JOHN 5
5
Binnâng Khoanchhet Mêsiet
1Ediko Jisu Jews heh lõkuh rãng Jerusalem nâng katwah. 2Jerusalem wah saak lupthĩn lemkaam tâko bin wantheh dâng wah#5.2 Saak luphok thĩn lemkaam tâko...Bin; bã Saak luphok thĩn tâko bin...the. eko kânthong wanbengâ dâng wah; epa Hebrew jabma Bethzatha ngãma ngãekah.#5.2 Bethzatha; wanwantheh ma Bethesda raang ekah. 3Kânthong ko khoanchhette jahmõang jup lahma dângwah—mitdoak, dãkò, kôasôte.#5.3 wanwantheh ma vars 3b-4 pa johraang ekah: Thinma jo phetwâng pa bêmwah, 4chenrãngma ngãko poatpoat theh rangkhhethung wah Teso ngĩntatte joko kã lahma jo pa chîphhet thuk wah. Phûmma jo pa phhet diko hẽn pa joko khhabâng thhôan jâkã ekah a epa te a chenni khoanchhet dâng wah komĩn mêwah. 5Ere theko roakrem pâesat khoanchhet ma chêm lahma mihwã wantheh dâng wah. 6Jisu ma mihwã pa ere theko jup lahma khêwah, ngãle mihwã pa ajahthêm rangpâ khoanchhet ma lâchêm tah ngãma Jisu ma jet dâng wah; ephûmma tenâng Jisu ma thôngphâ wah, “Nanga asên hûn ekole?”
7Khoanchhette mihwã pumma dânthâng wah, “Hêthôte, jo pa phhetpoat ko ngã thienkatte are theko hẽnmĩn ahõ; ngã dedema katrãng phũngkole, ngã mako hẽn komĩn khakho chikã ekah.”
8Jisu ma tenâng ngatwah, “Tõanchep oh, nang hem pa tõanpe lohma khoam oh.” 9Lemlîen ma mihwã pa sen lahma tôanchep wah; tema ate hem pa tõanpe lahma khôam wah.
Ere sentah jâ pa Pîentông jâ dâng wah, 10Ephûmma Jews thôte jabte hehma ere sentah mihwã ko ngatwah, “Thejâ Pîentông jâ, eroh wah nãng Nîem jũnko nangma nang hem pa lata tõanpe min.”
11Tema dânthâng wah, “Ngã sênsiette mihwã pumma ngãhem pa tõangpe lakma khôamrãng chîen ehang.”
12Thinma tenâng thôngphâ wah, “Hẽn a nangnâng are hem pa tôanpê chîente pa?”
13Rohkomĩn khoanchhette mihwã pumma Jisu pa hẽn a epa lajet wah, chenrãngma ngãko ere theko mihnyãn heh jahmõang dâng wah, ngãle Jisu mĩn sitsiak mahkhhôam wah.
14Ediko Jisu ma Rangsôamhum nâng lepkhẽ lahma ere mihwã ko ngatwah, “Tattan, ade phûmma nanga lâsen toh; eroh wah pap kaam nekthõng motû, eroh ladang madang oko chenni komĩn enôma achhih edang hoh.”
15Ediko ere mihwã pumma chhõan lahma Jews heh thôte jabte hehnâng ate sênsiette pa Jisu dâng wah ngãma thôkoh wah. 16Ephûmma thinma Jisu nâng chêmsiet rãng bângphûng wah, chenrãngma ngãko tema Pîentông jâko khoanchhet mêsiet wah. 17Jisu ma thin nâng dânthâng wah, “Ngã Wã pa rôantang ma moat jûjû mo ekah, ngãle eroh wah Ngãma mĩn moatmin.”
18Aroh ngat jũnko Jews heh thôte jabte hehma ate ritphê rãng ajahthêm phûng wah; epa tema Pîentông jâ Nîem chhihsiet lôlô ladang tema Joban pa ate dede Wã ngãma mĩn ngãekah, ngãle ate dede Joban tôthã hôanrîî ekah.
Achha Chân
19Ephûmma thin nâng Jisu ma dânthâng wah, “Ngãma nê nâng toangtang thôkoh ekah: Chha ma ate dedema chenni mĩn tamo mah; Ate Wã ma chenni mo lahma khẽ ekah a epa bã moekah. Wãma chenni moekah a epa Chha mamĩn moekah. 20Chenrãngma ngãko Wã pumma Chha ko hûn lahma ate moatlem chentô moekah heh phangtang khêsok ekah. Wãma are nôma mĩn moatlem dong heh ate Chha ko ekhêsok a, ngãle nê phangtang bârit erẽ en. 21Wãma chenroh ritwah ngak hinsiet lahma rôandông koh ekah a ere rãngrãng, Chha mamĩn tema hẽnhẽn nâng hûn ekah a ere heh nâng rôandông ekoh a. 22Ngãle Wãma hẽn nâng mĩn achhih asen ngãma rẽnmah. Tema ate Chha ko achhih asen rênrãng chân phangtang lâkoh tah, 23eroh wah thinma chenroh Wã nâng sôangraang ekah a ere rãngrãng chentô ma Chha pamĩn sôangraang min. Hẽnma komĩn Chha nâng lasôang raang madang ako, ate chîenkatte Wã nângmĩn sôangraang mah.
24“Ngãma nê nâng toangtang thôkoh ekah: Hẽnhẽn ma ngãjab pa tat lahma ngã chîenkatte ko pũtẽ dâlem ekah a erehehma rôantang rôanjêng rôandông echoh a. Thin nâng achhih ngãma la ngãmin, rohkomĩn arit wah ahîn thin nâng lâdang tah. 25Ngãma nê nâng toangtang thôkoh ekah: Sanpoat pa hûerah —ere sanpoat pa lâhû thah —rîîchoante hehma Joban Chha kahrã echohtat a, ngãle hẽnhẽn ma epa chohtat ekah a ereheh engak hin a. 26Chenroh Wã ngewah rôandong choh ekĩ a ere rãngrãng, tema ate Chha pa rôandông kohte rãng hôan ekah. 27Ngãle tema Chha nâng achhih asen rênrãng chânkoh ekah, chenrãngma ngãko te a Mihnyãn Chha. 28Are ngĩn ko nekpatrîî en; chentô rîîchoante hehma ate kahrã chohtat sanpoat pa ehûrah 29ngãle mengruk wah engak hinwãng rah: Hẽnhẽn ma moatlem sen motah a ereheh rôandông choh lahma engak hin a, ngãle hẽnhẽn ma moatlem chhih motah a ereheh ngak hin lahma pap wẽndô nâng ekham rîîkã a.
Jisu Rãngma Hâkhi
30“Ngã dede chânma ngãma chenmĩn tamo mek; Ngãnâng Joban ma chenroh thôkoh ehanga eroh jôbã rẽn ekãng, eroh wah ngãma toangtang ko rẽn ekãng, chenrãngma ngãko Ngãma chenroh hûn ekãnga eroh momek, rohkomĩn ngã chîenkatte pumma chenroh moat hûn ekah eroh moekãng.
31“Ngãma ngã dede lôlô marângthô rîî angko, ngãma chenni thôekãnga epa lĩnlin ngãma lakep min. 32Rohkomĩn ngã rângthôte tonga, ngãle ngãma jet, tema ngã jũnma chenni thô ekah a epa toangtang. 33Nêma John tânâng nê ngĩnmatte chîenkattet, ngãle tema toangtang thôkoh wah. 34Ngãma mihnyãn wah hâkhi hûnmek; Ngãma are jab ekãng pa nê kho chenpẽ en ngãma jab ekãng. 35John pa wẽntit dô ma rângphiak arãngrãng phiak lahma dâng wah, phûmma nê a ate wẽnphiak ko poattheh lôlô khũhah nâhah dâng wah. 36Rohkomĩn John ma hâkhi hôan tah nôma adong ngãrãng hâkhi hôante tonga: Ngãma chenni mo ekãnga epa Ngã Wã ma mothuk ehang, are pumma ngã jũnma hâkhi hôan lahma jab ekah, ngãle ngã a ngã Wã ma chîenkat wah ngãma khêsok ekah. 37Ngãle ngã chîenkatte Wã mamĩn ngã jũnma hâkhi hôan ekah. Nêma ate kahrã mĩn mãthat chohtat ekẽn, ngãle ate thhen phãng mĩn mãthat chohkhẽ ekẽn, 38ngãle nêma ate ngĩn pamĩn nê hûngnâng thîenmet, chenrãngma ngãko tema chîenkat erah ko nêma pũtẽ dâlem met. 39Nêma Joban nyapraang pa weh ekẽn, chenrãngma ngãko nêma ekowah rôantang rôanjêng rôandông chohmin ngãma pũtẽ dâlem ekẽn. Phûmma are Joban nyapraang pumma ngã jũnma jab ekah! 40Rohkomĩn nê a ngã tânâng rôandông chohrãng hok hûnmet.
41“Ngãma mihnyãn ma rô hûnmek. 42Rohkomĩn nê a chen rãngrãng mihnyãn a epa ngãma jet a, ngãle ngãma jet nê hûng nâng Joban nâng hûn pa ahõ. 43Ngã a ngãwã chân demnâng kãerâng, rohkomĩn nêma ngã kepmah hah; ngãle hẽn komĩn ate dede hûngsi ko mahû rah ko epa nêma kep ekẽn. 44Nêma wãtheh ma wãtheh rângthômîn hûn ekẽn, rohkomĩn nêma wantheh lôlô Joban pumma rângthô pa hûnmet; eroh madang enko nêma ngãnâng chenroh ejîen pũtẽ dâlem hah a? 45Nêma aroh nek thonghûn en, Ewã tâko ngãma nê nâng esê khãm hĩ ngãma. Nima pũtẽ dâlem ekĩ ngãma ngãekẽn Moses ma jôbã nê nâng esê khãm hen. 46Nêma lĩnlinjô Moses nâng pûtê dâlêm madang enko, ngã nângmĩn pûtê dâlêm min dâng wah, chenrãngma ngãko tema ngã jũnma raangwah. 47Rohkomĩn tema chenni raangtah a eko nêma lapũtẽ dâlem dâng phûmma, ngãma chenni jab ekãnga ekojã chenko epũtẽ dâlem en a?”
Currently Selected:
JOHN 5: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
