BATA 4

Peter penai Johan Baudi be dwa ga kesap

1Peter penai Johan mina dung dage marang lia bamreu kecu dau cingkume#4:1. cingkume; Laisiu kesa ga bam cingku kedihme dung. kangge, Kerecaki kekwame de pie kerengei kedibe, nah Sadduceeme qang ge gwang. 2Penui penui rata di kedanemene apostlebe kena Jisu ketsai gade ringcu di delie kecu mina dung de ledeu kebam ne, cide au ketsaime ringcu zie lie kecu keulia nci kegai ge. 3Cine penui penai de tui lu delü penai de hebaangki gage pecai benai gwang kemaktane kaizeu di, cide rizu dida kecune. 4Dede samlia siu kelume kekiee nlum lu; nah mina 5,000 nsam ge kiee pet lu. 5Pecai benai Judah muiteume, hangkiame, nah Hezai keledeume Jerusalem ga nkwa lu. 6Penui cingku pei Annas nah Caiaphas, Johan, Alexander, nah cingku pei kelak ga mina kedame de ngngwa redau. 7Penui apostlebe kena de peu penui dwa ga sap lu delü penai dade keteu, “Dainzwa nnai aide teino? Nnai daipai kenkieng bam no mede nnai cau zi teu no?” dedi.

8Peter, Kemci Rabe puih eh, penui sam keli gai, “Muiteume nah hangkiame: 9anai dade henai pepi kesiabe dage heta keyi ketei nah dainzwa pecu tei myi lu bi kecu ha keteu cai, 10ciciu cai nnui pelane ci lu maisia, nah Israelme pelane ci lu maisia, mina nnui dwa aika kesapbe aipau de au Nazarethme Jisu Khrista nnui pecu gwak di nah pecu Tinggwang ne ketsai gade qwak nring kelube zi kenkieng gade yicang lu. 11#Lei. 118:22.Kesanglaisiu ne kerangbe de au Jisu delie,

‘Nnui ki keteime ne mlai kedi

tsuqang de au pelane gade nlang tube dida.’

12Peda de rünne kelikelu ngau luzie; kideu pelane ga anui de keli lu kebui Tinggwang mige dede peu ma.”

13Peter penai Johan kuu süt kecu ngau eh nah penai laisiu ci kemak maidakme lie kecu ci luge Baudi be Nqwa peupeime penui swaga di. Pecai penai Jisu ze ngngwa kelame lie kecu penui nsung lu. 14Dede penui au magede rang kera gah di, kedanemene tei myi kelu bede Peter penai Johan ze ngngwa cika sap kebam penui ngau kelu ne. 15Cine penui penai de hemaabe Baudi kilung gade tetti lodi, nah pecai penui katei kempau cuh di. 16Penui keteu eh, “Anui aipau kena de teu daipai tei lai? Mimakecang tsamceu kecu aide penai ne tei kegai Jerusalem ga kebamme leune ci bam, nah cide anui melie daulak ta. 17Dede maha aide mina dung kak ga rangrwa petsi melu kerane, anui mina aipau kena de Jisu zi gade mige dage de madau gede marang si dai helo rang di golie” dedi.

18Cine penui penai de qu caili mlüt lü Jisu zi gade keheitei de penai de peu marang mede ledeu laklie rang beu. 19Dede Peter penai Johan penui sam keli gai, “Nnuikatei cet pielo Tinggwang dwa de dai de be petau zie bi — nnui sam kemzaibe mi Tinggwang sam kemzaibe zie bi. 20Dede anui au anui kengau nah kesiu bedung rang mtak di gai laklie,” dedi. 21Cine baudi be penai de keheu mting si gai delü pecai penai de lungmpet peudi. Penai de saja peu kera tei gai kelak penui cide ngau di, kedanemene matei kedi de ziemne mina pelane Tinggwang ze twa bam kedine. 22Tei kenkeih mimakecang aide mina mmi redai swa cing kedi kauge dage tei gai.

Kenlumme Kekuu ziemne Kie kecu

23Peter penai Johan ze lungmpet peu kerikezi, penai penai maame da caili gwang delü cingku kedihme nah hangkiame daipai rang bi kecu penui dage pau beu. 24#Tet. 20:11; Neh. 9:6; Lei. 146:6.Kenlumme cide kesiu dau, penui pelane ncüt lü Tinggwang dade kie: “Rampaube nah tinggim, kideu, nah jaaidi, nah cidung ga kela ma pelane Damkegaibo! 25#Lei. 2:1,2.N kilabe, anui pao David dade nang Kemci Rabe gade marang,

‘Daitei Gentileme penui rata lano;

daitei mina dung penui ciemriem kemta bedung riam lano?

26Kideu ga hegwangme penui katei penui de telei lu,

nah kedihme dung gwang nkwa lü

Rampaube nah Messiah ze mmau,’ de eh pa kerang dau.

27 # Luk. 23:7-11. Mat. 27:1,2; Mrk. 15:1; Luk. 23:1; Jhn. 18:28,29. Kesang lie Herod penai Pontius Pilate namdi aide Gentileme nah Israelme de ngngwa nkwa lü Jisu, n kemci kila, nang pecu tei pwa Messiah tei kebeube de mmau. 28Nang n kenkieng nah n lungning gade tei zie lie riam kelu leune tei zie lie penui gwang nkwa lu. 29Nah cu, Rampaubo, penui kekeheu dung de pie gailo, delü n kilame, anui de peu, n samlia de kuu süt eh rang lo. 30Tei myi kerane n ba hwa gailo, nah miswa kega nah mimakecang ta dung n kemci kilabe Jisu zi gade tei lu kebui peu lo.”

31Penui kekie teicang dige, penui nkwa kebam heni de mlai di. Penui pelane de Kemci Rabe ne pui lu delü Tinggwang samlia kuu eh rang cu di.

Kenlumme Kemacüt kedi

32 # Bat. 2:44,45. Kenlumme maabe ngngwa sui ge nah lung ge tei bam di. Migede pe ma gede pwa pekatei pe gulie tadi, dede penui pelane penui kebam be leu hang gede ngngwa kegucüt di. 33Kenkieng kedi teu apostleme Rampaube Jisu ringcu dai kedi zierang tei, nah Tinggwang samlam kiee süt kecu ruipwa penui pelane dage kai beu. 34Hemaabe ga migede kenaang bam tadi. Luh mede ki dung kebamme cidung zwa lu, zwa kelu gade ngau kelu rangkang teugwang, 35delü cide apostleme de peu; nah rangkang be hang gege kecu dage pa teu maikesia rehi gade mzi beu.

36Nah cinzwa Joseph, Cyprus gade nna kelu Levime ge, apostleme pecu Barnabas lie qu kelabe (cide pekieh “Milung Taukemlabe”), 37pe luh ge zwa lu, rangkang keu lu, delü cide apostleme de balie beudi.

Currently Selected:

BATA 4: ZemeNB

Highlight

Copy