Bikolwa 4

OPeetero nʼoYokaana omu maiso ga lukiiko

1OPeetero nʼoYokaana ni baali bakubaza egiri abantu, abakabona nʼomukulu wʼabalindi ba iramyo amwei nʼaBasadukaayo, ni babaizira. 2Baali bagongeri, kubba abo bombi baali bakwegesya nʼokubuulira abantu okwakala omu Yesu nti abafu baliyimbooka. 3Ni babakwata ni babata omu nkomyo okwica ekiro ekyaireku, kubba obwire bwali bwabire. 4Baitu baingi okwabo abaawuliire ebigambo byabwe ni baikiriza. Omuwendo gwʼabaikirize ni gweyongera ni gwika abasaiza nkʼenkumi itaanu.

5Ekiro ekyaireku, abeebemberi bʼaBayudaaya nʼabantu abakulu omwiyanga, amwei nʼabeegesya bʼamateeka ni bakumbaanira omu Yerusaalemu. 6Baali: Anasi oSaabakabona, nʼoKayaafa, oYokaana nʼAlekizanda, amwei nʼabandi abaluganda lwa Saabakabona. 7Ni baleeta oPeetero nʼoYokaana ni babeemeerya omu maiso ga lukiiko, ni bababuulya bati, “Mwakoleserye maani ki oba mwakoleire mwibara rya naani okutamba omuntu oni?”

8Awo oPeetero naizwire oMwoyo Akwera, nʼabairamu ati, “Nywe abafugi amwei naanywe abantu abakulu omwIsirairi, 9nimwabba mukutubuulya ereero ekikolwa ekisai ekikoleibwe oku muntu abbaire omulema, nʼoku ngeri gyeyatambiibwemu, 10nywe, nʼabantu ba Isirairi boona boona, mumanye nti eibara rya Yesu oKurisito oMunazaaleesi, gwemwabambire oku musaalaba, baitu oKanca nʼamuyimboola, niryo lisoboleserye omusaiza oni okwemeera akati omu nywe nali mwomi.”

11“OYesu oyo niye ebyawandiikiibwe gwebibazaku biti,

‘Eibbaale nywe abomboki ryemwagaine,

niryo ryafookere erya ku nsonda erigumya enyumba.’”#Zab 118:22

12“Okujunwa tikuli mu muntu wondi yeena yeena, olwakubba ndoowo ibara rindi ansi wa iguru eryaweereibwe abantu okutujuna.”

13Nibaaboine obugumu bwa Peetero nʼoYokaana, era ni beeteja nti nibo abantu aba buli nca, abatali beegesye, ni beewuunya era ni bamanya nga baaliku amwei nʼoYesu. 14Baitu nibaaboine omuntu eyatambirwe nayemereire awo nʼoPeetero nʼoYokaana, ni babulwa kyebakubaza. 15Nibabalagira okuwulukaku omu lukiiko, ni bateesa nibakukoba bati, 16“Abantu bani tubakole ki? Ekyewuunyo kyebakoore kimaare okumanyibwa abantu boona boona ababba omu Yerusaalemu, era titusobola kukigaana! 17Baitu okukikangya okweyongera okusaasaana omu bantu, katwete abasaiza bani tubalabule, baleke kweyongera kubaza na muntu gonze omwei omwibara eryo.” 18Awo ni bairamu okubeeta ni babalagira obutairayo kubaza, gonze okwegesya omuntu yeena yeena omwibara rya Yesu. 19Baitu oPeetero nʼoYokaana ni babairamu bati, “Niinywe musalewo oba kikiriire omu maiso ga Kanca, kuwura niinywe kanda Kanca? 20Iswe titusobola butabaza ekyo kyetwaboine era kyetwawuliire.” 21Awo ni beeyongera okubatiinisiirya ni babataisya, nibatakubona nka nibababonereza olwa kutiina abantu, kubba boona boona baali nibakuwaisya oKanca olwʼekyo ekyakoorwe. 22Omusaiza eyakoleirwe ekyamaano ekyo ekyakutambwa yaali ayakairye omu myaka amakumi anai.

Abaikiriza bakusaba oKanca obugumu

23OPeetero nʼoYokaana nibaataisiibwe, ni bairayo omu baira baabwe, ni babakobera byona abakabona abakulu, amwei nʼabantu abakulu omwiyanga byebabakobere. 24Abaikiriza nibaabiwuliire ni beeyimbya amwei omu kusaba oKanca, ni bakoba bati, “Mukama Akira byona niiwe eyakoore eiguru, ensi, enyanja, na byona ebibirimu. 25Ozeiza waiswe oDawudi, omwiru waamu, wamubazisiirye omu Mwoyo Akwera nʼokoba oti,

‘Lwaki abanyamanga bagongeire?

Era lwaki abantu

bakulowooza ebitalimu?

26Abakama ba nsi beeteekaniza,

nʼabafugi bakumbaana amwei

okulwanisya oMukama

nʼoKurisito waamwe.’#Zab 2:1-2

27“Mananu oKerode nʼoPontiyo Piraato baakumbaaniire amwei nʼabanyamanga nʼabantu ba Isirairi, omu kibuga kini, okulwanisya oYesu omuweereza waamu akwera, gwewafoire oKurisito. 28Baakoore kyewaali omaare okusalawo, omu buyinza bwamu nʼokwendya kwamu, kibbeewo. 29Ati Mukama, bona okutiinisiirya kwabwe. Weerya abaweereza baamu obugumu, babaze ekigambo kyamu nʼamaani. 30Golola omukono gwamu otambe, era ebyamaano nʼebyewuunyo bikolebwe omwibara rya muweereza waamu akwera; oYesu.” 31Nibaamaare okusaba, ekifo kyona mwebaali bakumbaaniire, ni kikankana. Boona boona ni baizula oMwoyo Akwera, era ni babaza ekigambo kya Kanca nʼamaani.

Abaikiriza baakoleseryanga amwei ebintu byabwe

32Ekibiina kyona ekyʼabaikiriize oKurisito, kyalina omutima gumwei nʼomwoyo gumwei. Ndoowo nʼomwei eyakobanga nti ekintu kyalina kyamwe yenkai, baitu byona byona byebaalina byabbanga byabwe amwei. 33Abakwenda ni babazanga nʼamaani gaingi oku kuyimbooka kwa Mukama waiswe oYesu, era boona boona ni babona ekisa kya Kanca. 34Boona boona baafunanga byebaayendyanga, kubba abaabbanga nʼendimiro oba nyumba baazitundanga, empiiya ezaaligangamu 35ni bazita oku magulu#4:35 Kani kaali kabonero akaalanganga nti ekintu omuntu akiweereireyo kimwei. gʼabakwenda, ni bagabira buli muntu nka niyayendyanga. 36NʼoYusufu oMuleevi eyabyaliibwe e Saipuraasi, abakwenda gwebaayalikire erya Bbalunabba (erimanyisya nti, “Omwana airyamu abantu amaani”), 37nʼatunda endimiro yaamwe, empiiya ezaaligiremu nʼazitwala nʼazita oku magulu gʼabakwenda.

Currently Selected:

Bikolwa 4: RUULI-NYALA

Highlight

Copy