MARK 3

Haat Sukhi Kene Thaka Ekjon Manuh

1Arubhi Tar girja ghor te jaise, aru tate haat sukhi jua manuh ekjon thakise. 2Aru bisram din te Tar pora eitu manuh ke hustho kori dibo na nai eitu, Jisu upor te bodnam dibole taikhan pora sai thakise. 3Aru Tar he heitu manuh, kon laga haat sukhi kene thakise tar ke koise, “Iyate ahhibi.” 4Aru Tar pora taikhan ke koise, “Bisram din te bhall kam koribo na nahole dukh laga kam koribo, Jivon bachai dibo na nahole morai dibo? Kanoon te ki koi ase?” Kintu taikhan sob chup-chap thaki jaise. 5Aru Jisu he khong uthi kene taikhan sob ke saise aru taikhan laga mon tan tu dekhi kene mon dukh hoise, aru heitu manuh ke koise, “Tumar haat sidha koribi.” Tar pora sidha korise, aru tar haat tu bhall hoi jaise. 6Loge-loge Pharisees khan ulai jaise, aru Herodians logot te Jisu ke keneka nosto korai dibo eitu kotha alusona korise.

Besi Manuh Jisu Piche Jua

7Jisu he Tar laga chella khan logot te samundor phale jai jaise, aru Galilee jaga pora besi manuh jama kori kene Tar laga piche te ahhise; aru Judea pora bhi ahhise 8aru Jerusalem aru Idumea aru Jordan par kori thaka jaga aru Tyre aru Sidon pora bhi besi manuh jama korise, aru Tar pora kora kam tu huni kene Jisu usor te ahhise. 9Aru Jisu he Tar chella khan ke ekta nao, Tar karne jugar kori dibole koise, kilemane manuh tu besi jama hoise, aru Tar ke chapai dibole nisna hoise; 10kilemane Tar he besi manuh ke hustho kori dise, eitu karne kon manuh bemar thakise taikhan sob pora Tar ke chubole sesta korise. 11Aru ohusi atma pora ketiya Tar ke dekhise, taikhan Jisu aage te giri kene dangor awaz pora koise, “Apuni tu Isor laga Putro ase.” 12Aru Tar kon ase eitu janai nadibole Jisu he tan hukum taikhan ke dise.

Pasonir Barohjon

13Aru Tar pahar te uthi jaise aru kon kon ke matibole Tar itcha hoise, taikhan ke matise aru taikhan Tar usor te ahhise. 14Aru barohjon (Kon ke Pasonir eneka matise) tarkhan Tar logot te thakibo aru prachar kori kene pathabo nimite niyuk kori loise, 15aru ohusi atma ke khedai dibole khyomota tarkhan ke dise. 16Tar pora barohjon ke niyuk kori loise: Simon (kon ke Peter eneka Tar pora nam dise); 17Zebedee laga putro James aru tar laga bhai John, (kon ke Boanerges eneka bhi mate, eitu matlab ase, Megh garjan laga Putro khan); 18Andrew aru Philip, Bartholomew aru Matthew, Thomas aru Alphaeus laga putro James, aru Thaddaeus aru Simon Canani manuh, 19aru Judas Iscariot, kon he Jisu ke thogai dise.

20Tetiya Tar ghor te jaise, aru jama kori thaka manuh khan sob ahhise eitu nimite tar khan khabole bhi para nai. 21Aru ketiya Tar laga porial pora eitu hunise, Tar ke dhori bole taikhan jaise, kilemane manuh khan pora koise, “Tar pagala hoise.”

Pobitro Atma Ke Ninda Kora

22Aru Jerusalem pora pondit khan ahhi kene koise, “Tar tu Beelzebul pora dhori kene ase,” aru “Saitan laga bhut pora he Tar ohusi atma ke khedai ase.” 23Aru Jisu he taikhan ke mati kene, dristanto pora koise, “Keneka Saitan pora Saitan ke khedai dibo? 24Jodi ekta rajyo nijor majot te bhag kori thake, eitu rajyo tu nijor pora khara kori thakibole naparibo. 25Aru jodi ekta ghor nijor majot te bhag kori kene thake, eitu ghor tu khara kori thakibo naparibo. 26Aru jodi Saitan he nijor upor te uthi kene bhag kore, tar khara koribole naparibo, kintu khotom hoi jabole he ase. 27Kintu ketiya tak balowan ekjon ke bandhi narakhe, tetiya tak konu manuh pora bhi eitu tagot manuh laga ghor te jai kene saman uthai lobo naparibo; tar ke bandhile he uthai lobo paribo.

28“Moi, hosa kotha tumikhan ke koi ase, manuh khan laga paap kiman holebhi, aru ki ki ninda kora holebhi khyama pabo, 29kintu kon pora Pobitro Atma ke ninda kore, taikhan ketiya bhi khyama napabo, kintu eitu paap laga galti tu ananta tak thakibo”— 30kilemane taikhan he koi dise, “Tar logot te ohusi atma ase.”

Jisu Laga Amaa Aru Bhai Khan

31Tetiya Tar laga amaa aru bhai khan ahhi kene bahar te khara korise aru Tar ke matibole dise. 32Aru besi manuh khan Tar usor te bohi thakise, aru taikhan pora Tar ke koise, “Apuni laga amaa aru bhai khan bahar te ase, aru apuni ke bisari ase.” 33Aru Tar he uttar dise, “Moi laga amaa nahole bhai khan kon ase?” 34Aru Tar usor te bohi thaka manuh khan ke sai kene, Tar he koise, “Moi laga amaa aru bhai khan iyate ase! 35Kon manuh he Isor laga itcha kore, eitu khan he Moi laga bhai, bhoni aru amaa ase.”

Currently Selected:

MARK 3: NagaMe

Highlight

Copy