Matayo 2

Abagenyi abaazwire e buwuluka

1Awo oYesu niyabyaliibwe e Beserekemu, ekibuga ekya mu Buyudaaya, omu bwire obwo ngʼoKerode niye mukama, abasaiza abeetegereza ebya nyenyeezi ni bazwa e buwuluka, ni baiza e Yerusaalemu, 2ni babuulya bati, “Omukama wʼaBayudaaya abyaliibwe ali gwayi? Twaboine onyenyeezi ebuwuluka eyalangire nti abyaliibwe, ni twiza okumuramya.”

3Omukama oKerode niyawuliire kini, nʼatuntura amwei nʼabantu aba mu Yerusaalemu boona boona. 4Nʼakumbaania abakabona abakulu boona boona, nʼabeegesya bʼamateeka gʼaBayudaaya, nʼababuulya oKurisito#2:4 Eyasukiibweku amafuta. weyaali akwiza okubyalibwa.

5Bo ni bamwiramu bati, “Mu Beserekemu, ekibuga kya mu Buyudaaya, kubba kyawandiikiibwe omulangi nti,

6‘We Beserekemu gonze ogayibwa omu bibuga bya Yuda baitu oli mukulu,

kubba omu we mulizwamu omwebemberi,

aliroleera abantu bange aba Isirairi.’#Mik 5:2”

7Awo oKerode nʼayeta omwibbise abasaiza abeetegereza ebya nyenyeezi, ni yeetejerya kimwei obwire obwenyenere onyenyeezi bweyabonekeiremu. 8Nʼabasindika e Beserekemu, nʼabakoba ati, “Mwabe mutooleerye omwana oyo kusai, nimwamubona, mumale mwire munkobere, njeena nnyabe mmuramye.”

9Nibamaare okuwura ebya mukama, ni baaba. Awo ni bairamu okubona onyenyeezi gwebaaboine e buwuluka, nʼabeebembera okwica niyaizire nʼayemeera aiguru wa kifo awaali omwana. 10Nibaaboine onyenyeezi, ni basemereerwa muno. 11Ni baingira omu nyumba, ni babona omwana nali nʼoMalyamu onyina. Ni bafukamira ni bamuramya, ni basandabula ensawu zaabwe, ni bamuweerya ebitwo ebya: zaabbu, obubbaani nʼokalifuuwa ayetebwa mira.

12OKanca niyabalabuliire omu kirooto obutairayo ewa Kerode, ni bakwata omuwanda gundi, ni bairayo ewaabwe.

Okwirukira e Misiri

13Awo abasaiza abeetegereza ebya nyenyeezi nibaamaare okwaba, omalaika wa Mukama nʼabonekera oYusufu omu kirooto, nʼamukoba ati, “Imuka, otwale omwana nʼonyina, oirukire e Misiri, obbe eyo okwica nindikukoba okuzwayo, kubba oKerode akwiza okutoolya omwana okumwita.”

14Awo oYusufu nʼaimuka, nʼatwala omwana nʼonyina obwire, nʼayaba e Misiri. 15Nʼabba eyo okwica oKerode niyafiire. Kini kyalimbe kityo, oMukama kyeyabaziire omu balangi leke kikiriire, ekikoba kiti, “Nayetere omwana wange azwe omu Misiri.”#Kos 11:1

OKerode akwita abaana abato

16Awo oKerode niyaboine ngʼabasaiza abeetegereza ebya nyenyeezi baali bamubeyegerembe, nʼagongera muno, nʼalagira okwita abaana aba bwojo boona boona abaali e Beserekemu nʼokumyereero gyakyo, aba myaka ebiri, nʼabaali batakagiikirye, okuzwa oku bwire bweyabuuliiryeku abasaiza abeetegereza ebya nyenyeezi.

17Awo ekyo omulangi oYeremiya kyeyabazire ni kikiriiira, niyakobere ati,

18“Omu Raama baawuliire eiraka,

okukunga nʼokukungubaga okwingi,

oLaakeeri nakukungira abaana baamwe

era nga takwendya akubagizibwe,

kubba tibacaaliwo.”#Yer 31:15

Okuzwa e Misiri

19Awo oKerode niyamaare okufa, omalaika wa Mukama nʼabonekera oYusufu omu kirooto e Misiri, 20nʼamukoba ati, “Imuka otwale omwana nʼonyina, oyabe omu nsi ya Isirairi, kubba abaali bakutoolya omwana okumwita bafiire.” 21Awo oYusufu nʼaimuka, nʼatwala omwana nʼonyina, nʼairayo omu nsi ya Isirairi.

22Baitu niyawuliire nti Acelawusi niye mukama wa Buyudaaya, nʼagwetere oite waamwe oKerode, nʼatiina okwabayo. Awo oKanca niyamulabuliire omu kirooto, nʼayaba omu kitundu kya Galiraaya. 23Nʼayaba nʼabba omu kabuga akeetebwa Naazaleesi. Kini kyabbaire kityo abalangi kyebaabazire leke kikiriire nti “Alyetebwa Munazaaleesi.”

Currently Selected:

Matayo 2: RUULI-NYALA

Highlight

Copy