MARK 4

Bijon Hisai Diya Laga Dristanto

1Arubhi Tar he samundor phale sikhai thakise. Aru besi manuh khan Tar usor te jama kora karne Tar samundor te thaka ekta nao te bohi bole hoise, aru manuh khan sob tu samundor phale maati te thakise. 2Aru Jisu he dristanto besi di kene taikhan ke sikhai dise, aru Tar he sikhai kene eneka koise: 3“Hunibi! Bijon hisa manuh ekjon bijon hisai dibole jaise. 4Aru tar bijon hisa homoi te, konuba bijon khuj raasta te girise, aru chiriya khan ahhi kene eitu khai dise. 5Kisuman bijon pathor jaga te girise, kon jaga te maati besi thaka nai, aru loge loge eitu uthise, kilemane bijon tu maati bhitor te jua nai; 6aru surjyo uthi kene eitu upor te dhup dise, aru hipa nathaka karne eitu sukhi jaise. 7Dusera bijon kisuman katta thaka jaga te girise, aru katta ghans uthi kene bijon tu dhaki dise, aru eitu bijon dhan dhora nai. 8Aru dusera bijon bhall maati te girise aru dhan ulai kene dangor hoise aru dhan besi dhori kene trista, saathi, aru ekso tak hoise.” 9Aru Tar he koise, “Kon manuh hunibole kan ase, tar pora huni lobi.”

Dristanto Laga Udeshyo

10Aru ketiya Tar ekela thakise, barohjon chella logot te konuba usor te thaka manuh khan pora eitu dristanto laga ortho hudise. 11Aru Tar pora taikhan ke koise,“Tumikhan karne tu Isor rajyo laga gupon kotha sob janai kene ase, kintu bahar manuh khan karne hole kotha sob tu dristanto te he ase; 12Eneka hole he

“tar khan pora dekhi lebhi nachinibo,

aru hunile bhi nabujibo,

nahole taikhan bhi ghurai kene ahhibo aru khyama pabo.”

13Aru Tar pora taikhan ke koise, “Tumikhan pora eitu dristanto nabuji ne ki? Tetiya keneka hoi kene dusera dristanto sob tu bujibo? 14Bijon hisa manuh pora Kotha tu hisai dise. 15Aru raasta te giri jua tu eitu ase, Kotha tu ketiya hunai dise, taikhan pora huna loge loge saitan ahhi kene ki kotha huni loise eitu taikhan pora ulai loi jaise. 16Aru eitu nisna he pathor jaga te bijon hisai diya bhi ase: ketiya taikhan pora Kotha tu hunise, khushi pora loge loge mani loise. 17Aru taikhan nijor logot te hipa nathaka nimite olop homoi he thakise; tetiya Isor kotha nimite tarona nahole kosto besi ahhi jai, loge loge taikhan giri jai. 18Aru dusera konuba katta majot te girise. Eitu kon he Isor kotha tu hunise, 19kintu prithibi laga bhabna aru dhon bhabna laga thogai diya aru kisim-kisim lobole itcha kora pora Isor Kotha tu dhaki kene morai dise, aru phol dhora nai. 20Kintu kon tu bijon bhall maati te girise, eitu kon pora Isor kotha tu hunise aru eitu mani loise aru phol dhorise eitu khan ase, aru trista, sathita, aru ekso tak pongchi kene phol jama korise.”

Tukuri Niche Te Saaki

21Aru Tar he taikhan ke koise, “Bati ekta tu nijor jaga te narakhi kene, tukuri nahole bisona niche te bond kori kene rakhibo neki? 22Kilemane eku bhi lukai kene nai, ulai jabole he ase; nahole eku bhi gupon te nai, puhor te dekhai dibole he ase. 23Jodi konuba he hunibole kan ase tar he huni lobi.” 24Aru Tar he taikhan ke koise, “Tumikhan pora ki huni ase eitu karne hushier kori lobi: tumikhan pora ki nap dise eitu he tumikhan karne bhi napi dibo, aru eitu pora arubhi besi dibo. 25Kilemane kon logot te ase, besi he di dibo; aru kon logote nai, olop thaka bhi tar pora loi jabo.”

Bijon Uthi Jua Laga Dristanto

26Aru Tar he koise, “Isor laga rajyo tu ekjon bijon hisa manuh pora maati te bijon hisai diya nisna. 27Tar raati te ghumabo aru din te uthibo aru bijon tu najani kene uthi thaka nisna ase. 28Maati pora he bijon tu ulai di ase, prothom te gojali ulabo, eitu pasot te pata ulabo, aru eitu pasot te dhan pura ulai. 29Kintu ketiya dhan tu paki jai, loge loge tar pora kasi anikene kati loi, kilemane dhan katibole homoi pongchi jaise.”

Sorso Bijon Laga Dristanto

30Aru Tar he koise, “Amikhan pora Isor laga rajyo tu ki logot te tulona koribo, nahole ki dristanto pora bujai dibo? 31Eitu sorso laga gutti huru bijon ekta nisna ase, kontu maati te hisai diye eitu prithibi te sob pora huru wala ase, 32kintu ketiya bijon tu lagai diye eitu uthi jai aru sobji gos majot te sob pora dangor hoi kene uthi jai, aru eitu laga daal dangor hoi kene ulai jai, tetiya akash laga chiriya khan pora eitu laga sanya te taikhan bah bonai loi.”

33Eitu nisna dristanto besi loi kene manuh khan pora bujibo para hisap te Tar pora Isor kotha koise; 34dristanto naloi kene Tar pora taikhan logot te kotha eku kua nai, kintu ekela thaka homoi te Tar chella khan logot te kotha sob tu bujai dise.

Jisu He Tofan Rukhai Diya

35Heitu din te, ketiya sham ahhise, Jisu he taikhan ke koise, “Amikhan pukhuri tu par kori kene dusera jaga phale jabo.” 36Aru genti napara manuh khan ke shari kene chella khan pora ekta nao te Jisu ke loi kene jaise. Aru dusera nao khan bhi tar logot te thakise. 37Aru tofan dangor ekta ulaise, eitu tofan pora nao logot te jur pora lagise eitu karne dhou paani pora nao tu bhorta hoi thakise. 38Kintu Jisu tu nao bhitor te, manuh boha charpai norom bostu pichai kene bona ekta te ghumai thakise. Aru chella khan pora Tar ke uthai kene koise, “Guru, amikhan moribole he hoise eitu apuni tu chinta nakori ne ki?” 39Tetiya Tar uthi kene hava ke gali dise, aru samundor ke koise, “Shanti! Chup hobi!” Aru hava tu rukhi jaise, aru shanti hoi jaise. 40Tar he taikhan ke koise, “Tumikhan kile iman bhoi kori ase? Tumikhan etiya bhi biswas nai ne ki?” 41Aru taikhan besi bhoi lagise, aru ekjon he ekjon ke koise, “Tene hole hava aru tofan pora bhi Tar laga kotha manibole, eitu kon ase?”

Currently Selected:

MARK 4: NagaMe

Highlight

Copy