh. Nah tingba ramsangne Rampaube ne penui maa gage kelikelume dung de si gaibeu beu bam di.

Currently Selected:

BATA 2: ZemeNB

Highlight

Copy