Rom 12

1జేతి భాయిబందో, పవిత్తరన్, దేవేర్ ఖాతరేర్ నైఁ, తమ్ జీవన్ రేన్ భోకణేర్నాఁయిఁ తమార్ జీవ్డాన ఓన అర్పణ్ కార్లోకన్ దేవేర్ ప్రేమేన పక్డన్ తమేన నోరా కర్రోంచుఁ. హనూకరోజకో సేవా తమేన ఆచ్చో వేన్ రచ.

2తమ్ ఏ జగేర్ మలాజేన పక్డన్ నచాలజూఁ, ఆచ్చోన్, సమోరన్, భర్పూర్ వేన్ ఛజకొ దేవేర్ ఖాతర్ కాఁయిఁ ఛకో ఫర్చోకరన్, మాలమ్ కర్లోజుఁ, తమార్ మన్ బద్లాలేన్ నవొ రూప్ పాలో.

3ఓర్ ఊజ్ కేలేన ఛాజజేతీ జాదా నకేలజుఁ, దేవ్ ఏకేకేన హాఁసో పాడన్ దీనోజే విశ్వాసేర్ మాపేన పక్డన్, ఊ ఆచ్చో అక్కల్దారేర్ నైఁ రేన ఛాజజూఁ ఓన ఊజ్ కేలేణో కన్, దేవ్ మన దీనోజే కృపార్వడీతి తమార్ మా ఛజే హర్యేకేన కేరోఁచుఁ.

4-5ఏక్ జీవ్డామా అపణేన కత్రాయికో భాగ్ ఛతోయి సదా, ఏ జీవ్డార్ భాగేవున సేన ఏక్కజ్ కామ్ కూఁ రేనీకో, హన్నూజ్ కత్రాయికో ఛాఁ జకో ఆపణ్ సే, క్రీస్తూమా ఏక్ జీవ్డార్ నైఁ రేన్, ఏకేన ఏక్ జీవ్డార్ భాగేర్ నైఁ ఛాఁ.

6-7ఆపణేన మళోజే కృపార్ కార్ణే, నాళీ నాళీ కృపార్ వరమేతీ భరాన్ ఛాఁ. జేతి, ప్రవచనేర్ వరమ్ ఛజకో ఓన దీనోజకో విశ్వాసేన పక్డన్ ప్రవచన్ కర్ణొ, సేవా కరేర్ వరమ్ ఛజకో సేవకరేనన్,

8బోధా కరేర్ వరమ్ ఛజకో బోదకరేనన్, సీక్వాడి దేర్ వరమ్ ఛజకో సీక్వాడి దేర్ కామ్ కరాఁ, వ్యాంటేవాళో ఆచో దల్లేతీన్, నాయకీ కరివాళో జత్తనేతీన్, మేర్ దకాళే వాళో ఖుషీతీ కామ్ చలావ్ణొ.

9తమార్ ప్రేమా కపట్ ఛేనిజు రేణో. ఖరాపేన ఛోడన్ ఆచ్చేన డైఁ కరన్ రో.

10ప్రేమేర్ కార్ణే భాయిబందేర్ నైఁ, ఏకీతీ ఏక్ భళన్ రో. మోట్ పణేర్ బారేమా ఏకేన ఏక్ మోట్ పణ్ దో.

11కామ్ కరేర్వడీ వంగ్దేనీ జేర్నాఁయిఁ మత్ రో, ఆత్మమా హుషారేతీ రేన్, దేవేర్ సేవా కరో.

12నిరీక్షణేతి రేన్ ఖుషీ కర్తే, భావేటిమా ధీరేతి ఖమ్లేన్, ఘట్ మనేతి అరజ్ కర్తేరో.

13పవిత్తర్ జనేర్ జరూరతేమా మదత్ కర్తే, అతిథీర్ సత్కార్ కరో.

14తమేన భావేటి పాడజేన ఆశీజ్ దో. ఆశీజ్ దేణోపణ్ సరాప్ దోమత్.

15ఖుషీ కరేవాళూఁతీ ఖుషీ కరో, రోయేవాళూఁ తీ భళన్ రోవో. ఏకీతీ ఏక్ మన్ భళన్ రో.

16మోట్పణేర్వడీ మన్ మత్ రకాడో. కమ్ ఛజేర్వడీజ్ దల్ రకాడో, తమార్మా తమజ్, హమ్ అక్కల్దార్ ఛాఁ కన్ కేలోమత్.

17కీడ్ కరజేన ఫరన్ కేని సదా హటో కీడ్ మత్ కరో. సోగ్ళీ మన్క్యావూఁర్ నంజ్రేమా ఆచో కరేర్వడీజ్ సోంచ్ కరో.

18రేన బణతో తామేన వంగావ జత్రా, సే మన్క్యాఁ వూతీ సమాధానేతి రో.

19మార్ ప్రేమేర్ భాయియో, తమార్మా తమజ్ రీస్ ఫేల్డో మత్, దేవేర్ రీసేన జాగ్ దో, రీస్ ఫేడేరో మారో కామ్, మజ్ ఉందూన సజార్ ఫళ్ దూంచుఁ కన్ ప్రభూ కేరోచ కన్, లకన్ ఛ.

20జేతి తార్ దుష్మణ్ భుకో రతో ఓన ఖొరాకి ఘాల్. తర్సో రతో పాణి ద. హనూ కరస్ జనా ఓర్ మాతేపర్ ఆంగారేర్ భోబర్ ఠలాయేచీ.

21కీడేతీ జీత్ పావస్ నజుఁ, భలాయి కరన్ కీడేన జీత్ల.

Currently Selected:

Rom 12: Lambadi

Highlight

Copy

Compare