BATA 1

1 # Luk. 1:1-4. Keku Theophilus:

I a Laisiukwak keraibe gage Jisu pe ta tei kendeube ting gade pa keteibe nah keledeu bedung ha pelane I rau gai dida 2pecu tinggim ga ngngwa hangh di kecu tingba de kecang ha. Pecu keucu di kemak dwa, Kemci Rabe kenkieng gade pa ne kedetkelu pe gu apostleme de pa ledeu gai. 3Pa petsit cai zie redai ge pecu peu penui de pia kekiee ge ngau gai ciciu eh pa ring kela lunghau mezing kecu lia ncigi gai. Penui pecu ngau, nah penui de ngngwa Tinggwang Hegwangram ha kempau. 4#Luk. 24:49.Nah penui gwang nkwa kelu dau,#1:4. penui gwang nkwa luge; mede pa penui de ngngwa kebam dau, mede pa penui de ngngwa matyei kebam dau. pa penui de aja aide peu: “Jerusalem püt ti so, dede I nnui dage rang kebeu mapeuh de kwalu, a Pei sampet kebeu mapeuh de. 5#Mat. 3:11; Mrk. 1:8; Luk. 3:16; Jhn. 1:33.Johan dui teu duipum tei, dede zie kiee kemak cai gade nnui au Kemci Rabe gade duipum tei dizie.”

Jisu ze Tinggim ga Teucuh kedi

6Apostleme Jisu ze redau luge, penui pecu keteu, “Rampaubo, nang aipau ting gade Israelme de hegwangram peu caili zie deni?” dedi.

7Jisu penui dage rang gai, “Peting nah pehi dung au a Pei kenkieng ne riampwa bam, nah cidung de daidau zie bi kecu nnui ci gailak. 8#Mat. 28:19; Mrk. 16:15; Luk. 24:47,48.Dede Kemci Rabe nnui da kegwang dau, nnui de kenkieng le puih luzie, nah nnui Jerusalem ga Judea nah Samaria pelane ga, nah kideu penlih ga kecang a zierang tei zie.” 9#Mrk. 16:19; Luk. 24:50,51.Aide rang kedi cai, penui pecu pie kebam gade, pecu tinggim ga ngngwa nghang di, nah penui mikngau gade pecu kemwa gene suhng teu di.

10Pa tet kedi dede penui pie lingci eh tinggim le piebam reu kecu dau, zette eh pai keha kebah hang na penui tai ga sap lu 11delü rang gai, “Galileeme, nnui daitei cika sap bam no? Jisu aipau de, nnui dade tinggim ngngwa nghang kedibe pa tinggim ga gwang kecu nnui kengau de kesiakge eh caili gwang zie,” debeu.

Judas Paapwa Keloibe

12Pecai apostleme olive Deutuh gade Jerusalem ga caili gwang di, cide namdibe gade kilometre ket nsam dei ge. 13#Mat. 10:2-4; Mrk. 3:16-19; Luk. 6:14-16.Penui namdibe ga nlüt lu delü penui kebam kibung ga hangh di: Peter, Johan, Jakob nah Andrew, Philip nah Thomas, Bartholomew nah Matthi, Alphaeus napei Jakob, pe ram de hungkela Simon, nah Jakob napei Judas. 14Hemaa tei eh penui kekiee tei kerane nkwa la, mipui dung nah Jisu pui Mary nah pe siname de ncüt si eh.

15Tingbazie kiee kemak ge cai kenlumme nkwa lu, pelane ge mina 120 nsam ge bam, nah Peter marang kera cu sap lu. 16Pa rang gai, “A siname, Kemci Rabe ne David dade rang kegai Judas, Jisu ze ketuihme puisau tei kebeube, ha mrai rang kegai de, kesanglaisiu teicang zie. 17Judas au anui maa ga peupeime ge, kedanemene anui ta ga ncüt kera pecu kedetkelu ne.”

(18#Mat. 27:3-8.Judas pe ta kesia gade ngau kelu rangkang de pwa pa luh ge lui lu, cika de pa tsaidi; pe paau pup gai delü pe lungnet dung pelane lwa pet. 19Jerusalem ga lungh kebamme pelane cide ha siu, nah cine penui katei penui led gade luhpak cide de Akeldama lie penui qu cide pekieh “Hejai luh.”)

20 # Lei. 69:25. Lei. 109:8. “Kedanemene cide Leidung Laisiukwak gage raupwa kebam,

‘Pe ki de peu mta dilu;

peu mige dede cika lungh so.’

Cide nzwa de rau si gai,

‘Migede peu pe ta pwa loi lu.’

21-22 # Mat. 3:16; Mrk. 1:9; 16:19; Luk. 3:21; 24:51. “Ciciu eh, mi hang ge anui de ngngwa Rampaube Jisu ringcu dai kedi zierangme ge tei lu maisia. Pa au Rampaube Jisu anui de ngngwa hebeuh ketei ting pelane ga, Johan pe duipum#1:21-22. Johan pe duipum zierang tei gai; mede Johan pecu duipum tei beu. ketei zierang teicu kecu gade Jisu ze anui dade tinggim ngngwa nghang kedi kecang anui maa ga kelame ge maisia.”

23Cine penui mina hang na zi rang gai: Joseph, pecu le Barsabbas lie qu kelabe (Justus lie eh de la), nah Matthias. 24Pecai penui kekie tei gai, “Rampaubo, nang mina leune lungcet ci bam, cine aipau kena cau bede nang kedet lu dibi anui de liah lo 25pa bam kera heni ga gwang kerane tet kedibe Judas bahm ga bahm eh, apostle ge eh heta tei kera,” dedi. 26Pecai penai de kedet kerane dacak, nah kedetkelube de au Matthias pecu apostle kereiket maa gage silu.

Currently Selected:

BATA 1: ZemeNB

Highlight

Copy